ភ្នំពេញៈ រយៈពេល ១០ ខែឆ្នាំនេះ ជនរងគ្រោះស្លាប់ដោយសារមីន និងសំណល់ជាតិផ្ទុះពីសង្គ្រាមមាន ៤១ ករណី បណ្តាលឱ្យមនុស្សស្លាប់ និងរបួស ៥៥ នាក់។ តួលេខនេះមានការថយចុះ បើធៀបកាលពីឆ្នាំមុនក្នុងរយៈពេលដូចគ្នា មានគ្រោះថ្នាក់កើតឡើង ៤៨ ករណី បណ្តាលឱ្យមនុស្សស្លាប់ និងរបួសចំនួន ៧១ នាក់។ នេះបើតាមរបាយការណ៍អាជ្ញាធរមីនពីម្សិលមិញ។
ក្នុងពិធីបិទសិក្ខាសាលាបូកសរុប លទ្ធផលការងារឆ្នាំ ២០២០ និងលើកទិសដៅការងារឆ្នាំ ២០២១ របស់អាជ្ញាធរមីននៅខេត្តសៀមរាបពីម្សិលមិញ លោក លី ធុជ ទេសរដ្ឋមន្ត្រី និងជាអនុប្រធានទី ១ អាជ្ញាធរមីនតំណាងលោកនាយករដ្ឋមន្ដ្រី ហ៊ុន សែន ប្រធានអាជ្ញាធរមីនថ្លែងថា អត្រាជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមមាន ៤១ ករណី (ដោយសារមីន ២៣ ករណី សំណល់ជាតិផ្ទុះពីសង្គ្រាម ១៨ ករណី) បណ្តាលឱ្យមនុស្សស្លាប់ និងរបួស ៥៥ នាក់ (ស្លាប់ ១៦ នាក់ របួស ២៩ នាក់ ពិការអវយវៈ ១០ នាក់)។
លោកបញ្ជាក់ថា៖ «ជនរងគ្រោះជាបុរសមាន ៣៤ នាក់ ក្មេងប្រុសអាយុក្រោម ១៨ ឆ្នាំ ១៥ នាក់ និងស្ត្រី ៣ នាក់ និងក្មេងស្រីអាយុក្រោម ១៨ ឆ្នាំ ៣ នាក់»។
តាមការបង្ហាញលទ្ធផលរបស់លោក លី ធុជ ពីម្សិលមិញគឺក្នុងរយៈពេល ៣ ត្រីមាសក្នុងឆ្នាំនេះបានរំដោះផ្ទៃដី ដែលមានមីន និងសំណល់ជាតិផ្ទុះពីសង្គ្រាមបានប្រមាណ ១០៣.២ គីឡូម៉ែត្រការ៉េ (ចំនួន ១០៣.២៣៨.៨៤៦ ម៉ែត្រការ៉េ) ដោយរកឃើញ និងកម្ទេចចោលគ្រាប់មីនប្រឆាំងមនុស្ស ១១ ០២០ គ្រាប់។ គ្រាប់មីនប្រឆាំងយានយន្ត ២៤៨ គ្រាប់ និងសំណល់ជាតិផ្ទុះពីសង្គ្រាមចំនួន ៣៥ ៧៧១ គ្រាប់។
លោកទេសរដ្ឋមន្ត្រី វាយតម្លៃខ្ពស់ចំពោះលទ្ធផលសម្រេចបាននាពេលកន្លងមក និងបានថ្លែងអរគុណចំពោះកម្មវិធីអភិវឌ្ឍន៍អង្គការសហប្រជាជាតិ (UNDP)។ អង្គការនេះបានផ្តល់នូវកិច្ចសហការយ៉ាងជិតស្និទ្ធ និងជួយឧបត្ថម្ភគាំទ្រទាំងផ្នែកបច្ចេកទេស និងថវិកាតាមរយៈការអនុវត្តរួមគ្នាលើគម្រោងបោសសម្អាតមីនដើម្បីលទ្ធផល ចាប់តាំងពីដំណាក់កាលទី ១ រហូតដល់ដំណាក់កាលទី ៤ នេះ។
លោកក៏អរគុណចំពោះការចូលរួមចំណែករបស់អង្គការ UNICEF ដែលបានបន្តជួយទៅលើផ្នែកអប់រំគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះ និងគម្រោង DFID/Capacity Development តាមរយៈអង្គការ NPA ផងដែរ។
បើតាមលោក លី ធុជ ទន្ទឹមនឹងលទ្ធផលដែលសម្រេចបានខាងលើក៏មានបញ្ហាប្រឈមមួយចំនួនទៀតនៅសេសសល់ និងមិនទាន់អាចដោះស្រាយបានទាំងស្រុង។ លោកផ្តល់អនុសាសន៍ណែនាំដល់អគ្គលេខាធិការដ្ឋាននានានៃអាជ្ញាធរមីនដោយត្រូវបន្ត អនុវត្តឱ្យបាននូវផែនការយុទ្ធសាស្ត្រជាតិសកម្មភាពមីន ២០១៨-២០២៥ ឈានទៅសម្រេចបានជោគជ័យនូវយុទ្ធសាស្ត្រចតុកោណរបស់រាជរដ្ឋាភិបាល និងសម្រេចនូវគោលដៅអភិវឌ្ឍន៍ប្រកបដោយ ចីរភាព ឈានឆ្ពោះទៅរកកម្ពុជាមួយដែលគ្មានមីន ឆ្នាំ ២០២៥ និងបន្តស្វែងរកការគាំទ្រ និងកិច្ចសហការជាមួយអង្គការ និងដៃគូអភិវឌ្ឍន៍បន្តទៀត។
តាមរបាយការណ៍ចាប់ពីខែមករា ដល់ ខែតុលា ក្នុងឆ្នាំ ២០១៩ តួលេខបណ្តោះអាសន្ននៃជនរងគ្រោះ ដោយសារមីន និងសំណល់ជាតិផ្ទុះពីសង្គ្រាម គឺមានជនរងគ្រោះចំនួន ៧១ នាក់ក្នុងនោះ ជនរងគ្រោះស្លាប់ដោយសារមីន ១១ នាក់ របួស ៤៧ នាក់ និងពិការអវយវៈ ១៣ នាក់។ ជនរងគ្រោះជាបុរស ៥០ នាក់ ក្មេងប្រុសអាយុក្រោម ១៨ ឆ្នាំ ចំនួន ១៥ នាក់ និងស្ត្រីចំនួន ៦ នាក់។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) ប្រាប់ពីម្សិលមិញថា៖ «ចន្លោះឆ្នាំ ១៩៩៣-១៩៩៨ គ្រាប់មីន និងសំណល់ជាតិផ្ទុះពីសង្គ្រាមបានសម្លាប់ និងធ្វើឱ្យរងរបួសប្រជាជនកម្ពុជាប្រមាណជាង ៤ ០០០ នាក់ ក្នុង ១ ឆ្នាំៗដែលក្លាយជាឃាតករលេខ ១ នៅកម្ពុជា»។
លោក រតនា បន្តថា អង្គភាពស៊ីម៉ាក់ជាកម្លាំងស្នូលនៃការកម្ចាត់ឃាតករនេះ ដែលធ្វើឱ្យជនរងគ្រោះធ្លាក់ចុះមានចំនួនតិចជាង ១០០ នាក់ ក្នុង ១ ឆ្នាំៗ (ទិន្នន័យឆ្នាំ ២០១៩)។ បច្ចុប្បន្ននេះ ដោយសារភាពរីកចម្រើនខាងមធ្យោបាយ ដឹកជញ្ជូន និងការអភិវឌ្ឍហេដ្ឋារចនាសម្ព័ន្ធ ឃាតករតាមដងផ្លូវ (ចរាចរណ៍)បានក្លាយជាយមរាជលេខ ១ វិញម្តង ក្នុងការឆក់យកជីវិតប្រជាជនកម្ពុជា៕