.jpg)
ផលិតផលក្លែងក្លាយត្រូវបានដុតបំផ្លាញពីម្សិលមិញនៅខណ្ឌដង្កោ។ រូប ក្រសួងព័ត៌មាន
ភ្នំពេញៈ ការបង្ក្រាបឱសថខុសច្បាប់ និងផលិតផលក្លែងក្លាយទូទៅក្នុងរយៈពេល ១០ ខែឆ្នាំនេះមានការកើនឡើងគួរឱ្យកត់សម្គាល់ដែលភាគច្រើនជាសម្ភារវេជ្ជសាស្ត្រ ឱសថសាស្ត្រសម្រាប់ទប់ស្កាត់ជំងឺកូវីដ ១៩។ នេះបើតាមប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀច សុផាន់ណា។
ការលើកឡើងនេះធ្វើឡើងក្នុងពិធីកម្ទេចឱសថខុសច្បាប់ និងផលិតផលក្លែងក្លាយទូទៅចំនួនជាង ៥៤០ តោន ពីម្សិលមិញនៅខណ្ឌដង្កោ រាជធានីភ្នំពេញ ខណៈលោក មៀច សុផាន់ណា ដែលក៏ជារដ្ឋលេខាធិការក្រសួងមហាផ្ទៃចូលរួមក្នុងពិធីនោះដោយមានការចូលរួមពីភ្ញៀវជាតិ និងអន្តរជាតិ ព្រមទាំងមន្ត្រីអាជ្ញាធរមូលដ្ឋានជាច្រើននាក់។ ក្នុងឱកាសនោះរដ្ឋមន្ត្រីក្រសួងយុត្តិធម៌លោក កើត រិទ្ធ ដែលចូលរួមជាអធិបតីជំរុញឱ្យមានការចុះបង្ក្រាប និងអនុវត្តច្បាប់ឱ្យបានម៉ឺងម៉ាត់។
លោក មៀច សុផាន់ណា ថ្លែងថា ឱសថខុសច្បាប់ និងផលិតផលក្លែងក្លាយទូទៅដែលមានចំនួនជាង ៥៤០ តោននេះ ត្រូវបានសមត្ថកិច្ចបង្ក្រាបចាប់តាំងពីដើមឆ្នាំ ២០២០ ជាហូរហែមក។ ចំនួននេះមានការកើនឡើងដែលបង្ហាញ ថាសមត្ថកិច្ចបានបង្កើនសកម្មភាព និងពង្រឹងច្បាប់យ៉ាងមមាញឹក។ ផលិតផលចម្រុះនេះរួមមាន ឱសថខុសច្បាប់ និងគ្រឿងបរិភោគ ឧបភោគ ដោយឈ្មួញបាននាំចូលដោយខុសច្បាប់ ហួសកាលបរិច្ឆេទ និងផលិតផលខូចគុណភាព។
លោកបញ្ជាក់ថា៖ «ឆ្នាំនេះ គឺយើងបង្ក្រាបបានច្រើន គឺមានការកើនឡើងជាងបណ្ដាឆ្នាំមុនៗ ហើយភាគច្រើនជាសម្ភារវេជ្ជសាស្ត្រ ឱសថសាស្ត្រសម្រាប់ទប់ស្កាត់ជំងឺកូវីដ១៩ រួមទាំងអាល់កុលក្លែងក្លាយ ជែលលាងដៃ និងម៉ាស់ក្លែងក្លាយ»។
លោកបន្តថា៖ «អ៊ីចឹងសម្ភារទាំងនេះយើងរឹបអូសបាន ព្រោះសម្ភារទាំងនេះគ្មានគុណភាព គ្មានច្បាប់អនុញ្ញាតត្រឹមត្រូវ គ្មានគុណភាព គ្មានស្ដង់ដាត្រឹមត្រូវ។ អ៊ីចឹងបូករួមទាំងសម្ភារផ្សេងៗទៀត គឺយើងកត់សម្គាល់ឃើញថា មានចំនួនច្រើនជាងឆ្នាំមុន»។
បើតាមមន្ត្រីជាន់ខ្ពស់រូបនេះ អ្នកពាក់ព័ន្ធសំណុំរឿងឱសថខុសច្បាប់ និងផលិតផលក្លែងក្លាយ សមត្ថកិច្ចបានកសាងសំណុំរឿងចំនួន ១២ ករណី បញ្ជូនទៅតុលាការ ដើម្បីផ្ដន្ទាទោសតាមផ្លូវច្បាប់។ ជនសង្ស័យមួយចំនួនត្រូវបានបញ្ជូនទៅឃុំឃាំងនៅពន្ធនាគារ និងមួយចំនួនទៀតត្រូវបានដាក់ឱ្យស្ថិតក្រោមការត្រួតពិនិត្យរបស់តុលាការ។
រដ្ឋមន្ត្រីក្រសួងយុតិ្តធម៌លោក កើត រិទ្ធ ថ្លែងថាបញ្ហាឱសថក្លែងក្លាយ និងផលិតផលក្លែងក្លាយជាបញ្ហាសុខភាពសាធារណៈ និងជាអាទិភាពមួយដ៏សំខាន់ដែលចាំបាច់ត្រូវតែចាត់វិធានការឱ្យបានម៉ឺងម៉ាត់ និងទាន់ពេលវេលា។
លោកបញ្ជាក់ថា៖ «ការផលិត ការនាំចេញ ការនាំចូល និងការចែកចាយឱសថខុសច្បាប់ ឬផលិតផលក្លែងក្លាយខុសច្បាប់ គឺជាបទល្មើសមួយដែលមានលក្ខណៈធ្ងន់ធ្ងរ។ ហេតុនេះបន្ថែមលើការដកហូត និងការកម្ទេចចោលផលិតផលទាំងនេះគឺមន្ត្រីអនុវត្តច្បាប់ត្រូវពង្រឹងការអនុវត្តវិធានការច្បាប់ឱ្យបានម៉ឺងម៉ាត់បំផុត និងត្រូវផ្តន្ទាទោសជនល្មើស និងអ្នកពាក់ព័ន្ធទាំងឡាយតាមច្បាប់ជាធរមាន»។
លើសពីនេះលោក កើត រិទ្ធ ព្រមានចំពោះអ្នកនាំចូល និងអ្នកចែកចាយផលិតផលក្លែងក្លាយត្រូវតែដាក់ទោសទណ្ឌឱ្យបានតឹងរ៉ឹង និងត្រឹមត្រូវតាមប្រភេទនៃបទល្មើសដែលកំណត់ក្នុងច្បាប់។ ជាពិសេសច្បាប់ស្តីពីការគ្រប់គ្រង ឱសថ និងច្បាប់ស្តីពីការគ្រប់គ្រងគុណភាព សុវត្ថិភាព លើផលិតផលទំនិញ និងសេវា ដើម្បីធានាការពារសុខភាពប្រជាជនកម្ពុជា។
តាមលោក សុផាន់ណា សមត្ថកិច្ចគ្រប់ជាន់ថ្នាក់ទាំងអស់បាននិងកំពុងបន្តកិច្ចប្រឹងប្រែង និងបង្កើនសកម្មភាពស្រាវជ្រាវបន្ថែមទៀតដើម្បីបង្ក្រាបផលិតផលក្លែងក្លាយ និងខូចគុណភាពទាំងអស់នៅកម្ពុជាក្នុងគោលបំណងថែរក្សា ផលប្រយោជន៍រួម សុខុមាលភាពសាធារណៈក៏ដូចជាការការពារអាយុជីវិតប្រជាពលរដ្ឋ។ ជាពិសេសត្រូវការពារអ្នករកស៊ីសុចរិតទៀងត្រង់ និងសម្របសម្រួលដល់ការវិនិយោគដោយស្មើភាពគ្នានៅក្នុងសង្គម។
កាលពីឆ្នាំមុនបើតាមរដ្ឋមន្ត្រីក្រសួងមហាផ្ទៃលោក ស ខេង គឺផលិតផលក្លែងក្លាយប្រមាណជាង ១០០ តោន ដែលមានចំនួន ១២ មុខក្នុងនោះមានថ្នាំពេទ្យក្លែងក្លាយចំនួន ១០៦ មុខ ស្មើនឹង ៤០០ គីឡូក្រាម ទឹកសុទ្ធជិត ៦៣ តោន ត្រូវបានសមត្ថកិច្ចជំនាញបង្ក្រាប។ បន្ថែមលើនេះមានផលិតផលសម្បកកញ្ចប់បារី បារីចម្រុះម៉ាកផងដែរ៕
វីដេអូ៖
