ភ្នំពេញ: គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ និងមន្ត្រីរដ្ឋបាលព្រៃឈើបានបង្ក្រាបបទល្មើសព្រៃឈើសរុបចំនួន ៣ ៣១២ ករណី និងឃាត់ខ្លួនជនល្មើសបានចំនួន ២២៨ នាក់ក្នុងរយៈពេល ១១ ខែ ចាប់ពីខែធ្នូ ឆ្នាំ ២០១៩ ដល់ខែវិច្ឆិកា ឆ្នាំ ២០២០ ខណៈលោក សៅ សុខា ប្រធានគណៈកម្មការនេះស្នើមន្ត្រីជំនាញពង្រឹងការអនុវត្តច្បាប់ឱ្យបានម៉ឺងម៉ាត់បំផុត។
របាយការណ៍នេះត្រូវបានផ្សព្វផ្សាយនៅក្នុងកិច្ចប្រជុំត្រួតពិនិត្យការអនុវត្តបទបញ្ជារបស់រាជរដ្ឋាភិបាលក្នុងការទប់ស្កាត់ និងបង្ក្រាបបទល្មើសធនធានធម្មជាតិនៅថ្ងៃទី ៨ ខែធ្នូ នៅបញ្ជាការដ្ឋានកងរាជអាវុធហត្ថលើផ្ទៃប្រទេសតាមរយៈវីដេអូប្រព័ន្ធហ្សូម (ZOOM) ជាមួយមន្ត្រីក្រសួងយុត្តិធម៌ ក្រសួងរ៉ែ និងថាមពល និងមន្ត្រីបញ្ជាការដ្ឋានកងរាជអាវុធហត្ថទាំង ២៥ ខេត្ត/ក្រុង។
ក្នុងកិច្ចប្រជុំនោះលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស និងជាប្រធានក្រុមលេខាធិការនៃគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិបានឡើងអានសេចក្តីព្រាងរបាយការណ៍បូកសរុបលទ្ធផលប្រតិបត្តិការទប់ស្កាត់ និងបង្ក្រាបបទល្មើសធនធានធម្មជាតិដែលអនុវត្តតាមសេចក្តីសម្រេចរបស់រាជរដ្ឋាភិបាល។
លោក អេង ហ៊ី ឱ្យដឹងថា ជាលទ្ធផលចាប់ពីខែធ្នូ ឆ្នាំ ២០១៩ រហូតដល់ខែវិច្ឆិកា ឆ្នាំ ២០២០ រដ្ឋបាលព្រៃឈើបានទប់ស្កាត់ និងបង្ក្រាបបានបទល្មើសព្រៃឈើសរុបចំនួន ១ ៩២០ ករណីដោយបានឃាត់ខ្លួនជនសង្ស័យចំនួន ៦៣ នាក់ និងដកហូតវត្ថុតាងផល អនុផលព្រៃឈើ មធ្យោបាយ ឧបករណ៍ និងសម្ភារមួយចំនួនទៀត។
ចំណែកកម្លាំងគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិបានធ្វើប្រតិបត្តិការតាមបណ្តាខេត្ត សហការជាមួយមន្ត្រីជំនាញបង្ក្រាបបាន ១ ៣៩២ ករណីដោយធ្វើការឃាត់ខ្លួនជនសង្ស័យចំនួន ១៦៥ នាក់ និងរឹបអូសវត្ថុតាងប្រគល់ឱ្យមន្ត្រីរដ្ឋបាលព្រៃឈើ និងបរិស្ថានរក្សាទុក។
លោកបញ្ជាក់ថា៖ «គណៈកម្មការជាតិបានបន្តធ្វើការអប់រំផ្សព្វផ្សាយច្បាប់បទដ្ឋានគតិយុត្ត បទបញ្ជាពាក់ព័ន្ធនឹងធនធានធម្មជាតិក៏ដូចជាពង្រឹងយន្តការថ្នាក់រាជធានី-ខេត្ត ប្រើប្រាស់កម្លាំងសរុបរបស់ខ្លួនធ្វើការទប់ស្កាត់ និងបង្ក្រាបការកាប់ព្រៃឈើ ការដឹកឈើ ការនាំចេញឈើខុសច្បាប់ ការចាប់សត្វព្រៃ ការនាំចេញសត្វព្រៃខុសច្បាប់ ការកាប់រានទន្ទ្រានយកដីរដ្ឋ និងការរុករករ៉ែដោយខុសច្បាប់គ្រប់រូបភាព»។
លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ថ្លែងក្នុងកិច្ចប្រជុំនោះថា អាជ្ញាធរជំនាញគួរតែរៀបចំច្រកចេញចូលតែមួយ សម្រាប់រាជធានី- ខេត្តទាំង ២៥ ដើម្បីបង្កើនប្រសិទ្ធភាពការងារគ្រប់គ្រងទៅលើលិខិតស្នាម ចៀសវាងការក្លែងបន្លំលិខិតមិនត្រឹមត្រូវដោយជនខិលខូចក្នុងការដឹកជញ្ជូន ឬធ្វើអាជីវកម្មព្រៃឈើបំពានច្បាប់និង ស.ជ.ណ របស់រាជរដ្ឋាភិបាល។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកថ្លែងពីម្សិលមិញថា កន្លងមកអាជ្ញាធរបង្ក្រាបបានតែបទល្មើសតូចតាចប៉ុណ្ណោះ ប៉ុន្ដែចំពោះបុគ្គលមានអំណាច និងអ្នកមានលុយច្រើនមិនត្រូវបានបង្ក្រាប ឬចាត់វិធានការតាមច្បាប់ទេ។ ជាពិសេសបទល្មើសព្រៃឈើធំៗពាក់ព័ន្ធអ្នកមានអំណាចនៅខេត្តមណ្ឌលគិរី និងរតនគិរីមិនត្រូវបានចាប់ជនល្មើសមកផ្តន្ទាទោសតាមច្បាប់ទេ។
លោកបញ្ជាក់ថា៖ «យើងមានការអស់សង្ឃឹមទៅលើគណៈកម្មការជាតិហ្នឹង បើទោះបីជាមិនឃើញមានតួលេខបង្ក្រាបច្រើនក៏ដោយ គឺមានតែតួលេខ តែគ្មានគុណភាព ព្រោះបទល្មើសកន្លងមកយើងឃើញច្បាស់ហើយគឺអត់បានកាត់ទោសពួកគេទេ អ៊ីចឹងបញ្ហានៅតែកើតមានឡើងដដែល។ បើច្បាប់មិនដាក់ទោសឧកញ៉ាៗទាំងអស់ហ្នឹងទេ អ្នកផ្សេងទៀតគេមើលមកច្បាប់យើង តើគេគិតយ៉ាងណាចំពោះការអនុវត្តច្បាប់យើង»។
ប៉ុន្តែលោក សៅ សុខា បានគូសបញ្ជាក់ក្នុងកិច្ចប្រជុំដោយជំរុញដល់មន្ត្រីជំនាញឱ្យយកចិត្តទុកដាក់ទៅលើការប្រមូលភ័ស្តុតាង ដែលទទួលបានពីគណៈកម្មការជាតិ ដើម្បីរក្សាទុកជាភ័ស្តុតាងសម្រាប់តុលាការ និងជាភ័ស្តុតាងបង្ហាញជូនសាធារណជនឱ្យបានឃើញពីការខិតខំប្រឹងប្រែងរបស់រាជរដ្ឋាភិបាលក្នុងការបង្ការ ទប់ស្កាត់ និងបង្ក្រាបបទល្មើសធនធានធម្មជាតិ គឺមិនមែននិយាយតែពាក្យសម្តីទេ ប៉ុន្ដែមានទង្វើជាក់ស្តែង ហើយចារឈ្មោះឧក្រិដ្ឋជនព្រៃឈើ ក្រោយពីតុលាការរកឃើញថា ឧក្រិដ្ឋជនជនល្មើសបានប្រព្រឹត្តសកម្មភាពបំផ្លិចបំផ្លាញធនធានធម្មជាតិ។
លោកបញ្ជាក់ថា៖ «សូមស្នើដល់មន្ត្រីអនុវត្តច្បាប់ទាំងបរិស្ថាន រដ្ឋបាលព្រៃឈើ អាជ្ញាធរដែនដី សូមពង្រឹងការអនុវត្តច្បាប់ឱ្យបានម៉ឺងម៉ាត់បំផុត និងសូមធ្វើការត្រួតពិនិត្យក្រុមហ៊ុន តំបន់ព្រៃឈើនៅមូលដ្ឋានរបស់ខ្លួនឱ្យជាប់ជាប្រចាំ ដើម្បីថែរក្សាធនធានធម្មជាតិរបស់ជាតិយើង»៕