.jpg)
ពលរដ្ឋពេលផ្អើលចុះវាស់ដីនៅខេត្តព្រះសីហនុ កាលពីសប្តាហ៍មុន។ ហេង ជីវ័ន
ព្រះសីហនុៈ ជនសង្ស័យ ១១ នាក់ត្រូវបានសមត្ថកិច្ចខេត្ដព្រះសីហនុចាប់ឃាត់ខ្លួនបញ្ជូនទៅតុលាការ ជាបន្ដបន្ទាប់ក្នុងអំឡុងពេល ១ សប្ដាហ៍កន្លងមក ហើយ ៧ នាក់ក្នុងចំណោមពួកគេ ត្រូវបានតុលាការចោទប្រកាន់និងបញ្ជូនទៅឃុំខ្លួនខណៈ ៤ នាក់ទៀតកំពុងធ្វើការសាកសួរ ក្នុងករណីដឹកនាំប្រជាពលរដ្ឋទៅបោះបង្គោលវាតយកដីរដ្ឋ និងដីឯកជន។
លោក ហួត វិចិត្រ ព្រះរាជអាជ្ញារង និងជាអ្នកនាំពាក្យសាលាដំបូងខេត្ដព្រះសីហនុបានឲ្យដឹងកាលពីម្សិលមិញថា ជនសង្ស័យ ១១ នាក់ត្រូវចាប់បញ្ជូនទៅតុលាការកាលពីថ្ងៃសៅរ៍និងថ្ងៃអាទិត្យម្សិលមិញ។
លោកថា៖ «ពួកគាត់សុទ្ធតែពាក់ព័ន្ធនឹងករណីដីធ្លី ហើយឥឡូវខ្ញុំរុញឲ្យចៅក្រមស៊ើបសួរហើយ ចំណែកព័ត៌មានមួយចំនួន ខ្ញុំអត់អាចជម្រាបជូនបានទេ ទុកឲ្យការងាររបស់ចៅក្រម។ សំណុំរឿងទី ១ ចំពោះករណី ៧ នាក់ចៅក្រមសម្រេចឃុំខ្លួនហើយ ឥឡូវ ៤ នាក់នេះ កំពុងតែសាកសួរ»។
លោក វិចិត្រ បញ្ជាក់ថា ជនសង្ស័យ ៧ នាក់ដែលបានឃុំខ្លួននោះ គឺពាក់ព័ន្ធនឹងអំពើឆបោក អំពើហិង្សាលើអ្នកកាន់កាប់ដីធ្លី ការអនុវត្ដខុសវិជ្ជាជីវៈដោយយកឈ្មោះជាសមាគម ទៅឲ្យប្រជាជនផ្ដិតមេដាយ និងរត់ការជុំវិញការកាត់វៀលដីជាដើម។ «ចំពោះ ៤ នាក់កំពុងពិចារណាលើបទចោទទៅលើហិង្សាលើអ្នកកាន់កាប់អចលនវត្ថុដោយសុចរិត ដោយគាត់ទៅទន្ទ្រាន ដីឯកជនរបស់គេអីហ្នឹង» ។
លោក ឱ សារឿន អ្នកនាំពាក្យសាលាខេត្ដព្រះសីហនុឲ្យដឹងថា បន្ទាប់ពីមានពលរដ្ឋរាប់រយនាក់ បានសម្រុកមកបោះបង្គោលព្រំដីដ៏អនាធិបតេយ្យ អាជ្ញាធរខេត្ដ បានកំណត់មុខសញ្ញាមេខ្យល់ និងបានឃាត់ខ្លួនជាបន្ដបន្ទាប់។ «សមត្ថកិច្ច បាននាំខ្លួនអ្នកដែលសង្ស័យ ដែលនៅពីក្រោយរឿងនេះ ហើយក៏បានបញ្ជូនទៅតុលាការព្រោះមានតែតុលាការទេ ទើបអាចវិនិច្ឆ័យធ្វើការដាក់ទោសទណ្ឌបាន»។
លោក សារឿន ឲ្យដឹងថា ក្រោយពីមានការផ្សព្វផ្សាយ និងពន្យល់ពីសំណាក់អាជ្ញាធរខេត្ដព្រះសីហនុ ក្នុងរយៈពេលជាង ១ សប្ដាហ៍នេះ ប្រជាពលរដ្ឋដែលសម្រុកទៅបោះបង្គោលព្រំដីបែបអនាធិបតេយ្យនោះ លែងមានបន្ដសកម្មភាពទៀតហើយ។
ទាក់ទងនឹងករណីផ្ទុះឡើងនូវការទៅចាប់យកដីបែបអនាធិបតេយ្យនេះ កាលពីថ្ងៃទី ១៥ ខែមីនា ឆ្នាំ ២០១៩ លោក យន្ត មីន អភិបាលខេត្តព្រះសីហនុ បានបើកកិច្ចប្រជុំពិគ្រោះយោបល់ជាមួយអង្គការសង្គមស៊ីវិលចំនួន ១៣ ដែលមានមូលដ្ឋាននៅខេត្តនេះ ដើម្បីសិក្សាស្វែងយល់ពីបញ្ហានានាជាមួយគ្នា។ «រដ្ឋបាលខេត្តព្រះសីហនុ នឹងធ្វើការជួបប្រជុំជាមួយអង្គការសង្គមស៊ីវិល ៦ ខែម្ដង ដើម្បីធ្វើការផ្លាស់ប្ដូរ ក្នុងន័យស្ថាបនា អភិវឌ្ឍខេត្តឱ្យមានការរីកចម្រើនជាវិជ្ជមាននាពេលខាងមុខ»។
នៅក្នុងជំនួបនោះ លោក សុខ សុខុម ប្រធានអង្គការ CNRO បានលើកឡើងពីបញ្ហាមួយចំនួនដូចជា សុំឱ្យអាជ្ញាធរទប់ស្កាត់ភាពអនាធិបតេយ្យ ការទន្ទ្រានបោះបង្គោលទន្ទ្រានកាន់កាប់ដីសាធារណៈរបស់រដ្ឋ និងដីឯកជន ដែលមានកម្មសិទ្ធិស្របច្បាប់ ការកាប់បំផ្លាញឈូសឆាយព្រៃឧទ្យានជាតិរាម និងការចាក់ដីលុបសមុទ្រនៅអ៊ូរទូក ស្ថិតនៅស្រុកស្ទឹងហាវជាដើម។
លោក សុខុម បានថ្លែងបន្ថែមពីម្សិលមិញថា៖ «រដ្ឋបាលខេត្ដបានទទួលយកការលើកឡើងរបស់យើងទៅពិចារណាហើយទាំងរឿងការចាក់ដីលុបសមុទ្រទៅធ្វើជាទ្រព្យកម្មសិទ្ធិរបស់បុគ្គលមួយចំនួន»។
លោកថា មេខ្យល់ដែលមួយចំនួនជាមន្ត្រីអង្គការសង្គមស៊ីវិលបានដឹកពលរដ្ឋ តាមឡានក្រុង នាពេលយប់មកដាក់នៅខេត្ដព្រះសីហនុ ដើម្បីទៅវាតទីយកដីសាធារណៈរបស់រដ្ឋ និងដីឯកជន។
ចំណែក លោកស្រី ជៀប សុធារី តំណាងសមាគម អាដហុក ប្រចាំខេត្ដព្រះសីហនុ ក៏បានលើកឡើងពីការព្រួយបារម្ភ ជុំវិញវិវាទដីធ្លីដែលកើតមានឡើង និងមិនទាន់មានដំណោះស្រាយរួចនេះដែរ។ «ជំនួបរវាងរដ្ឋបាលខេត្ដ ជាមួយសង្គមស៊ីវិលនេះ មានផលល្អ ដែលយើងអាចលើកយកបញ្ហាដែលរាំងស្ទះផ្សេងៗ មកដាក់លើតុពិភាក្សាគ្នាស្វែងរកដំណោះស្រាយបាន»។
លោក យន្ដ មីន បានថ្លែងនៅក្នុងជំនួបជាមួយអង្គការសង្គមស៊ីវិលនោះថា លោកទទួលយកសំណើដែលបានលើកឡើងទៅធ្វើការដោះស្រាយ។ «ដូច្នេះយើងត្រូវរួមគ្នាបញ្ចេញមតិ យោបល់ក្នុងន័យស្ថាបនាដោះស្រាយបញ្ហាប្រឈម ការពារសម្បត្តិធនធានធម្មជាតិកុំឲ្យបាត់បង់ ពិសេសព្រៃកោងកាង»៕
