ភ្នំពេញៈ គិតចាប់ពីការផ្តើមដំណើរការជំរឿននាយកដ្ឋានអន្តោប្រវេសន៍ក្រសួងមហាផ្ទៃបានបណ្តេញជនអន្តោប្រវេសន៍ខុសច្បាប់ជាង ៣ ២០០ នាក់ដែលមាន ៤៦ សញ្ជាតិក្នុងនោះជិត ២៨០០ នាក់ជាជនជាតិវៀតណាមក្នុងរយៈពេល ១៤ ខែមកនេះ ។
តាមរយៈរបាយការណ៍បូកសរុបការងាររបស់អគ្គនាយកដ្ឋានអន្តោប្រវេសន៍ក្រសួងមហាផ្ទៃដែលភ្នំពេញប៉ុស្តិ៍ទទួលបានកាលពីម្សិលមិញបានបង្ហាញនូវស្ថិតិជនបរទេសដែលត្រូវបានបណ្តេញចេញពីកម្ពុជាដោយគិតចាប់ពីខែកក្កដាឆ្នាំ ២០១៤ រហូតមកដល់ដំណាច់ខែកញ្ញា ឆ្នាំ ២០១៥ ដែលមានដល់ទៅ ៣២២៦ នាក់ក្នុងនោះស្រីមានចំនួន ៥៦៧ នាក់។ ក្នុងតារាងស្ថិតិនេះជនជាតិវៀតណាមត្រូវបានគូសបញ្ជាក់ថាមានចំនួន ២៧៩៤ នាក់ក្នុងនោះស្រី ៥២២ នាក់ច្រើនជាងគេបើធៀបនឹងជនអន្តោប្រវេសន៍សញ្ជាតិផ្សេងទៀត។
តាមរបាយការណ៍នេះក្នុងរយៈពេល ៩ ខែគិតត្រឹមដើមឆ្នាំរហូតមកទល់នឹងថ្ងៃទី ២៨ ខែកញ្ញាឆ្នាំ ២០១៥ មានជនអន្តោប្រវេសន៍ចំនួន ១៩១៩ នាក់ក្នុងនោះជនជាតិវៀតណាមមាន ១ ៧៣៥ នាក់ដែលមានស្រី ២៧៧ នាក់។ ដោយឡែកក្នុងឆ្នាំ ២០១៤ គិតចាប់ពីខែកក្កដាដល់ខែធ្នូជនអន្តោប្រវេសន៍ខុសច្បាប់ដែលត្រូវបានបណ្តេញចេញមាន ១៣០៧ នាក់ ២៤ សញ្ជាតិក្នុងនោះ ១ ០៥៩ នាក់ជាជនជាតិវៀតណាម។
ប្រធានផ្នែកស៊ើបអង្កេត និងអនុវត្តនីតិវិធីនៃនាយកដ្ឋានអន្តោប្រវេសន៍លោក អ៊ុក ហៃសីឡា បានឲ្យដឹងថាក្រៅពីជនជាតិវៀតណាមក៏មានជាតិសាសន៍ផ្សេងៗទៀតដូចជា ចិន កាមេរូន នីហ្សេរីយ៉ា អង់គ្លេស បារាំង អ៊ីតាលី និងអាមេរិកជាដើម។ លោកថា៖ «ពួកគេទាំងនោះភាគច្រើនគឺមិនមានលិខិតឆ្លងដែនមិនមានប័ណ្ណការងារ និងស្នាក់នៅលើសទិដ្ឋាការកំណត់»។
ប្រធានផ្នែកស៊ើបអង្កេតនៃសមាគមសិទ្ធិមនុស្សអាដហុកលោក នី ចរិយា បានកោតសរសើរចំពោះសមត្ថកិច្ចក្នុងការពង្រឹងច្បាប់អន្តោប្រវេសន៍ឃាត់ខ្លួនជនបរទេសខុសច្បាប់នារយៈពេលចុងក្រោយនេះបើទោះបីជាតួលេខនេះបានបង្ហាញថាជនអន្តោប្រវេសន៍ច្រើនកំពុងស្នាក់នៅកម្ពុជាដោយខុសច្បាប់ក្ដី។
លោកថា៖ «ពីមុនយើងអត់ដឹងថាមានការចាប់ខ្លួន ឬបណ្តេញចេញច្បាស់លាស់ទេប៉ុន្តែឥឡូវយើងឃើញមានការបញ្ជាក់បូកសរុបច្បាស់លាស់តែអ្វីដែលជាចម្ងល់នោះតើអ្នកទាំងនោះត្រូវបានបញ្ជូនទៅវិញស្របតាមច្បាប់ នីតិវិធីឬយ៉ាងណា?»។
លោក នី ចរិយា បានបន្ថែមថា៖ «ការអនុវត្តច្បាប់អន្តោប្រវេសន៍មានសារៈសំខាន់ដើម្បីចៀសវាងកុំឲ្យប៉ះពាល់ដល់សិទ្ធិមនុស្សរបស់ជនបរទេសទាំងនោះផងដែរហើយតើកម្ពុជាគប្បីពិនិត្យមើលលំហូរចូលនៃអន្តោប្រវេសន៍ខុសច្បាប់តាមច្រកព្រំដែនគួរបន្តឹងបែបណា?»។
ទោះបីជាយ៉ាងណាលោក ខាត់ សារ៉ាត់ ប្រធានប៉ុស្តិ៍ច្រកអន្តរជាតិបាវិតបានឲ្យដឹងថាតាមការអនុវត្តច្បាប់អន្តោប្រវេសន៍លោកបានបង្កើនវិធានការរឹតត្បិតសម្រាប់ជនបរទេសចូលក្នុងកម្ពុជាខុសច្បាប់ដោយមានប្រសិទ្ធភាពរហូតពី ៨០ ទៅ ៩០ ភាគរយ។
លោកបានបញ្ជាក់ថា៖ «ខ្ញុំបានទប់ស្កាត់ជាបន្តបន្ទាប់ពោលគឺទាល់តែមាន Passport និងលិខិតស្នាមត្រឹមត្រូវទើបអនុញ្ញាតឲ្យចូលខ្ញុំមានកម្លាំងយាមកាម ២៤ ម៉ោងលើ ២៤ ម៉ោង។ ច្រកបាវិតគឺធំធេងប៉ុន្មានគីឡូដីក្រៅពីភូមិសាស្ត្ររបស់ខ្ញុំការពារគឺខេត្តនីមួយៗដែលមានច្រករបៀងត្រូវគ្រប់គ្រង។ ពួកវៀតណាមហ្នឹងភាគច្រើនវាចូលមកតាមច្រករបៀងនៃខេត្តនានាតាមវាលស្រែ ឬព្រៃជាដើម»។
បើតាមលោក អ៊ុក ហៃសីឡា នៅព្រឹកថ្ងៃព្រហស្បតិ៍ទី ០១ ខែតុលាម្សិលមិញនេះអគ្គនាយកដ្ឋានអន្តោប្រវេសន៍ក៏បានបណ្តេញនូវជនបរទេសចំនួន ៤១ នាក់ចេញពីប្រទេសកម្ពុជាតាមច្រកទ្វារអន្តរជាតិភ្នំពេញ និងច្រកអន្តរជាតិបាវិតផងដែរដែលក្នុងនោះម្នាក់ជាជនជាតិម៉ារ៉ុករីឯ ៤០ នាក់ទៀតជាជនជាតិវៀតណាម៕
