.jpg)
ជនរងគ្រោះក្នុងជម្លោះដីធ្លីនៅខេត្តព្រះសីហនុពីថ្ងៃទី ២១ ធ្នូ ឆ្នាំមុន។ ហុង មិនា
ព្រះសីហនុៈ គិតចាប់ពីខែមករា មកដល់ខែធ្នូ ឆ្នាំ ២០២០ ខេត្ដព្រះសីហនុ មានករណីវិវាទដីធ្លីកើតឡើងចំនួន ៨៨៦ ករណី ក្នុងនោះរដ្ឋបាលខេត្ដបានដោះស្រាយចំនួន ១៥ ករណី និងសម្របសម្រួលទៅភាគីវិវាទចំនួន ២១០ ករណី រីឯករណីផ្សេងទៀតបានធ្វើរបាយការណ៍បញ្ជូនទៅស្ថាប័ន និង ក្រសួងពាក់ព័ន្ធ។ នេះបើតាមមន្ដ្រីនាំពាក្យរដ្ឋបាលខេត្ដម្សិលមិញ។
លោក ឃាង ភារម្យ មន្ដ្រីនាំពាក្យរដ្ឋបាលខេត្ដព្រះសីហនុថ្លែងក្នុងសន្និសីទសារព័ត៌មានស្តីពី «វឌ្ឍនភាពមូលដ្ឋានឃុំ សង្កាត់ និងទិសដៅការងារបន្ត» រៀបចំ ដោយអង្គភាពអ្នកនាំពាក្យរាជរដ្ឋាភិបាលនៅទីស្ដីការគណៈរដ្ឋមន្ត្រីពីម្សិលមិញថា សំណុំរឿងដែលរដ្ឋបាលខេត្ដមិនដោះស្រាយ ព្រោះជាសំណុំរឿងផុត ឬមិនមែនជាសមត្ថកិច្ចរបស់រដ្ឋបាលខេត្ដ ដូច្នេះត្រូវបញ្ជូនសំណុំរឿងបន្តទៅស្ថាប័នពាក់ព័ន្ធដោះស្រាយវិញ។
លោកថា៖ «ការចូលទៅកាន់កាប់ រុករានទន្ទ្រានយកដីរបស់រដ្ឋនោះមិនមែនជាទំនាស់ដីធ្លីទេ។ កាលណាគូភាគីទៅបង្កើតក្រុមបង្កទំនាស់នៅលើដីរបស់រដ្ឋ ដូចជាដីព្រៃ និងដីអភិរក្ស គឺគូភាគីទាំង ២ ជាអ្នកខុសច្បាប់។ រដ្ឋបាលខេត្ដនឹងដកហូតយកដីវិញ ហើយនឹងផ្ដន្ទាទោសចំពោះអ្នកដែលទៅទន្ទ្រានយកដីធ្លីរបស់រដ្ឋ»។
លោក អ៊ី សុខឡេង អភិបាលក្រុងព្រះសីហនុថ្លែងក្នុងសន្និសីទនេះដែរថា រដ្ឋបាលក្រុងព្រះសីហនុក្នុងឆ្នាំ ២០២០ មានវិវាទដីធ្លីចំនួន ២១ ករណី។ ក្នុងនោះរដ្ឋបាលក្រុងបានដោះស្រាយបញ្ចប់ ចំនួន ២០ សំណុំរឿងនៅសល់ ១ ករណីកំពុងដោះស្រាយបញ្ចប់។
លោកថ្លែងថា៖ «អាជ្ញាធរគ្រប់ជាន់ថ្នាក់មានថ្នាក់ខេត្ត ថ្នាក់ក្រុង និងសង្កាត់ មិនមែនជាតុលាការទេ គឺគ្រាន់តែជាអ្នកសម្របសម្រួលលើគ្រប់វិវាទដីធ្លីដែលកើតមានឡើងដោយផ្អែកលើច្បាប់»។
លោកថ្លែងថា៖ «យើងព្យាយាមដោះស្រាយជូនប្រជាពលរដ្ឋដែលគាត់ជាម្ចាស់ដីពិតប្រាកដ។ ក្នុងនាមយើងជាអាជ្ញាធរយើងមិនលម្អៀងទេ។ ប៉ុន្ដែក្នុងករណីពលរដ្ឋទៅរំលោភបំពានដីរដ្ឋហើយ គាត់មកស្រែកថា អយុត្ដិធម៌ ហើយគាត់ប្រើល្បិចថែមទៀត»។
បើតាមលោក សុខឡេង កន្លងមក ករណីខ្លះមានជនខិលខូចបានប្រើល្បិចបង្កទំនាស់ដីធ្លីលើដីរបស់រដ្ឋ បង្កើតជម្លោះលើដីរដ្ឋហើយមកប្ដឹងអាជ្ញាធរឱ្យដោះស្រាយ ដើម្បីអាចទទួលបានដីរដ្ឋ។
លោកថា៖ «ករណីបែបនេះ គឺយើងមិនអាចដោះស្រាយឱ្យពលរដ្ឋក្រុមណាមួយឈ្នះបានទេ គឺយើងត្រូវតែដកហូតដីមកវិញព្រោះជាដីរដ្ឋ»។
ប៉ុន្តែពីម្សិលមិញក្រុមសង្គមស៊ីវិលចំនួន ៨៩ ចេញសេចក្តីថ្លែងការណ៍ថា៖ «យើងខ្ញុំជាក្រុមសង្គមស៊ីវិល សហជីព និងសហគមន៍សូមសម្ដែងការសោកស្ដាយ និងព្រួយបារម្ភយ៉ាងខ្លាំងចំពោះការចាប់ និងឃុំខ្លួន តំណាងសហគមន៍ដីធ្លីចំនួន ៣ នាក់ ក៏ដូចជាការចោទប្រកាន់ទៅលើតំណាងសហគមន៍ដីធ្លីជាង ៥០ នាក់ទៀត កាលពីពេលថ្មីៗកន្លងមកនេះ និងសូមស្នើសុំឱ្យតុលាការទម្លាក់ចោលការចោទប្រកាន់ និងដោះលែងអ្នកទាំងនោះឱ្យមានសេរីភាពវិញ»។
បើតាមលោកស្រី ជៀប សុធារី មន្ដ្រីសម្របសម្រួលសមាគមសិទ្ធិមនុស្ស អាដហុក ប្រចាំខេត្ដព្រះសីហនុ គឺ ករណីវិវាទដីធ្លីពីឆ្នាំមុនក្នុងខេត្ដព្រះសីហនុ កើតមានច្រើន។
លោកស្រីថា៖ «យើងសង្កេតឃើញអាជ្ញាធរមិនទាន់មានវិធានការសមស្របដើម្បីដោះស្រាយ ករណីវិវាទដីធ្លីរបស់ប្រជាពលរដ្ឋនៅខេត្ដព្រះសីហនុនៅឡើយទេ។ អាជ្ញាធរតែងប្រើយន្តការផ្លូវច្បាប់ចំពោះប្រជាពលរដ្ឋ និងមានការឃាត់ខ្លួនពលរដ្ឋមួយចំនួន»៕
