The Phnom Penh Post Search

Search form

Logo of Phnom Penh Post newspaper Phnom Penh Post - ២២៥ គ្រួសារ​ស្នើ​កាត់​ដី​ពួកគេ​ចេញ​ពី​​តំបន់​អភិវឌ្ឍន៍​ទីក្រុង​រណប​ជ្រោយ​ចង្វារ




២២៥ គ្រួសារ​ស្នើ​កាត់​ដី​ពួកគេ​ចេញ​ពី​​តំបន់​អភិវឌ្ឍន៍​ទីក្រុង​រណប​ជ្រោយ​ចង្វារ

Content image - Phnom Penh Post
ក្រុម​ហ៊ុន​ OCIC បូម​ខ្សាច់​​បង្ហៀ​រ​មក​លុប​លើដី​​ប្រ​ជាពលរដ្ឋ​នៅភូមិ​កៀន​ឃ្លាំង។ ម៉ៃ វីរៈ

២២៥ គ្រួសារ​ស្នើ​កាត់​ដី​ពួកគេ​ចេញ​ពី​​តំបន់​អភិវឌ្ឍន៍​ទីក្រុង​រណប​ជ្រោយ​ចង្វារ

ភ្នំពេញៈ ប្រជាពលរដ្ឋ​ចំនួន​ ២២៥ គ្រួសារ​ ដែល​រស់​នៅ​មាន​ដី​ស្រែ​ចំការ​និង​ភូមិ​ឋាន​ នៅ​ក្រោយ​តំបន់ ​១០០ ម៉ែត្រ​ពី​ច្រាំង​ទន្លេសាប និង​អ័ក្សផ្លូវ​ ៦ អា អំពាវនាវ​សុំ​ឲ្យ​រាជ​រដ្ឋាភិបាល​ធ្វើ​ការ​កាត់ដី​ភូមិ​ចេញ​ពី​ តំបន់​អភិវឌ្ឍន៍​ទីក្រុង​រណប​ជ្រោយ​ចង្វារ និង​ចេញ​ប័ណ្ណ​កម្មសិទ្ធិ​ដីធ្លី​ជូន​ពលរដ្ឋ។

ការ​អំពាវនាវ​នេះ បាន​ធ្វើ​ឡើង​ស្រប​ពេល​ដែល​លោក​នាយក​រដ្ឋមន្ត្រី​ ហ៊ុន សែន មាន​គម្រោង​បើក​សម្ពោធ​ស្ពាន​មិត្ត​ភាព ​កម្ពុជា ចិន(ស្ពាន​ជ្រោយ​ចង្វារ ២) នៅ​ថ្ងៃ​ស្អែក ទី ​២២ តុលា​នេះ។

ប្រជាពលរដ្ឋ​ទាំង​នេះ បាន​សរសេរ​ក្នុង​លិខិត​ស្នើ​សុំ​របស់​ពួក​គេ ចុះ​ថ្ងៃ​ទី​ ១៨ តុលា គោរព​ជូន​លោក ​ហ៊ុន សែន​ ដោយ​រៀប​រាប់​ថា​ ការ​ស្នើ​សុំ​កាត់ដី​ពី​តំបន់​ជ្រោយ​ចង្វារ​ និង​ចេញ​ប័ណ្ណ​កម្មសិទ្ធិ​ គឺ ​«ដើម្បី​ចៀសវាង​ការ​រំលោភ​ដី​ពី​ក្រុមហ៊ុន​ ឬ ​អ្នក​មាន​អំណាច»។

លិខិត​ដែល​មាន​តំណាង​ពលរដ្ឋ​ចំនួន ​៦ រូប​របស់​ពលរដ្ឋ​ ២២៥ គ្រួសារ​​ ស្ថិត​ក្នុង​សង្កាត់​ជ្រោយ​ចង្វារ​ សង្កាត់​ព្រែក​តាសេក​ សង្កាត់ ​ព្រែកលៀប សរសេរ​ថា ៖ «ដីភូមិឋាន​របស់​យើង​ខ្ញុំ មាន​បង្កាន់​ដៃ​ទទួល​ពាក្យ​កាន់​កាប់​ដី លិខិត​ផ្ទេរ​សិទ្ធិ​កាន់​កាប់​ដី និង​លិខិត​បញ្ជាក់​ការ​បង់​ប្រាក់​ពន្ធត្រឹម​ត្រូវ»។

ពួកគេ​អះអាង​ថា ​បាន​រស់​នៅ​ទី​នោះ​អស់​ពេល​ជាង​ ៣០ ឆ្នាំ គឺក្រោយ​ឆ្នាំ​១៩៧៩ មក​ម្ល៉េះ ប៉ុន្តែ​បែរ​ជា​ត្រូវ​បាន​ក្រុមហ៊ុន ​OCIC ទទួល​សិទ្ធិ​យក​ទៅ​អភិវឌ្ឍ៍​ជា​ទីក្រុង​រណប​ទៅ​វិញ ដែល​ធ្វើ​ឲ្យ​ប៉ះពាល់​ភូមិ​ឋាន​ និង​ដីស្រែ​ចំការ​របស់​គាត់ ហើយ​បែរ​ជា​អាជ្ញាធរ​រាជធានី​ បាន​កំណត់​តម្លៃ​គោល​នយោបាយ​ ១៥ ដុល្លារ​ក្នុង​មួយ​ម៉ែត្រ​ការ៉េ​ ឬ​ទុកដី​ ១០ ភាគ​រយ​នៃ​ទំហំដី​ជូន​ម្ចាស់​ដី​ទៅ​វិញ៕

អត្ថបទគួរចាប់អារម្មណ៍