.jpg)
កូនប្រុសដែលអារកឪពុកបង្កើតនៅថ្ងៃទី ៣១ មីនា នៅស្រុកមុខកំពូល ខេត្តកណ្តាល។ រូបថត នគរបាល
កណ្តាល/កោះកុងៈ បុរស ២ នាក់ ដែលម្នាក់អារកឪពុកបង្កើតរបួសធ្ងន់នៅស្រុកមុខកំពូល ខេត្តកណ្តាលត្រូវបានបញ្ជូនទៅសាលាដំបូងខេត្ត និងម្នាក់ទៀតវាយឪពុកបង្កើតរបួសធ្ងន់នៅស្រុកស្រែអំបិល ខេត្តកោះកុងនោះត្រូវបានអយ្យការអមសាលាដំបូងខេត្តចោទប្រកាន់ពីបទហិង្សាដោយចេតនាមានស្ថានទម្ងន់ទោស និងបញ្ជូនទៅចៅក្រមស៊ើបសួរដើម្បីបន្តនីតិវិធី។
លោក អ៊ិន សុវណ្ណធានី អ្នកនាំពាក្យអយ្យការអមសាលាដំបូងខេត្តកោះកុងប្រាប់កាលពីថ្ងៃទី ១ មេសា ថាជនសង្ស័យវាយឪពុកនោះឈ្មោះ ជិន ហៃ ភេទប្រុស អាយុ ២៣ ឆ្នាំ។ ជននេះត្រូវបានចោទប្រកាន់ហើយពីបទហិង្សាដោយចេតនាមានស្ថានទម្ងន់ទោសតាមបញ្ញត្តិមាត្រា ២១៨ នៃក្រមព្រហ្មទណ្ឌ និងត្រូវបានបញ្ជូនទៅចៅក្រមស៊ើបសួររួចហើយដែរ។
បើតាមលោក កែវ បូរី អធិការរងនគរបាលស្រុកស្រែអំបិលប្រាប់ដែរថា ជនរងគ្រោះជាឪពុកឈ្មោះ ណិន ជិន អាយុ ៥៣ ឆ្នាំមានលំនៅបច្ចុប្បន្នភូមិភ្នំស្រឡៅ ឃុំជ្រោយស្វាយ ស្រុកស្រែអំបិល ខេត្តកោះកុង។ រីឯជនសង្ស័យជាកូនបង្កើតឈ្មោះ ជិន ហៃ ក៏រស់នៅជាមួយជនរងគ្រោះដែរ។ ជនសង្ស័យបានប្រើហិង្សាលើឪពុកបង្កើតនាថ្ងៃទី ៣១ មីនា។
ក្រោយការឃាត់ខ្លួន សមត្ថកិច្ចបានចាប់បញ្ជូនជនសង្ស័យទៅអធិការដ្ឋាននគរបាលស្រុកស្រែអំបិល ហើយពិនិត្យមើលទឹកនោមគ្មានសារធាតុញៀនទេ ប៉ុន្តែជនសង្ស័យជាមនុស្សគ្មានការងារធ្វើ និងក៏ជាមនុស្សប្រមឹកដែរ។
លោកបញ្ជាក់ថា៖ «ជនរងគ្រោះត្រូវរបួសធ្ងន់ដែរទើបបានក្រុមគ្រួសារបញ្ជូនគាត់ទៅដេកពេទ្យ»។
លោក កែវ បូរី ប្រាប់តាមសម្តីសាច់ញាតិរបស់ជនរងគ្រោះថាមុនពេលកើតហេតុជនសង្ស័យបានចេញពីផ្ទះទៅផឹកស្រាហើយពេលត្រឡប់មកវិញក៏ត្រូវជនរងគ្រោះដែលជាឪពុកស្តីបន្ទោស។ គ្រានោះស្រាប់តែជនសង្ស័យយកដំបងឫស្សីទំហំប៉ុនកដៃក្មេងវាយលើឪពុកបង្កើតរបស់ខ្លួនបណ្ដាលឲ្យរងរបួសកំភួនដៃខាងឆ្វេងចំក្រោមឆ្អឹងជំនីរខាងឆ្វេងជាដំណំ។ ក្រោយបង្កហេតុជនសង្ស័យមិនបានរត់គេចខ្លួនទេហើយក្រុមគ្រួសារបានរាយការណ៍ប្រាប់ឲ្យសមត្ថកិច្ចចុះឃាត់ខ្លួនតែម្តងទៅ។ លោកថា៖ «សាច់ញាតិជនសង្ស័យបានប្តឹងសមត្ថកិច្ចឲ្យឃាត់ខ្លួនគាត់ព្រោះគាត់តែងបង្កហិង្សាក្នុងគ្រួសារមិនលស់ថ្ងៃទេ»។
ដោយឡែក ១ ករណីទៀតដែលកូនប្រើហិង្សាលើឪពុកបង្កើតនេះដែរ លោកចៅ វុទ្ធី ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកណ្តាលប្រាប់ពីម្សិលមិញថា ករណីកូនអារកឪពុកបង្កើតនៅស្រុកមុខកំពូលកាលពីថ្ងៃទី ៣១ មីនា ជនសង្ស័យត្រូវបានបញ្ជូនទៅសាលាដំបូងខេត្តកណ្តាលពីម្សិលមិញរួចហើយដែរ។
លោក ឯក លន់ អធិការនគរបាលស្រុកមុខកំពូលប្រាប់កាលពីថ្ងៃទី ១ មេសា ថា ជនសង្ស័យឈ្មោះ ហ៊ីម យ៉ានី ភេទប្រុសអាយុ ២៧ ឆ្នាំជនជាតិខ្មែរអ៊ិស្លាមបានយកកាំបិតប៉័ងតោអារកឪពុកបង្កើតរបស់ខ្លួនឈ្មោះ សុះ ហ៊ីម អាយុ ៧០ ឆ្នាំបណ្តាលឲ្យរងរបួសជាទម្ងន់ ហើយត្រូវបានក្រុមគ្រួសារដឹកទៅសង្គ្រោះនៅគ្លីនិកឯកជន ២៤ ម៉ោងមុខផ្សារព្រែកអញ្ចាញ។ លោកប្រាប់ថា៖ «របួសគាត់ត្រូវអារករយះជ្រៅជិតដាច់សរសៃបំពង់កដែរហ្នឹង»។
លោក ឯក លន់ ឲ្យដឹងតាមសម្តីសាច់ញាតិជនរងគ្រោះថា ជនសង្ស័យម្នាក់នោះជាមនុស្សញៀនថ្នាំញៀនដែលស្ទើរតែបាត់បង់ស្មារតីទៅហើយ។ ដោយសារញៀនថ្នាំខ្លាំងបែបនេះ ទើបក្រុមគ្រួសារចាប់បញ្ជូនទៅមណ្ឌលបន្សាបគ្រឿងញៀននៅម្ដុំផ្សារដីហុយ រាជធានីភ្នំពេញកាលពីខែធ្នូ ឆ្នាំ ២០១៩ រហូតដល់ខែកុម្ភៈ ឆ្នាំ ២០២០ ទើបក្រុមគ្រួសារទៅយកជនសង្ស័យត្រឡប់មកផ្ទះវិញ។
លុះនៅថ្ងៃកើតហេតុវេលាម៉ោងជាង ៤ រសៀលថ្ងៃទី ១ មេសា ខណៈជនរងគ្រោះកំពុងសម្រាន្តលក់ស្រាប់តែជនសង្ស័យអារកគាត់តែម្តង។ តាមការសាកសួររបស់សមត្ថកិច្ច ជនសង្ស័យបានសារភាពថា ខ្លួនពិតជាបានអារកឪពុករបស់ខ្លួនមែន ប៉ុន្តែពេលនោះខ្លួនមិនដឹងថា អារកឪពុករបស់ខ្លួនទេ។
លោក លន់ បានប្រាប់ថា៖ «ករណីនេះខ្ញុំបានធ្វើកំណត់ហេតុដោយចោទបឋមថា ប៉ុនប៉ងមនុស្សឃាត»៕
