.jpg)
មន្ត្រីនគរបាល ចុះពន្យល់អប់រំអ្នកបើកបរម៉ូតូពីការពាក់មួកសុវត្ថិភាព។ ហ្វេសប៊ុក
ភ្នំពេញៈ នៅក្នុងយុទ្ធនាការចុះបង្ក្រាបអ្នកបើកបរម៉ូតូ និងអ្នករួមដំណើរ អត់ពាក់មួយសុវត្ថិភាពរយៈពេល ២ ថ្ងៃ ចាប់ពីថ្ងៃចន្ទដល់ថ្ងៃអង្គារម្សិលមិញ កម្លាំងនគរបាលចរាចរណ៍រាជធានីភ្នំពេញ បានចាប់ឃាត់អ្នកបើកបរ និងអ្នករួមដំណើរដែលមិនពាក់មួកសុវត្ថិភាពបាន ១៣០៥ នាក់ ដែលនេះគឺជាផ្នែកមួយនៃការរឹតបន្តឹងច្បាប់ចរាចរណ៍ជាថ្មីទៀតក្នុងរាជធានីភ្នំពេញ។
នៅមុនពេលចេញដំណើរទៅកាន់គោលដៅនីមួយៗរបស់ខ្លួន កាលពីព្រឹកថ្ងៃចន្ទ លោក ស ថេត ស្នងការនគរបាលរាជធានីភ្នំពេញ បានប្រាប់ឲ្យកងកម្លាំងនគរបាលទាំងអស់ ក្នុងរាជធានីភ្នំពេញ ត្រូវធ្វើជាគំរូល្អដល់ប្រជាពលរដ្ឋ គឺត្រូវបើកបរគោរពច្បាប់ចរាចរណ៍ ពិសេសត្រូវពាក់មួកសុវត្ថិភាពជានិច្ចនៅពេលបើកបរម៉ូតូ។
លោកថ្លែងថា៖ «ចាប់ពីថ្ងៃនេះ (ថ្ងៃចន្ទ) តទៅ យើងនឹងចាប់ផ្ដើមយុទ្ធនាការរឹតបន្ដឹងច្បាប់ចរាចរណ៍ផ្លូវគោក ជាពិសេសទៅលើអ្នកបើកបរម៉ូតូ និងអ្នករួមដំណើរ ដែលមិនពាក់មួកសុវត្ថិភាព ព្រោះករណីស្លាប់ដោយសារការមិនពាក់មួកសុវត្ថិភាព គឺមានចំនួនរហូតដល់ទៅជាង ៨០ ភាគរយ»។
លោកបានប្រាប់ឲ្យកម្លាំងនគរបាលចរាចរណ៍ ដែលត្រូវចុះបំពេញតួនាទី នៅតាមគោលដៅ គឺត្រូវពង្រឹងការអនុវត្តច្បាប់ឲ្យបានតឹងរឹុង ដោយត្រូវចាប់ឃាត់ទាំងអស់ ចំពោះអ្នកបើកបរម៉ូតូ និងអ្នករួមដំណើរទាំងឡាយណា ដែលមិនពាក់មួកសុវត្ថិភាព។
លោកបញ្ជាក់ថា៖ «អ្នកបើកបរម៉ូតូនិងអ្នករួមដំណើរ ដែលមិនពាក់មួកសុវត្ថិភាព ត្រូវឃាត់ធ្វើការអប់រំ រហូតទាល់តែពួកគាត់មានមួកសុវត្ថិភាពមកពាក់ ទើបអនុញ្ញាតឲ្យបន្តដំណើរទៅមុខទៀត បើទោះបីជាពួកគាត់ជាសមត្ថកិច្ចកងកម្លាំង ឬមន្ត្រីរាជការស៊ីវិលក៏ដោយ»។
លោក សែម គន្ធា ប្រធានការិយាល័យចរាចរណ៍ផ្លូវគោករាជធានីភ្នំពេញ បានប្រាប់ភ្នំពេញប៉ុស្តិ៍ថា នៅក្នុងយុទ្ធនាការរឹតបន្តឹងច្បាប់ចរាចរណ៍ក្នុងរាជធានីភ្នំពេញនេះ លោកបានកំណត់យកគោលដៅសំខាន់ធំៗចំនួន ៤ កន្លែងរួម មានចំណុចរង្វង់មូលកួចកាណុងនៅគល់ស្ពានជ្រោយចង្វារ កំណាត់ផ្លូវសហព័ន្ធរុស្ស៊ីត្រង់ចំណុចផ្លូវកែងខាងកើតទីស្តីការគណៈរដ្ឋមន្ត្រី ស្តុបបូកគោ និង កែងផ្លូវព្រះនរោត្តម និងផ្លូវម៉ៅសេទុង។
ក្រៅពីគោលដៅធំៗទាំង ៤ នេះ កម្លាំងនគរបាលរាជធានី ក៏បានដាក់ពង្រាយនៅលើកំណាត់ផ្លូវមួយចំនួនទៀតក្នុងរាជធានីភ្នំពេញផងដែរដោយចាប់ផ្ដើមពីម៉ោង ៨ ព្រឹក រហូតដល់ម៉ោង ៨ យប់។
លោកបញ្ជាក់ថា៖ «ក្នុងប្រតិបត្តិការ (ក្នុង ១ ថ្ងៃ) នេះ កម្លាំងសមត្ថកិច្ចនគរបាលរាជធានីភ្នំពេញយើង បានរកឃើញអ្នកបើកបរម៉ូតូ មិនពាក់មួកសុវត្ថិភាពចំនួន ២៩៦ នាក់ និងអ្នករួមដំណើរដែលមិនពាក់មួកសុវត្ថិភាពចំនួន ២៤៩ នាក់។ យើងមិនបានផាកពិន័យពួកគាត់ទេ តែយើងបានអប់រំ និងណែនាំឲ្យពួកគាត់ រកទិញមួកសុវត្ថិភាពមកពាក់ទាំងអស់គ្នា ទើបយើងអនុញ្ញាតឲ្យពួកគាត់ធ្វើដំណើរទៅមុខទៀត»។
ចំណាត់ការរឹតបន្តឹងជាថ្មីទៀតនេះ បានទទួលការគាំទ្រយ៉ាងពេញទំហឹងពីអង្គការសង្គមស៊ីវិល ដែលធ្វើការពាក់ព័ន្ធការងារអប់រំច្បាប់ចរាចរណ៍នៅក្នុងប្រទេសកម្ពុជា។
លោក គង់ រតនៈ នាយកស្ដីទី វិទ្យាស្ថានសុវត្ថិភាពចរាចរណ៍ផ្លូវគោក បាននិយាយថា វាល្មមដល់ពេលហើយ ដែលប្រជាពលរដ្ឋខ្មែរត្រូវមានការយល់ដឹងអំពីច្បាប់ និងត្រូវតែគោរពអនុវត្តច្បាប់ទាំងអស់គ្នា ពោលគឺមិនមែនតែច្បាប់ចរាចរណ៍មួយទេ គឺគ្រប់ច្បាប់ និងកតិកាសញ្ញា និងអនុសញ្ញាទាំងអស់ដែលកម្ពុជាមាន ពិសេសច្បាប់រដ្ឋធម្មនុញ្ញ។
លោកបានបញ្ជាក់ថា៖ «ការគោរពអនុវត្តច្បាប់ ធ្វើឲ្យយើងមានភាពថ្លៃថ្នូរ និងធ្វើឲ្យសង្គមជាតិយើងមានសុខសន្តិភាព និងការអភិវឌ្ឍ»៕
