.jpg)
ក្រសួងសុខាភិបាលប្រកាសពីអ្នកជំងឺទទួលមរណៈភាព ដោយសារជំងឺកូវីដ ១៩ នៅថ្ងៃនេះចំនួន ៣ នាក់។ ហេង ជីវ័ន
ភ្នំពេញ៖ អ្នកជំងឺជាជនជាតិខ្មែរចំនួន ៣ នាក់ទៀត បានទទួលមរណភាពដោយសារជំងឺកូវីដ ១៩ កាលពីថ្ងៃទី ២៦ ខែមេសា ដែលធ្វើឱ្យចំនួនអ្នកស្លាប់នឹងជំងឺឆ្លងនេះ បានកើនឡើងដល់ជាង ៨០ នាក់ហើយ ដែលសុទ្ធតែជាអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ ខណៈរកឃើញអ្នកឆ្លងថ្មីចំនួន ៥០៨ នាក់បន្ថែមទៀត។ នេះបើតាមការប្រកាសរបស់ក្រសួងសុខាភិបាលនៅថ្ងៃអង្គារ ទី ២៧ នេះ។
ជាមួយនឹងការរកឃើញអ្នកឆ្លងជំងឺកូវីដចំនួន ៥០៨ នាក់បន្ថែមទៀត ក្នុងព្រឹត្តិការណ៍សហគមន៍នេះ ក៏មានអ្នកជាសះស្បើយចំនួន ១២៧ នាក់ផងដែរ។
យោងតាមសេចក្តីប្រកាសដដែលបានឱ្យដឹងទៀតថា អ្នកដែលរកឃើញឆ្លងថ្មីនេះ មាននៅរាជធានីភ្នំពេញចំនួន ២៤៨ នាក់ ខេត្តកណ្ដាលចំនួន ១៣៥ នាក់ ខេត្តបន្ទាយមានជ័យចំនួន ៧៣ នាក់ ខេត្តព្រះសីហនុចំនួន ៤៧ នាក់ ខេត្តតាកែវ ២ នាក់ ខេត្តព្រៃវែង ២ នាក់ និងខេត្តកំពង់ស្ពឺចំនួន ០១ នាក់ផងដែរ។
គិតត្រឹមព្រឹក ថ្ងៃទី ២៧ ខែ មេសា ឆ្នាំ ២០២១ ចំនួនអ្នកឆ្លងវីរុសកូវីដ ១៩ សរុបទូទាំងប្រទេសកម្ពុជា មានចំនួន ១១ ០៦៣ នាក់ អ្នកជាសះស្បើយចំនួន ៣ ៧០៤ នាក់ អ្នកកំពុងព្យាបាលចំនួន ៧ ២៧០ នាក់ និងអ្នកស្លាប់ចំនួន ៨២ នាក់។
ករណីស្លាប់ថ្មីចំនួន ៣ នាក់នេះ មានស្រ្តីអាយុ ៣៩ ឆ្នាំ អាយុ ៥២ ឆ្នាំ និងបុរសអាយុ ៧៧ ឆ្នាំ ដែលអ្នកទាំងបីនាក់នេះ បានស្លាប់នៅមន្ទីរពេទ្យហ្លួងម៉ែ មន្ទីរពេទ្យមិត្តភាពខ្មែរ-សូវៀត និងនៅខេត្តព្រះសីហនុ៕
