The Phnom Penh Post Search

Search form




Logo of Phnom Penh Post newspaper Phnom Penh Post - ៥៤ ​នាក់​ក្នុង​ចំណោម​ ៦២ ​នាក់​មាន​ផ្ទុក​សារធាតុញៀន

៥៤ ​នាក់​ក្នុង​ចំណោម​ ៦២ ​នាក់​មាន​ផ្ទុក​សារធាតុញៀន

សមត្ថកិច្ច​បង្ហាញ​មុខ​ និង​អត្តសញ្ញាណ​ជនសង្ស័យ​។
សមត្ថកិច្ច​បង្ហាញ​មុខ​ និង​អត្តសញ្ញាណ​ជនសង្ស័យ​។ រូបថត សហការី

៥៤ ​នាក់​ក្នុង​ចំណោម​ ៦២ ​នាក់​មាន​ផ្ទុក​សារធាតុញៀន

ភ្នំពេញៈ ក្រោយ​ពី​បាន​ឃាត់​ខ្លួន​ជនសង្ស័យ ៦២ នាក់​ក្នុង​ប្រតិបត្តិ​ការ​បង្ក្រាប​បទល្មើស​ប្រើប្រាស់ និង​ជួញដូរ​គ្រឿងញៀន​ក្នុង​ភូមិ​ត្រពាំង​ឈូក សង្កាត់​ទឹកថ្លា ខណ្ឌ​សែនសុខ ដែល​ជា​ទីតាំង​អនាធិបតេយ្យ​មួយ​ក្នុង​រាជធានី​ភ្នំពេញ​សមត្ថកិច្ច​បាន​រកឃើញ​ថា​មនុស្ស ៥៤ នាក់​មាន​ផ្ទុក​សារជាតិ​គ្រឿង​ញៀន​ក្នុង​នោះ​ម្នាក់​ជា​អនីតិជន​អាយុ ១៤ ឆ្នាំ។

ស្នងការ​រង​រាជធានី ​ភ្នំពេញ ​ទទួល​បន្ទុក​បង្ក្រាប​បទល្មើស​គ្រឿងញៀន ​លោក ប៊ន សំអាត បាន​ឲ្យ​ដឹង​ថា​ប្រតិបត្តិការ​ឆ្មក់​បង្ក្រាប​ក្រុម​ជួញដូរ ចែកចាយ និង​ប្រើប្រាស់​គ្រឿងញៀន​ក្នុង​តំបន់​នេះ​ធ្វើ​ឡើង​កាលពី​ថ្ងៃ​សៅរ៍​ទី ១៩ ខែ​កញ្ញា​វេលា​ម៉ោង​​ជិត ៣ រសៀល ដោយ​ឃាត់​ខ្លួន​ជនសង្ស័យ​បាន​សរុប ៦២ នាក់ បញ្ជូន​ទៅកាន់​អធិការដ្ឋាន​នគរបាល​ខណ្ឌ​សែនសុខ​ភ្លាមៗ​ដើម្បី​សួរនាំ។

លោក​ថា​៖ «ប្រតិបត្តិ​ការ​បង្ក្រាប​នេះ​សមត្ថកិច្ច​ក៏​រឹបអូស​បាន​នូវ​ឧបករណ៍​ប្រើប្រាស់​សម្រាប់​ជក់​គ្រឿង​ញៀន ដាវ កាំបិត និង​លុយ​មួយ​ចំនួន​ផង​ដែរ»។

លោក ប៊ន សំអាត បាន​បន្ត​ថា​ក្រោយ​ការ​ធ្វើ​ពិសោធន៍​ទឹកនោម​សមត្ថកិច្ច​រកឃើញ​ថា​មនុស្ស ៥៤ នាក់​មាន​ផ្ទុក​សារជាតិ​គ្រឿង​ញៀន​ប្រភេទ​ម៉ា​ទឹកកក​ហើយ​ក្នុង​នោះ​មាន​ក្មេង​ម្នាក់​អាយុ ១៤ ឆ្នាំ​ផង​ដែរ។

លោក​ថា៖ «សម្រាប់​ក្មេង​អាយុ ១៤ ឆ្នាំ​នោះ និង​អ្នក​សេសសល់​គ្មាន​សារជាតិ​គ្រឿង​ញៀន​គឺ​ត្រូវ​បាន​បញ្ជូន​ត្រឡប់​ទៅ​ឲ្យ​អាណាព្យាបាល​ដើម្បី​បញ្ជូន​ទៅ​​មណ្ឌល​អប់រំ​ចំណែក​អ្នក​ទាំង ៥៣ នាក់​ទៀត​គឺ​ត្រូវ​បាន​កសាង​សំណុំ​រឿង​បញ្ជូន​ទៅ​តុលាការ​ព្រោះ​ពួកគេ​ទាំង​នោះ​ក៏​ជា​​មុខ​សញ្ញា​ក្រុម​ក្មេងពាល ចោរឆក់ ចោរគាស់​ផ្ទះ និង​ពួក​កាប់​ចាក់​គ្នា​ផង​ដែរ»។

លោក​ សំអាត បាន​ហៅ​សកម្មភាព​អនាធិបតេយ្យ​ការ​ចែក​ចាយ និង​ការ​ប្រើប្រាស់​គ្រឿង​ញៀន​នៅក្នុង​ភូមិ​ត្រពាំងឈូក​នេះ​ថា​មាន​លក្ខណៈ​ច្រើន​បែប និង​មិន​ចេះចប់​ដោយ​លោក​បាន​ប្រដូច​កិច្ចការ​នេះ​ទៅ​នឹង​ភ្លៀង​រលឹម​ចាប់​មិន​ចេះ​​អស់។ ជាក់ស្តែង​កាលពី​ថ្ងៃ​ទី ២១ ខែ​សីហា​ជនសង្ស័យ ៨៨ នាក់​ត្រូវ​បាន​សមត្ថកិច្ច​ឃាត់​ខ្លួន​បាន​ក្នុង​ប្រតិបត្តិការ​ឆ្មក់​បង្ក្រាប​ការ​ចែកចាយ និង​ប្រើប្រាស់​គ្រឿងញៀន​ក្នុង​តំបន់​នេះ។

បើ​តាម​លោក ប៊ន សំអាត ករណី​អ្នក​ទាំង ៨៨ នាក់​នោះ​មាន​ខ្លះ​ត្រូវ​បាន​បញ្ជូន​ទៅ​កាន់​មណ្ឌល​អប់រំ​កែប្រែ​ឯ​ខ្លះ​ទៀត​ត្រូវ​បាន​ផ្តន្ទាទោស​ជាប់​ពន្ធនាគារ​ព្រៃស​ជាដើម។

យោង​តាម​របាយការណ៍​របស់​អគ្គស្នងការ​នគរបាល​ជាតិ​រយៈពេល ៦ ខែ​ដើម​ឆ្នាំ ២០១៥ នេះ​នគរបាល​បាន​ចាប់​ខ្លួន​មនុស្ស​ចំនួន ១៩៥៩ ​នាក់​ពាក់ព័ន្ធ​នឹង​គ្រឿងញៀន​ដែល​បង្ក្រាប​បាន​ចំនួន ៩៩៨ ​ករណី​។

គ្រឿង​ញៀន​កំពុង​តែ​ក្លាយ​ទៅ​ជា​ក្តីកង្វល់​ដ៏ធំ​មួយ​នៅក្នុង​សង្គម​ខ្មែរ​បច្ចុប្បន្ន​ខណៈ​ដែល​ក្មេងៗ​ទើប​តែ​មាន​អាយុ​ត្រឹម​ជាង ១០ ឆ្នាំ​ក៏​អាច​មាន​សមត្ថភាព​ស្វែងរក​ទិញ​គ្រឿងញៀន​យក​មក​​ប្រមូល​ផ្តុំ​គ្នា​ជក់​បាន​ដែរ​នោះ​៕

អត្ថបទគួរចាប់អារម្មណ៍