ភ្នំពេញៈ នៅក្នុងអំឡុងឆមាសទី១ ឆ្នាំ ២០១៩ នេះ កងទ័ពកម្ពុជា បានទប់ស្កាត់ និងបង្ក្រាបបទល្មើសផ្សេងៗនៅតាមតំបន់ព្រំដែនបានជិត ៣ ពាន់ករណី ក្នុងនោះភាគច្រើន គឺបទល្មើសព្រៃឈើ និងឆ្លងដែនខុសច្បាប់។ នេះបើតាម នាយឧត្តមសេនីយ៍ ឈុំ សុជាតិ អនុរដ្ឋលេខាធិការ និងជាអ្នកនាំពាក្យក្រសួងការពារជាតិ។
ជាមួយគ្នានេះ លោក សុជាតិ ក៏ឲ្យដឹងផងដែរថា ប្រទេស កម្ពុជា បានបន្តកិច្ចសហការល្អជាមួយប្រទេសជិតខាង និងបានដោះស្រាយបញ្ហាផ្សេងៗដោយសន្តិវិធី។ ក្រសួងការពារជាតិ កាលពីម្សិលមិញ បានរៀបចំកិច្ចប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅបន្តអនុវត្តការងារសម្រាប់ឆមាសទី២ ឆ្នាំ ២០១៩ ដែលធ្វើឡើង ក្រោមអធិបតីភាពលោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ។
លោក ឈុំ សុជាតិ បានប្រាប់ភ្នំពេញប៉ុស្តិ៍បន្ទាប់ពីកិច្ចប្រជុំនេះថា ក្នុងឆ្នាំ ២០១៩ ក្នុងរយៈពេលឆមាសទី១ នេះ កងយោធពលខេមរភូមិន្ទ បានទប់ស្កាត់ និងបង្ក្រាបបទល្មើសផ្សេងៗសរុបបានចំនួន ២ ៩៨១ ករណី នៅតាមខ្សែបន្ទាត់ព្រំដែន ក្នុងនោះនៅតាមបណ្តោយព្រំដែនកម្ពុជា-ថៃ មានចំនួន ១ ២៨៩ ករណី ព្រំដែនវៀតណាមមានចំនួន ១ ១៧៩ ករណី និងព្រំដែនកម្ពុជា-ឡាវ មានចំនួន ៥១៣ ករណី។
លោក សុជាតិ បញ្ជាក់ដូច្នេះថា៖ «សម្រាប់ឆមាសទី១ ឆ្នាំ ២០១៩ នេះកងយោធពលខេមរភូមិន្ទបានបន្តពង្រឹងការការពារជាតិលើគ្រប់វិស័យ នៅតាមតំបន់ព្រំដែនដោយធ្វើល្បាតជាប្រចាំ ដើម្បីតាមដានត្រួត ពិនិត្យគ្រប់គ្រងសភាពការណ៍ និងភូមិសាស្ត្រទទួលខុសត្រូវ និងចូលរួមទប់ស្កាត់បទល្មើសគ្រប់ប្រភេទ និងសកម្មភាពឆ្លងដែនខុសច្បាប់ ព្រមទាំងបានបន្តកិច្ចសហប្រតិបត្តិការល្អ ជាមួយប្រទេសជិតខាង ដោយដោះស្រាយបញ្ហាផ្សេងៗ ដែលកើតឡើងដោយសន្តិវិធី»។
លោកគូសបញ្ជាក់ថា បទល្មើសជិត ៣ ពាន់ករណី ដែលកងទ័ពកម្ពុជាបានទប់ស្កាត់ និងបង្ក្រាបនៅតាមតំបន់ព្រំដែន ភាគច្រើន គឺជា «បទល្មើសកាប់ឈើខុសច្បាប់ និងឆ្លងដែនខុសច្បាប់»។
លោកមានប្រសាសន៍ថា៖ «ស្ថានភាពសន្តិសុខនៅតាមព្រំដែន នៅដើមឆមាសនេះ មានលក្ខណៈល្អប្រសើរ និងរីកចម្រើនជាងឆ្នាំមុន (២០១៨) ដោយសារតែអាជ្ញាធរយើង បានសហការគ្នាបានល្អជាមួយប្រជាពលរដ្ឋ និងយើងមានការជួបជុំគ្នាញឹកញាប់ជាមួយកម្លាំងនៅតាមបណ្តោយព្រំដែន»។
យ៉ាងណាក្តី លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក បានលើកឡើងថា បទល្មើស កាប់ព្រៃឈើខុសច្បាប់ និងឆ្លងដែនខុសច្បាប់ដ៏ច្រើននេះ បានបង្ហាញថា ការអនុវត្តច្បាប់របស់សមត្ថកិច្ចនៅតាមបណ្តោយព្រំដែននៅមានកម្រិត និងមានភាពធូររលុង ដែលបណ្តាលឲ្យជនល្មើសនៅបន្តធ្វើសកម្មភាពកាប់ព្រៃឈើ និងឆ្លងដែនខុសច្បាប់។ លោកបន្តថា រាជរដ្ឋាភិបាល ត្រូវតែរឹតបន្តឹងការអនុវត្តច្បាប់ឲ្យបានហ្មត់ចត់ចំពោះអ្នកដែលបានរំលោភបំពានច្បាប់។
លោកបញ្ជាក់ថា៖ «ការទទួលខុសត្រូវរបស់សមត្ថកិច្ចនៅតាមបណ្តោយព្រំដែននៅមានភាពធូររលុង ដោយមិនបានអនុវត្តឲ្យបានត្រឹមត្រូវ ហើយថា អាចមានអ្នកមានអំណាច ឬអ្នកធំនៅពីក្រោយ ដែលធ្វើឲ្យករណី ឆ្លងដែនខុសច្បាប់ និងបទល្មើសកាប់បំផ្លាញព្រៃឈើនៅតែបន្តកើតមាន»។
បើតាមលោក ឈុំ សុជាតិ នៅក្នុងឆ្នាំ ២០១៨ កន្លងទៅនេះ កងទ័ពជើងគោកកម្ពុជា បានត្រួតពិនិត្យ ទប់ស្កាត់ និងបង្ក្រាបបទល្មើសផ្សេងៗនៅតាមបណ្តោយព្រំដែនបានសរុបចំនួន ៥ ១៩៣ ករណី និងបានធ្វើឲ្យស្ថានភាពសន្តិសុខនៅតាមខ្សែបន្ទាត់ព្រំដែនមានភាពល្អប្រសើរជាងកាលពីឆ្នាំ ២០១៧៕