ភ្នំពេញ: សមត្ថកិច្ចជំនាញនៃក្រសួងសាធារណការ និងដឹកជញ្ជូនបានបង្ក្រាបរថយន្តដឹកទំនិញលើសទម្ងន់កំណត់សរុបជាង ២៨ ម៉ឺនគ្រឿងក្នុងអំឡុងពេលត្រួតពិនិត្យតាមផ្លូវក្នុងរយៈពេលមួយឆមាសឆ្នាំ ២០២០ ខណៈដែលអគ្គនាយកដ្ឋានគយ និងរដ្ឋាករបានព្រមានដាក់ដេញថ្លៃលក់ជាសាធារណៈនូវរថយន្តចង្កូតឆ្វេង និងស្តាំចំនួន ៨៤៦ គ្រឿងដែលត្រូវបានបង្ក្រាបក្នុងរយៈពេល ៣-៤ ឆ្នាំកន្លងមក ប្រសិនបើម្ចាស់រថយន្តទាំងនេះមិនចូលខ្លួនទៅដោះស្រាយ។
តាមរបាយការណ៍របស់គណៈកម្មាធិការត្រួតពិនិត្យយានយន្តដឹកជញ្ជូនលើសទម្ងន់នៃក្រសួងសាធារណការចុះថ្ងៃទី ០៦ ខែកក្កដា ឲ្យដឹងថា ការអនុវត្តការងារក្នុងឆមាសទី ១ ឆ្នាំ ២០២០ នេះមានរថយន្តសរុបចំនួន ១ ០៩៤ ៣៩៧ គ្រឿង ត្រូវបានត្រួតពិនិត្យក្នុងនោះមានរថយន្តដឹកលើសទម្ងន់ចំនួន ២៨១ ២៤៤ គ្រឿង ស្មើនឹង ២៥,៧០%។
លោក សេង ឈួន រដ្ឋលេខាធិការក្រសួងសាធារណការ និងជាប្រធានគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់បានថ្លែងក្នុងកិច្ចប្រជុំប្រចាំឆមាសទី ១ ក្នុងឆ្នាំ ២០២០ ថា ក្រុមការងារគ្រោងបង្កើតទីតាំងស្ថានីយថ្មីបន្ថែម និងការធ្វើឲ្យប្រសើរឡើងនៅតាមស្ថានីយមួយចំនួនដែលមានស្រាប់។
លោកថា៖ «យើងបានណែនាំដល់មន្ត្រីតាមស្ថានីយឲ្យពង្រឹងការអនុវត្តការងារឲ្យបានកាន់តែប្រសើរ និងមានប្រសិទ្ធភាព ប្រកាន់ខ្ជាប់នូវក្រមសីលធម៌ការងារ និងសហការល្អជាមួយដៃគូពាក់ព័ន្ធ»។
ដោយឡែកអគ្គនាយកដ្ឋានគយ និងរដ្ឋាករកម្ពុជា (អ.គ.រ) នៃក្រសួងសេដ្ឋកិច្ច និងហិរញ្ញវត្ថុពីម្សិលមិញបានប្រកាសឲ្យម្ចាស់រថយន្ត និងម្ចាស់ទំនិញរត់គេចពន្ធចូលខ្លួនមកដោះស្រាយ និងបង់ពន្ធតាមផ្លូវច្បាប់ បន្ទាប់ពីសមត្ថកិច្ចបង្ក្រាប និងរឹបអូសអស់រយៈពេលជាច្រើនឆ្នាំ ប៉ុន្ដែម្ចាស់មិនព្រមចូលខ្លួនមកដោះស្រាយ។ ប្រសិនបើម្ចាស់មិនចូលខ្លួនដោះស្រាយទេ រថយន្ត និងទំនិញទាំងនោះនឹងត្រូវដាក់ដេញថ្លៃលក់ជាសាធារណៈ។
បើតាមសេចក្តីជូនដំណឹងរបស់ អ.គ.រ ចុះថ្ងៃទី ០៨ ខែកក្កដាបញ្ជាក់ថា អ.គ.រ សូមប្រកាស និងអញ្ជើញជាលើកចុងក្រោយដល់ម្ចាស់យានយន្ត និងម្ចាស់ទំនិញគេចពន្ធដែលត្រូវបានបង្ក្រាប និងរក្សាទុកបណ្ដោះអាសន្នដោយរដ្ឋបាលគយ សូមចូលខ្លួនមកបំពេញកាតព្វកិច្ចពន្ធអាករ និងពិន័យតាមច្បាប់ និងបទប្បញ្ញត្តិជាធរមានក្នុងរយៈពេលមិនលើសពី ៦០ ថ្ងៃគិតចាប់ពីថ្ងៃជូនដំណឹងនេះតទៅ។
ចំពោះរថយន្តចង្កូតស្តាំ ម្ចាស់រថយន្តត្រូវបំពេញលក្ខខណ្ឌចំនួន ២ រួមមាន ទី១- កក់ប្រាក់ចំនួន ៧០ ភាគរយនៃប្រាក់ពន្ធអាករ និងពិន័យដែលត្រូវបង់ និងយករថយន្តទៅកែចង្កូតពីស្តាំ មកឆ្វេងនៅយានដ្ឋានដែលទទួលស្គាល់ដោយស្ថាប័នមានសមត្ថកិច្ច។ ទី២- ក្នុងរយៈពេលមិនលើសពី ៣០ ថ្ងៃ ម្ចាស់រថយន្តត្រូវយករថយន្តដែលបានកែចង្កូតរួចមកបង្ហាញមន្ត្រីគយ និងរដ្ឋាករមានសមត្ថកិច្ច និងបង់ប្រាក់ពន្ធអាករ និងពិន័យបន្ថែម ៣០ ភាគរយទៀត ដើម្បីទទួលបានបង្កាន់ដៃពន្ធយានយន្តសម្រាប់ប្រើប្រាស់ក្នុងការចុះបញ្ជីយានយន្តស្របតាមច្បាប់ និងបទប្បញ្ញត្តិជាធរមាន។
សេចក្តីជូនដំណឹងព្រមានថា ក្នុងករណីម្ចាស់រថយន្ត និងម្ចាស់ទំនិញខកខានមិនបានចូលខ្លួនមកបំពេញកាតព្វកិច្ចតាមលក្ខខណ្ឌ និងពេលវេលាដូចបានរៀបរាប់ខាងលើ និងអនុលោមតាមបញ្ញត្តិមាត្រា ៥៤ និងមាត្រា ៥៥ នៃច្បាប់ស្ដីពីគយទេនោះ យានយន្ត និងទំនិញទាំងនោះនឹងត្រូវចាត់ទុកជាទំនិញគ្មានការទាមទារ ហើយ អ.គ.រ នឹងប្រកាសដាក់លក់ដោយដេញថ្លៃជាសាធារណៈតាមនីតិវិធីជាធរមាន ដើម្បីប្រមូលចំណូលចូលថវិកាជាតិ។
មន្ត្រីម្នាក់នៃ អ.គ.រ ថ្លែងសុំមិនបញ្ចេញឈ្មោះពីម្សិលមិញថា ទំនិញដែលសមត្ថកិច្ចជំនាញបានបង្ក្រាប និងរឹបអូសនេះមានច្រើនប្រភេទមិនអាចរៀបរាប់អស់ទេ ដោយបានរឹបអូសជាបន្តបន្ទាប់ដែលទំនិញខ្លះបានបង្ក្រាបរយៈពេល ៣ ឬ ៤ ឆ្នាំមកហើយ ប៉ុន្ដែមិនទាន់មានម្ចាស់ចូលខ្លួនមកដោះស្រាយតាមផ្លូវច្បាប់ទេ។
លោកបន្តថា ក្រៅពីទំនិញសមត្ថកិច្ចបានរឹបអូសរថយន្តចង្កូតឆ្វេង និងចង្កូតស្តាំចំនួន ៨៤៦ គ្រឿង។ លោកបញ្ជាក់ថា៖ «ទំនិញដែលយើងចាប់បាននេះ គឺជាទំនិញល្មើសច្បាប់ក្នុងស្រុក មិនមែនចាប់ពេលនាំចូលពីបរទេសទេ ព្រោះទំនិញនាំចូលពីបរទេសតាមច្រកទ្វារអន្តរជាតិ គឺសុទ្ធតែត្រូវបង់ពន្ធត្រឹមត្រូវតាមច្បាប់»៕