The Phnom Penh Post Search

Search form

Logo of Phnom Penh Post newspaper Phnom Penh Post - ៨​ខែ​ឆ្នាំ​នេះ រន្ទះ​បាញ់​សម្លាប់​មនុស្ស ៩២​នាក់




៨​ខែ​ឆ្នាំ​នេះ រន្ទះ​បាញ់​សម្លាប់​មនុស្ស ៩២​នាក់

Content image - Phnom Penh Post

៨​ខែ​ឆ្នាំ​នេះ រន្ទះ​បាញ់​សម្លាប់​មនុស្ស ៩២​នាក់

ភ្នំពេញៈ ក្នុងរយៈពេល​ ៨ ​ខែ​ឆ្នាំ​ ២០១៦ នេះ បាតុភូត​រន្ទះបាញ់ បាន​ឆក់​យក​ជីវិត​ពលរដ្ឋ​កម្ពុជា​ចំនួន​ ៩២ នាក់ និង​បាន​ធ្វើ​ឲ្យ​របួស​ ៩៩ នាក់​។

តួ​លេខ​នេះ​បាន​កើន​ឡើង​ បើ​ធៀប​នឹង​ខែ​មករា ដល់​ខែ​សីហា​ឆ្នាំ​មុន​នេះ មាន​មនុស្ស​ ៦៤ នាក់​បាន​ស្លាប់ និង​ ៥៨ នាក់​ប៉ុណ្ណោះ​បាន​រង​របួស។

លោក​ កែវ វី អ្នក​នាំ​ពាក្យ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ​ បាន​ឲ្យ​ដឹង​ថ្ងៃ​ពុធ​ទី​ ២៤ សីហា​នេះ​ថា ក្នុង​រយៈពេល​ ៨ ខែ​នេះ​ដែរ រន្ទះ​បាន​សម្លាប់​គោ​ក្របី​អស់​ ៨០ ក្បាល ខូច​ផ្ទះ​ ៩ ខ្នង និង​អគារសិក្សា​មួយ​ខ្នង បាន​ឆេះ​ខូច​ខាត​សម្ភារៈ​ការិយា​ល័យ​និង​​ឯកសារ។

លោក​ថ្លែង​ថា ៖ «ក្នុង​ខែ​ ៨ (សីហា) ហ្នឹង មាន​ព្យុះ​ក្នុង​តំបន់​កើត​មាន​ ៥ ទៅ​ ៦ លើក​ ចាប់ពី​ដើម​ខែ​។ នៅ​ពេល​ព្យុះ​រលាយ​ឥទ្ធិពល​ ក៏​បង្ក​ជា​មាន​សម្ពាធ​ទាប​ បង្ក​ឲ្យ​មាន​ភ្លៀង​ខ្យល់​រន្ទះ»។

លោក​​បន្ត​ថា ៖ «តាម​ពិតកម្រិត​នៃការ​ខូច​ខាត​មាន​ប្រហាក់​ប្រហែល​គ្នា តែ រន្ទះបាន​កើតច្រើនឆ្នាំនេះ។ រីឯកម្តៅ​ឆ្នាំនេះ មានរហូត​ដល់ ​៤២.៦ អង្សាសេ កាលពីខែ​មេសា ដល់ប៉ះភ្លៀងកក់ខែ​ ក៏​មាន​ស្ថានភាព​ខ្យល់​ព្យុះ​ខ្លាំង។

ក្រសួងធនធាន​ទឹក​និង​ឧតុ​និយម ក៏​បាន​ចេញ​ប្រកាស​ឲ្យពលរដ្ឋ​ដំណើរ​ប្រុង​ប្រយ័ត្ន​ពីតំបន់​មាត់​សមុទ្រ​ ដែល​អាចមាន​ «ខ្យល់​បោក​បក់​ខ្លាំង​ នៅ​លើ​ផ្ទៃ​សមុទ្រ​ មាន​រលកខ្ពស់ៗ»​ ផងដែរ គឹ​ក្នុង​ចន្លោះ​ថ្ងៃទី ​២៥ ដល់ ​២៨ ​ខែ​សីហា​។

តាម​ព្យាករណ៍​អាកាសធាតុរបស់ក្រសួង ដែល​បាន​ផ្សាយកាលពីថ្ងៃទី​ ២៣​ សីហា​ ពលរដ្ឋ​ក៏​ត្រូវ​មាន​ការ​ប្រុង​ប្រយ័ត្នតំបន់​វាល​ទំនាប និង​តំបន់​ខ្ពង់​រាប ចាប់ពីថ្ងៃ​ទី​២៣ ដល់​២៨ សីហានេះ ដោយសារ​មាន​រន្ទះ និង​ខ្យល់​កន្ត្រាក់​កើត​មាន​អំឡុង​ពេល​ភ្លៀង​ធ្លាក់៕

អត្ថបទគួរចាប់អារម្មណ៍