The Phnom Penh Post Search

Search form




Logo of Phnom Penh Post newspaper Phnom Penh Post - ៩ ខែ​បង្ក្រាប​បទ​ល្មើស​ព្រៃឈើ​បាន​ជាង ១៦០០ ករណី

៩ ខែ​បង្ក្រាប​បទ​ល្មើស​ព្រៃឈើ​បាន​ជាង ១៦០០ ករណី

ដីព្រៃ​ដែល​ត្រូវ​បាន​គេ​កាប់​រាន​ដុត​បំផ្លាញ​ចោល​នៅ​ព្រៃឡង់​ក្នុង​ខេត្ត​កំពង់ធំ។
ដីព្រៃ​ដែល​ត្រូវ​បាន​គេ​កាប់​រាន​ដុត​បំផ្លាញ​ចោល​នៅ​ព្រៃឡង់​ក្នុង​ខេត្ត​កំពង់ធំ។ រូបថត ម៉ៃ ទិត្យថារ៉ា

៩ ខែ​បង្ក្រាប​បទ​ល្មើស​ព្រៃឈើ​បាន​ជាង ១៦០០ ករណី

ភ្នំពេញៈ រយៈពេល ៩ ខែ ឆ្នាំ ២០១៥ សមត្ថកិច្ច​បាន​បង្ក្រាប​បទល្មើស​ព្រៃឈើ​ បទ​ល្មើស​សម្លាប់​​សត្វ​ព្រៃ និង​បទល្មើស​កាប់​រាន​ទន្ទ្រាន​ដី​ព្រៃ​បាន​ជាង​ ១៦០០ ករណី​ខណៈ​មាន​​សេចក្តី​រាយការណ៍​ថា​ព្រៃឈើ​កាន់តែ​ហោច​ទៅៗ​ដោយសារ​ការ​កាប់​បំផ្លាញ​ពី​ក្រុម​ឈ្មួញ​​មាន​​ប្រាក់​មាន​ការ​ឲ្យ​ដៃ​ពី​សមត្ថកិច្ច​ពាក់ព័ន្ធ​មួយ​ចំនួន​។

បើ​តាម​របាយការណ៍​របស់​ក្រសួង​កសិកម្ម រុក្ខាប្រមាញ់ និង​នេសាទ​ដែល​ចេញ​ផ្សាយ​កាលពី​ថ្ងៃ​ទី​ ២១ ខែ​តុលា បាន​ឲ្យ​ដឹង​ថា​សុំណុំ​រឿង​​ពាក់ព័ន្ធ​នឹង​បទល្មើស​ព្រៃឈើ បទ​ល្មើស​​​សត្វព្រៃ និង​កាប់​ទន្ទ្រាន​ដី​ព្រៃ​នៅ​តាម​អង្គភាព​រដ្ឋបាល​ព្រៃឈើ​មូលដ្ឋាន​មាន​សរុប ១៦៥៣ ករណី​ដោយ​បញ្ជូន​ទៅ​​តុលាការ​ចំនួន ១១៦៦ ករណី និង​ពិន័យ​ក្នុង​អន្តរកាល​ចំនួន ៤៨៧​ ករណី។

យ៉ាង​នេះ​ក្តី​តួលេខ​​នៃ​បទល្មើស​ទាំង​នេះ​បាន​​ថយ​ចុះ​ជាង ២០០ ករណី​បើ​ធៀប​នឹង​​រយៈពេល​ដូច​គ្នា​ក្នុង​ឆ្នាំ ២០១៤ ដែល​​មាន​ដល់​ទៅ​ ១៨៩១ ​ករណី។

ក្នុង​រយៈពេល​ ៩ ខែ​​ឆ្នាំ​ ២០១៥ នេះ​ដែរ​ក្រុម​សមត្ថកិច្ច​ក៏​បាន​ឃាត់​ខ្លួន​ជន​ជាប់ចោទ និង​ដកហូត​វត្ថុតាង​មាន​ដូចជា ឈើ​មូល-ជ្រុង ចំនួន ៦៤៩ ម៉ែត្រ​គុប ឈើ​អារ ៣៥១៤ ម៉ែត្រ​គុប ឈើ​ក្រាក់​គ្រញូង ១០០ ម៉ែត្រ​គុប និង ៥៧៩២ គីឡូក្រាម​សត្វព្រៃ​ចម្រុះ​គ្រប់​ប្រភេទ ៣៨៩៩ ក្បាល និង ១៦៥៩ គីឡូក្រាម អនុផល​ព្រៃឈើ សម្ភារ​ផ្សេងៗ​ទៀត។ ចំណែក​ដីព្រៃ​ដែល​​​កាប់​រាន​មាន​ចំនួន ២០៨០ ហិកតា និង​រណារ​យន្ត ៤៥២ គ្រឿង។

បទល្មើស​ទាំង​នេះ​កើតឡើង​ច្រើន​ក្នុង​ខេត្ត​ចំនួន ១១ នៅ​ភូមិ​ភាគ​ឦសាន​នៃ​ប្រទេស។ តាម​របាយការណ៍​ដដែល​នេះ​ក្នុង​រយៈពេល​ដូច​គ្នា​បទល្មើស​ជលផល​មាន​ចំនួន ២៧៤៤ ករណី​ក្នុង​នោះ​បទល្មើស​នៅ​តំបន់​ទឹកសាប​មាន ២៦៥៥ ករណី និង​បទល្មើស​ទឹក​សមុទ្រ​មាន​ចំនួន ៨៩ ករណី។ ដោយ​ឡែក​តួលេខ​នេះ​បាន​ហក់​ឡើង​ជាង ១០០០ ករណី​សម្រាប់​​រយៈពេល​ដូច​គ្នា​ក្នុង​ឆ្នាំ ២០១៤ ដែល​បទល្មើស​មាន​សរុប​តែ ១៧៧៣ ករណី។

សមថ្ថកិច្ច​ក៏​បាន​ចុះ​រុះរើ និង​បំផ្លាញ​ចោល​វត្ថុតាង​បទល្មើស​ជលផល​រួមមាន ស្បៃមុង និង​សាច់អួន​ប្រវែង​ជាង​ ១២៨៨ ​ម៉ែត្រ ចម្រឹង​ជាង ១ លាន ដើម ព្រម​ទាំង​ឧបករណ៍​ឆក់​ត្រី ចំនួន ១៣៦២ គ្រឿង​។

ទាក់ទិន​នឹង​បញ្ហា​នេះ​ប្រធាន​ក្រុម​កិច្ចការ​ពិសេស​សិទ្ធិ​មនុស្ស​កម្ពុជា​លោក អ៊ូច ឡេង បាន​បង្ហាញ​នូវ​សុទិដ្ឋិនិយម​ចំពោះ​​ការ​ខិតខំ​របស់​អាជ្ញាធរ​តាម​មូលដ្ឋាន​ក្នុង​ការ​បង្ក្រាប​​បទល្មើស​ព្រៃឈើ ការ​បរបាញ់​​សត្វព្រៃ និង​​បទល្មើស​នេសាទ​ប៉ុន្តែ​លោក​គិត​ថា​នៅ​មាន​បញ្ហា​ជាច្រើន​ទៀត​ដែល​អាជ្ញាធរ​នៅ​មាន​ភាព​ខ្វះ​ចន្លោះ និង​មិន​ហ៊ាន​ក្នុង​ការ​អនុវត្ត​ច្បាប់។

លោក​បាន​និយាយ​ថា​៖ «ការ​បង្ក្រាប​ភាគច្រើន​គឺ​ធ្វើ​តែ​​លើ​ប្រជាពលរដ្ឋ​សាមញ្ញ​ដែល​​ប្រព្រឹត្ត​​បទល្មើស​ក្នុង​​ទ្រង់ទ្រាយ​តូចតាច​តែ​ប៉ុណ្ណោះ​យើង​ឃើញ​ថា​ការ​បាត់បង់​​ព្រៃឈើ​នៅ​តែ​កើត​មាន​ហើយ​ទ្រង់​ទ្រាយ​​ធំ​ដែល​ធ្វើ​ឡើង​ដោយ​ឧកញ៉ា​ជាច្រើន​គឺ​ទទួល​បាន​​ការ​ការពារ​ពី​អាជ្ញាធរ​ជា​ថ្នូរ​នឹង​លាភសក្ការៈ។ កត្តា​នេះ​ទាមទារ​ឲ្យ​រដ្ឋាភិបាល​ចូលរួម​ចំណែក​ខ្លាំង​ចៀស​វាង​ការ​រើសអើង និង​​​ប្រកាន់​បក្ខពួក​ទើប​បញ្ហា​នេះ​អាច​កាត់​បន្ថយ​បាន​​»។

ភ្នំពេញ ប៉ុស្តិ៍​ មិន​អាច​សុំ​ការ​ឆ្លើយតប​ពី​លោក ឡោ រស្មី និង​លោក អ៊ាង សុផល្លែត រដ្ឋលេខាធិការ និង​​ជា​អ្នក​នាំពាក្យ​ក្រសួង​កសិកម្ម រុក្ខា​ប្រមាញ់ និង​នេសាទ​បាន​ទេ​កាលពី​ម្សិលមិញ​ដោយ​ទូរស័ព្ទ​ចូល​តែ​មិន​មាន​អ្នក​ទទួល​​។

ទោះ​ជា​យ៉ាង​ណា​ក៏ដោយ ​របាយការណ៍​របស់​ក្រសួង​កសិកម្ម​ដដែល​បាន​​ឲ្យ​ដឹង​​​ថា​ក្នុង​រយៈពេល ៩ ខែ​ឆ្នាំ ២០១៥ នេះ​ចំណូល​ពី​ថ្លៃ​សួយ​សារផល អនុផល​ព្រៃឈើ សរុប​មាន​ជាង ១៦០ ​លាន​រៀល​​ និង​ចំណូល​ពី​​វិស័យ​សាធារណៈ​មាន​ជាង ៥០ លាន​​រៀល និង​ជាង ២ សែន​ដុល្លា​អាមេរិក។

ចំណែកឯ​ ចំណូល​បាន​​ពី​វិស័យ​ជលផល​វិញ​ក្រសួង​ប្រមូល​បាន​ជាង ២០ ​លាន​រៀល​ស្មើ​នឹង​​ជាង ៧៩ ភាគរយ​ នៃ​ផែនការ​ជាង ៣០ លាន​រៀល​បើ​ធៀប​​នឹង​រយៈពេល​ដូច​គ្នា ឆ្នាំ ២០១៤ កើន​ឡើង​ជាង ១៤០ លាន​រៀល៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។