The Phnom Penh Post Search

Search form




Logo of Phnom Penh Post newspaper Phnom Penh Post - ​គ្រោះ​រាំង​ស្ងួត​កំពុង​គំរាម​កំហែង​ស្រូវ​ប្រាំង​កសិករ​នៅ​ស្រុក​បវេល

​គ្រោះ​រាំង​ស្ងួត​កំពុង​គំរាម​កំហែង​ស្រូវ​ប្រាំង​កសិករ​នៅ​ស្រុក​បវេល

​គ្រោះ​រាំង​ស្ងួត​កំពុង​គំរាម​កំហែង​ស្រូវ​ប្រាំង​កសិករ​នៅ​ស្រុក​បវេល

បាត់ដំបងៈ ដោយ​គ្មាន​ភ្លៀង​ធ្លាក់​មួយ​តំណក់​លើ​ដី​ស្រែ​ដ៏​ស្ងួត​ហួត​ហែង​របស់​ពួកគេ​កសិករ​នៅ ស្រុក​បវេល ខេត្ត​បាត់ដំបង កំពុង​អង្វរ​ក្រុមហ៊ុន​សាង​សង់​ឲ្យ​ឈប់​បិទ​ទឹក​ស្ទឹង​ដើម្បី​កុំ​ឲ្យ​ស្រូវ​ប្រាំង​របស់​ពួក​គេ​ងាប់​ដោយ​សារ​ខ្វះ​ទឹក។

ស្ពាន​ដែល​ផ្តល់​ហិរញ្ញប្បទាន​ដោយ​ធនាគារ​អភិវឌ្ឍន៍​អាស៊ី ដែល​ត​ភ្ជាប់ ខេត្ត​បាត់ដំបង និង ខេត្ត​បន្ទាយ​មាន​ជ័យ បាន​រាំង​ស្ទះ​ចរន្ត​ទឹក​ស្ទឹង​ចាប់​តាំង​ពី​ការ​សាង​សង់​បាន​ចាប់​ផ្តើម​កាល​ពី ខែ​ធ្នូ មក។ នេះ​បើ​យោង​តាម​មេភូមិ សាំងរាំង ក្នុង ស្រុក​បវេល ខេត្ត​បាត់ដំបង។ ទោះ​ជា​យ៉ាង​ណា ប្រជា​កសិករ បាន​ដាំ​ស្រូវ​រាប់រយ​ហិកតា កាល​ពី ខែ​មេសា ដោយ​រំពឹង​ទៅ​លើ​ទឹក​ភ្លៀង​ក្នុង​រដូវ​វស្សា។ ប៉ុន្តែ​បែរ​ជា​ពុំ​មាន​ភ្លៀង​ធ្លាក់​ទៅ​វិញ។

លោក លីញ សាលឿន នាយក​ប្រតិបតិ្ត​នៃ​សមាគម​សហ​ប្រតិបតិ្តការ​ដើម្បី​ការ​អភិវឌ្ឍ​សេដ្ឋកិច្ច ដែល​ជួយ​កសិករ​បាន​ឲ្យ​ដឹង​ថា៖ «កាល​ពី​ឆ្នាំ​មុន មាន​ទឹក​ជំនន់​ច្រើន ហើយ​ឆ្នាំ​នេះ មាន​គ្រោះ​រាំង​ស្ងួត​ច្រើន។ ដំណាំ​កំពុង​តែ​ងាប់»។

អ្នក​ភូមិ និង​មេឃុំ​បាន​ស្នើ​សុំ​ឲ្យ​អភិបាល​ស្រុក​ធ្វើ​អន្តរាគមន៍ និង​ធ្វើ​ឲ្យ​ទឹក​ហូរ​តាម​ព្រែក​ស្ទឹង​ឡើង​វិញ។ កាល​ពី​ថ្ងៃ​ចន្ទ ក្រុមហ៊ុន​សាង​សង់​ស្ពាន​បាន​ឆ្លើយ​តប​ដោយ​បញ្ចេញ​ទឹក​ច្រើន ប៉ុន្តែ មិន​គ្រប់​គ្រាន់​ដើម្បី​ទៅ​ដល់​ដី​ស្រែ​គ្រប់​ភូមិ​ទេ។ លោក សូ សាវឿន ដែល​ជា​មេភូមិ បាន​ថ្លែង​ថា៖ «ទឹក​ហូរ​យឺត​លើ​តំបន់​ទឹក​រាក់ វា​មិន​អាច​ទៅ​ដល់​កន្លែង​ឆ្ងាយ​ពី​ស្ពាន​ដែល​ជា​ដី​ស្រែ​ខ្ញុំ​ផ្ទាល់ និង​កូន​ខ្ញុំ ប្រហែល ៤ ហិកតា​នោះ​ទេ។ ស្រូវ​ប្រាំង​នឹង​រង​ការ​ខូច​ខាត​ទាំង​ស្រុង ប្រសិន​បើ​គ្មាន​ទឹក​ក្នុង​មួយ​ខែ​ទេ​នោះ»។ លោក សាវឿន ថ្លែង​ថា ប្រជាជន ៤០៥ គ្រួសារ​នៅ​ក្នុង​ភូមិ​លោក បាន​ទទួល​រង​ផល​ប៉ះពាល់​ដោយ​សារ​គ្រោះ​រាំងស្ងួត និង​ការ​បិទ​ទឹក ដោយ​សារ​តែ​ការ​សាង​សង់​ស្ពាន។ ក្រៅ​ពី​បិទ​ទឹក អ្នក​ស្រុក​ព្រួយ​បារម្ភ​ថា គម្រោង​សាង​សង់​ស្ពាន ៥៥ លាន​ដុល្លារ​នេះ កំពុង​តែ​បំពុល​ទឹក​ស្ទឹង ទន្លេ ដោយ​សារ​តែ​ការ​ចាក់​ស៊ីម៉ងត៍​ចោល និង​កាក​សំណល់​ដទៃ​ទៀត​ក្នុង​ទឹក។

លោក សាលឿន បញ្ជាក់​ថា៖ «ទឹក​កខ្វក់​ណាស់​ហើយ​ពុំ​មាន​ក្លិន​ល្អ​ទេ»។ លោក​បន្ថែម​ថា គ្រួសារ​គ្មាន​ប្រភព​ទឹក​ផ្សេង​បាន​បន្ត​ប្រើ​ប្រាស់​ទឹក​ពី​ស្ទឹង​ទន្លេ​នេះ ជា​ហេតុ​ធ្វើ​ឲ្យ​មនុស្ស​ជាច្រើន​នាក់​កើត​ជំងឺ​រាក និង​ឈឺ​ពោះ។

លោក Eirk Sidgwick នាយក​ប្រចាំ​ប្រទេស​នៃ​ធនាគារ​អភិវឌ្ឍន៍​អាស៊ី បាន​ថ្លែង​ថា ធនាគារ​មិន​ទទួល​បាន​ពាក្យ​បណ្តឹង​ពី​អ្នក​ភូមិ​ទេ ប៉ុន្តែ​លោក​នឹង​បញ្ជូន​មនុស្ស​មួយ​ក្រុម​ឲ្យ​ទៅ​ស៊ើប​អង្កេត​នៅ​ថ្ងៃ​ពុធ។

លោក ប៉ាញ ឧត្តម អនុ​ប្រធាន​មន្ទីរ​កសិកម្ម​ខេត្ត បាន​ថ្លែង​ថា៖ «នៅ ខែ​កក្កដា សីហា និង កញ្ញា ទឹក​ទន្លេ​មាន​កម្រឹត​ទាប​មិន​ជា​បញ្ហា​ទេ ប៉ុន្តែ​នៅ ខែ​មិថុនា ដោយ​សារ​តែ​គ្រោះ​រាំង​ស្ងួត គ្មាន​ទឹក​ហូរ​ចូល​ព្រែក​គឺជា​បញ្ហា។ បើ​គ្មាន​ការ​ជួយ​អន្តរាគមន៍​ទេ ដំណាំ​រដូវ​ប្រាំង​ទាំង​អស់​របស់​កសិករ អាច​នឹង​រង​ការ​ខូច​ខាត»៕ TK

អត្ថបទគួរចាប់អារម្មណ៍