បាត់ដំបងៈ អង្គភាពប្រឆាំងអំពើពុករលួយ (ACU) បាននាំខ្លួនលោក ស៊ូ អារ៉ាហ្វាត់ អភិបាលរងខេត្តបាត់ដំបងមកសួរនាំនៅទីស្នាក់ការ ACU នៅភ្នំពេញកាលយប់ថ្ងៃទី ១ ខែកក្កដា ពាក់ព័ន្ធនឹងសំណុំរឿងពុករលួយដីធ្លីរបស់លោកឧកញ៉ា សង ថន នៅស្រុកគាស់ក្រឡ ខេត្តបាត់ដំបង។
លោក ឱម យ៉ិនទៀង ប្រធាន ACU ប្រាប់ភ្នំពេញប៉ុស្តិ៍ពីថ្ងៃព្រហស្បតិ៍ម្សិលមិញថា ACU ពិតជាបាននាំខ្លួន អភិបាលរងខេត្តរូបនេះមកសួរនាំករណីពាក់ព័ន្ធអំពើពុករលួយនៅស្រុកគាស់ក្រឡមែន។ ប៉ុន្តែលោកបានបញ្ជាក់ថា ករណីនេះ ACU កំពុងមមាញឹកខ្លាំងក្នុងការស៊ើបអង្កេត ដោយមិនអាចបកស្រាយលម្អិតក្នុងពេលនេះបាននោះទេ។ លោកបញ្ជាក់ថា៖ «(នាំខ្លួនមែន...បាទ! ពិតជាបាននាំខ្លួនមែន ប៉ុន្តែសុំទុកពេលឲ្យខ្ញុំសិន។ ខ្ញុំធ្វើចប់ ខ្ញុំនឹងធ្វើសន្និសីទកាសែតជូនណា»។
កាលពីល្ងាចថ្ងៃទី ២៧ ខែមិថុនា ACU បាននាំខ្លួនឧកញ៉ា សង ថន ដែលបានកាន់កាប់ដីប្រមាណ ៥ ពាន់ហិកតា ឬស្មើ ១ ភាគនៃផ្ទៃដីក្នុងស្រុកគាស់ក្រឡទាំងមូលមកសាកសួរពាក់ព័ន្ធនឹងករណីពុករលួយរឿងដីធ្លីក្នុងស្រុកនេះហើយ ស្របពេលជាមួយគ្នានោះលោកនាយករដ្ឋមន្ត្រី ហ៊ុន សែន ក៏បានចេញអនុក្រឹត្យបញ្ចប់មុខតំណែងលោក ម៉ៅ សុចាន់ ពីអភិបាលនៃគណៈអភិបាលស្រុកគាស់ក្រឡផងដែរ។
លោក ងួន រតនៈ អភិបាលខេត្តបាត់ដំបងប្រាប់ភ្នំពេញ-ប៉ុស្តិ៍ពីម្សិលមិញថា ការនាំខ្លួននេះ គឺជានីតិវិធីនៃការស៊ើបអង្កេតរបស់ ACU ដើម្បីធ្វើការស្រាវជ្រាវ ករណីពុករលួយរឿងដីធ្លីនៅស្រុកគាស់ក្រឡ។ លោកបន្តថា មកដល់ពេលនេះខេត្តក៏មិនទាន់ដឹងច្បាស់ថា អភិបាលរងរូបនេះមានជាប់ពាក់ព័ន្ធក្នុងនាមជាជនសង្ស័យ ឬគ្រាន់តែជាសាក្សីនោះទេ ដោយលោកចាត់ទុកថា អាចជារឿងបុគ្គលច្រើនជាង។
លោកបន្ថែមថា៖ «វាស៊ីសងលើការអង្កេតបន្ថែមថា វាជារឿងរដ្ឋបាល ឬជារឿងបុគ្គល បើកាលណាវាជារឿងបុគ្គលនោះមិនពាក់ព័ន្ធអង្គភាពនោះទេ។ រឿងនេះ យើងទុកឲ្យ ACU ស្រាវជ្រាវទៅ ហើយការនាំខ្លួន (អភិបាលរង) នេះគឺជាការចង់បានរបស់សមត្ថកិច្ច ដែលត្រូវសួរព័ត៌មានបន្ថែមទៀត»។
លោក ស៊ូ អារ៉ាហ្វាត់ អភិបាលរងខេត្តបាត់ដំបងដែលត្រូវបាន ACU នាំខ្លួន យកមកសាកសួរនៅរាជធានីភ្នំពេញធ្លាប់ជាប្រធានគណៈកម្មការថ្នាក់ខេត្ត ដោះស្រាយវិវាទដីធ្លីនៅស្រុកគាស់ក្រឡហើយលោកក៏ធ្លាប់មានទំនាក់ទំនង រហូតក្លាយជាទំនាស់ជាមួយលោកឧកញ៉ា សង ថន ផងដែរ។ នេះបើតាម លោក យិន ម៉េងលី មន្ត្រីសម្របសម្រួលសមាគមអាដហុកប្រចាំខេត្តបាត់ដំបងបានប្រាប់ភ្នំពេញ- ប៉ុស្តិ៍កាលពីម្សិលមិញ។
លោក ម៉េងលី បានរៀបរាប់ថា ទាក់ទងករណីនេះគឺលោកអភិបាលរងខេត្តបាត់ដំបង និងលោកឧកញ៉ា សង ថន ធ្លាប់មានទំនាស់ជាមួយគ្នា រយៈពេលកន្លះឆ្នាំកន្លងមកនេះដោយមានការចុះផ្សាយ និងល្បីទូទាំងខេត្តផងដែរក្នុងករណីដែលឧកញ៉ា សង ថន បានប្រគល់ដីមួយចំនួនមកលោកអភិបាលរងខេត្តរៀបចំនីតិវិធីសុំទៅថ្នាក់លើដើម្បីទុកជាសម្បត្តិ៍របស់រដ្ឋ ដោយស្នើឲ្យផ្តល់ប្លង់កម្មសិទ្ធិដីសេសសល់ដែលគាត់បានកាន់កាប់។
លោក ម៉េងលី បន្តថាក្នុងពេលនោះភាគីទាំង ២ ក៏ឈានដល់ការប្តឹងផ្តល់គ្នាករណីដែលអភិបាលរង លោក ស៊ូ អារ៉ាហ្វាត់ បានក្លែងឯកសារពីចំនួនដីមិនបានត្រឹមត្រូវដាក់ទៅថ្នាក់លើ។
លោក ម៉េងលី បញ្ជាក់ថា៖ «ខ្ញុំអាចនិយាយបានថា ការនាំខ្លួនលោកឧកញ៉ា និងលោកអភិបាលរងខេត្តនេះគឺពិតជាមានជាប់ពាក់ព័ន្ធនឹងបញ្ហាដីធ្លីនៅក្នុងស្រុកគាស់ក្រឡនេះហើយ។ ប៉ុន្តែដោយសារតែយើងមើលឃើញថា ACU មិនសូវបង្ហាញព័ត៌មាននានាជាសាធារណៈឲ្យមតិជាតិ អន្តរជាតិបានដឹងនោះទេ ច្រើនតែលាក់ៗ ហើយព័ត៌មាននេះ វាជាព័ត៌មានក្តៅ ដែលប្រជាពលរដ្ឋនាំគ្នាឃ្លាំមើល តាមដាន។ ខ្ញុំគិតថា បើសិនជា ACU បញ្ចប់នីតិវិធីរបស់ខ្លួន ACU គួរតែធ្វើសន្និសីទមួយបង្ហាញបញ្ហានេះ»៕