.jpg)
លោក ឱម យ៉ិនទៀង ប្រធាន ACU នាពេលកន្លងមក។ ហុង មិនា
ព្រះវិហារៈ អង្គភាពប្រឆាំងអំពើពុករលួយ (ACU) កំពុងស៊ើបអង្កេតមន្ត្រីបរិស្ថានម្នាក់ក្នុងខេត្តព្រះវិហារដែលជាប់បណ្ដឹងចោទពីបទប្រព្រឹត្តអំពើពុករលួយជាថ្នូរនឹងការបណ្ដែតបណ្ដោយឱ្យមានបទល្មើសកាប់បំផ្លាញព្រៃឈើនៅក្នុងតំបន់ព្រៃឡង់។ បណ្ដាញសហគមន៍ព្រៃឡង់បានអះអាងថា មន្ត្រីបរិស្ថានរូបនេះគឺជាអ្នកបើកដៃឱ្យមានការកាប់ឈើទ្រង់ទ្រាយធំនៅព្រៃឡង់។
កាលពីដើមសប្ដាហ៍មុនលោក ឱម យ៉ិនទៀង ប្រធាន ACU បានផ្ញើលិខិតមួយទៅកាន់លោក សុង ច័ន្ទសុជាតិ ប្រធានស្ដីទីមន្ទីរបរិស្ថានខេត្តព្រះវិហារ ដើម្បីឱ្យបំភ្លឺជុំវិញភាពមិនប្រក្រតីរបស់មន្ត្រីបរិស្ថានឈ្មោះ រដ្ឋា និងសហគមន៍ព្រៃឈើ ដែលបានឃុបឃិតជាមួយឈ្មួញឈើ និងអ្នកឈូសឆាយដីព្រៃខុសច្បាប់។
លិខិតលើកឡើងថា លោក រដ្ឋា និងសហគមន៍ព្រៃឈើបានឃុបឃិតគ្នាជាមួយឈ្មួញឈើដ៏ធំម្នាក់ក្នុងភូមិពើក ឃុំពុទ្រា ស្រុកជ័យសែន ដោយបានទារលុយចំនួនពី ៨ ម៉ឺនទៅ ១០ ម៉ឺនរៀលក្នុង ១ គោយន្តដែលបានចូលទៅក្នុងព្រៃឡង់ ដើម្បីកាប់ឈើ។ ចំពោះគោយន្តដែលបានបង់លុយនៅក្នុងព្រៃ ប៉ុន្តែមិនបានលក់ឈើមកឱ្យឈ្មោះ ឡេង គឺមិនត្រូវបានអនុញ្ញាតឱ្យដឹកឈើចេញពីភូមិពើកឡើយ ហើយថែមទាំងត្រូវបានមន្ត្រីបរិស្ថាន និងសហគមន៍ចាប់ឱ្យបង់ប្រាក់ម្ដងទៀតចំនួន ១ លានរៀល។
លិខិតបន្តថា៖ «តាមព័ត៌មានទទួលបានឈ្មោះ ឡេង និងឈ្មោះ ឌី កំពុងតែត្រូវរ៉ូវគ្នា បើកដៃឱ្យក្រុមគោយន្តចូលកាប់ទន្ទ្រានបំផ្លិចបំផ្លាញព្រៃឡង់ដោយសេរី ហើយគោយន្តរបស់ពួកគេចូលទៅអារឈើក្នុង ១ ថ្ងៃពី ៣ ទៅ ៥ ជើង ដោយមានមេខ្លោងឈ្មោះ ឌី ឈ្មោះ រឿន ឈ្មោះ ម៉េត និងឈ្មោះ យាយលែន ជាអ្នកប្រមូលទិញពីអ្នកស្រុកដែលបានចូលទៅអារឈើក្នុងព្រៃនៅជុំវិញភូមិទ្រា និងភូមិពើក ដោយឃុបឃិតគ្នាជាមួយមន្ត្រីបរិស្ថាន សហគមន៍ព្រៃឈើ និងមន្ត្រីប៉ុស្ដិ៍នគរបាលរដ្ឋបាល»។ លិខិតរបស់លោក ឱម យ៉ិនទៀង ដដែលបន្តទៀតថា ចំពោះឈ្មោះ ឆាយ គឹមហូវ ដែលមានប្ដីជាមន្ត្រីផ្នែករដ្ឋបាលព្រៃឈើមានឡានសាំយ៉ុង ២ គ្រឿង និងឡានធំកង់ ១០ ចំនួន ២ គ្រឿង កំពុងតែជួញឈើនៅក្នុងតំបន់ព្រៃឡង់នោះដែរ។
កាលពីថ្ងៃអាទិត្យលោក សុង ច័ន្ទសុជាតិបានបដិសេធធ្វើអត្ថាធិប្បាយជុំវិញរឿងនេះ ដោយលោកគ្រាន់តែបញ្ជាក់យ៉ាងខ្លីថា កំពុងធ្វើការងារលើការស្នើសុំឱ្យបំភ្លឺពីអង្គភាពប្រឆាំងអំពើពុករលួយ។ ចំណែកលោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងថាលោកមិនមានអ្វីត្រូវអត្ថាធិប្បាយទេ ដោយទុកភារកិច្ច ឱ្យ ACU បន្តទៅតាមនីតិវិធីរបស់ខ្លួន។
ភ្នំពេញប៉ុស្ដិ៍មិនអាចសុំការបញ្ជាក់ពីលោក ឱម យ៉ិនទៀង បានទេដោយសារលោកមិនលើកទូរស័ព្ទ។
លោក ឃុត សឿម សមាជិកបណ្ដាញសហគមន៍ព្រៃឡង់នៅក្នុងខេត្តព្រះវិហារថ្លែងថា លោក សោម រដ្ឋា គឺជាមន្ត្រីបរិស្ថានដែលមើលការខុសត្រូវ នៅតំបន់ព្រៃឡង់ ហើយជារឿយៗគេតែងតែប្រទះឃើញមន្ត្រីរូបនេះបើករថយន្តទៅជួបឈ្មួញឈើ និងបង្ហាញភាពស្និទ្ធស្នាលជាមួយក្រុមឈ្មួញរកស៊ីឈើខុសច្បាប់។
លោកបន្តថា បុគ្គលដែលមានឈ្មោះ ឌី ឈ្មោះ ម៉េត និងឈ្មោះ នួន ជាដើមគឺមិនមែនជាអ្នកមានមុខងារក្នុងជួររាជការឡើយ ប៉ុន្តែគឺជាក្រុមឈ្មួញរកស៊ីឈើខុសច្បាប់ដ៏ល្បីឈ្មោះនៅក្នុងខេត្តព្រះវិហារ ហើយកន្លងមកឈើរបស់ក្រុមឈ្មួញទាំងនេះក៏ធ្លាប់ត្រូវបានរឹបអូស ដោយក្រុមបណ្ដាញសហគមន៍ព្រៃឡង់ដែរ។
លោក សឿម បញ្ជាក់ទៀតថា ចំពោះសហគមន៍ព្រៃឈើដែលត្រូវបានមន្ត្រីបរិស្ថានបើកដៃឱ្យមានការកាប់បំផ្លាញព្រៃឈើនៅព្រៃឡង់នោះ គឺជាសហគមន៍ដែលទទួលស្គាល់ដោយក្រសួងបរិស្ថាន មិនមែនជាក្រុមរបស់បណ្ដាញសហគមន៍ព្រៃឡង់ទេ។ «ភាគច្រើនក្រុមឈ្មួញ មកចាំទិញឈើនៅក្នុងភូមិពើកហ្នឹងតែម្ដង ហើយឈើគឺត្រូវបានគេដឹកបន្តតាមម៉ូតូ ឬគោយន្តទៅកាន់ខេត្តកំពង់ធំ។ និយាយឱ្យចំ តំបន់ភូមិពើកហ្នឹង គឺកន្លែងមន្ត្រីបរិស្ថាននៅ គឺមានស្នាក់ការក្នុងភូមិពើកហ្នឹងតែម្ដង។ ភូមិហ្នឹង គឺជាតំបន់ប្រមូលផ្ដុំរបស់ក្រុមឈ្មួញឈើដ៏ធំមួយដោយសារមានច្រកផ្លូវចេញទៅក្នុងព្រៃឡង់ច្រើនផ្លូវប្រៀបបានសរសៃឈាមមួយអ៊ីចឹង»។
ចាប់តាំងពីខែកុម្ភៈមកក្រសួងបរិស្ថានបានព្រមានចាត់វិធានការផ្លូវច្បាប់ ចំពោះបណ្ដាញសហគមន៍ព្រៃឡង់ទាំង ៤ ខេត្ត ដើម្បីឱ្យបញ្ឈប់សកម្មភាពចុះល្បាតព្រៃដែលពួកគេអះអាងថា ធ្វើឡើងក្នុងការចូលរួមការពារព្រៃឡង់ពីការកាប់បំផ្លាញ។ ប៉ុន្តែក្រសួងបរិស្ថានបានចាត់ទុកក្រុមបណ្ដាញសហគមន៍នេះថា ជាក្រុមធ្វើសកម្មភាពខុសច្បាប់ដែលត្រូវបានគេប្រើប្រាស់ដើម្បីបញ្ឆេះកំហឹងពលរដ្ឋឱ្យស្អប់មកលើរដ្ឋាភិបាល លើកិច្ចការពារធនធានធម្មជាតិ៕
