ព្រះសីហនុៈ លោក នួន ប៉ុក អតីតប្រធានមន្ទីរដែនដី នគរូបនីយកម្ម សំណង់ និងសុរិយោដីខេត្តព្រះសីហនុត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី ១ មីនា។ ការចាប់ខ្លួននេះដោយសារមានការសង្ស័យថា លោកបានប្រព្រឹត្តអំពើពុករលួយនៅអំឡុងពេលកំពុងកាន់តំណែងជាប្រធានមន្ទីរដែនដីខេត្តព្រះសីហនុចាប់ពីឆ្នាំ ២០១៦ ដល់ឆ្នាំ ២០១៨។
សារព័ត៌មាន ហ្វ្រេសញូវ បានផ្សាយនៅថ្ងៃម្សិលមិញដោយយោងតាមមន្ត្រីជាន់ខ្ពស់អង្គភាពប្រឆាំងអំពើពុករលួយម្នាក់ដែលបានបញ្ជាក់ថា លោកស្រី កែម សុភាព ប្រធាននាយកដ្ឋានស៊ើបអង្កេតអង្គភាពប្រឆាំងអំពើពុករលួយបានដឹកនាំកម្លាំងចុះទៅឃាត់ខ្លួនលោក នួន ប៉ុក។ ប៉ុន្តែមន្ត្រីជាន់ខ្ពស់រូបនោះមិនទាន់បានបញ្ជាក់លម្អិតអំពីការចាប់ខ្លួននេះនៅឡើយទេ។
កាលពីថ្ងៃម្សិលមិញ ភ្នំពេញប៉ុស្ដិ៍មិនអាចសុំការបញ្ជាក់បន្ថែមពីលោក ឱម យ៉ិនទៀង ប្រធានអង្គភាពប្រឆាំងអំពើពុករលួយលោក សេង ឡូត មន្ត្រីនាំពាក្យក្រសួងដែនដី នគរូបនីយកម្ម និងសំណង់ និងលោក ផៃ ស៊ីផាន មន្ត្រីនាំពាក្យរដ្ឋាភិបាលបានទេដោយសារពួកគាត់មិនលើកទូរស័ព្ទ។
លោក ឃាង ភារម្យ មន្ត្រីនាំពាក្យខេត្តព្រះសីហនុបញ្ជាក់ថា លោកមិនអាចបញ្ជាក់រឿងនេះបានទេ ដោយសារជាដែនសមត្ថកិច្ចរបស់អង្គភាពប្រឆាំងអំពើពុករលួយ។
កាលពីដើមឆ្នាំ ២០១៩ លោកនាយករដ្ឋមន្ត្រី ហ៊ុន សែន បានប្រកាសប្រើអភិក្រមទី ៥ គឺការវះកាត់ដើម្បីលុបបំបាត់មន្ត្រីដែលប្រព្រឹត្តអំពើពុករលួយ។ ក្រោយមានការប្រកាសនេះ អង្គភាពប្រឆាំងអំពើពុករលួយបានបើកស៊ើបអង្កេតលើមន្ត្រីរដ្ឋាភិបាលជាច្រើនរូប។
កាលពីថ្ងៃទី ២៧ ខែកុម្ភៈ សាលាដំបូងរាជធានីភ្នំពេញបានសម្រេចផ្ដន្ទាទោសលោក លឿម ប៊ុនរឿន អតីតប្រធានមន្ទីរដែនដីនគរូបនីយកម្ម និងសំណង់ខេត្តពោធិ៍សាត់រួមទាំងអនុប្រធានមន្ទីរ និងមន្ត្រីមន្ទីរម្នាក់ទៀតពីបទសម្អាតប្រាក់ រំលោភអំណាច និងវិតិក្រមដោយដាក់ពន្ធនាគារចំនួន ៨ ឆ្នាំ។
អតីតមន្ត្រីមន្ទីរដែនដីទាំង ៣ ត្រូវបានចាប់ខ្លួនដោយអង្គភាពប្រឆាំងអំពើពុករលួយនៅខេត្តពោធិ៍សាត់កាលពីខែកក្កដា ឆ្នាំ ២០១៩។
លោក សន ជ័យ នាយកប្រតិបត្តិនៃអង្គការសម្ព័ន្ធ គណនេយ្យភាពសង្គមកម្ពុជាថ្លែងថា ព្រះសីហនុគឺជាខេត្តមួយក្នុងចំណោមខេត្តដទៃទៀតដែលមានការរីកដុះដាលនៃការសាងសង់អចលនទ្រព្យ និងការគ្រប់គ្រងអចលនទ្រព្យដីធ្លីជាដើម។
ប៉ុន្តែលោកបន្តថា គេបានដឹងអំពីមូលហេតុដែលនាំឱ្យមានការសាងសង់សំណង់គ្មានច្បាប់មួយចំនួននៃខេត្តនេះក៏អាចដឹង ដោយសារមានភាពយឺតយ៉ាវ ឬស្មុគស្មាញក្នុងការទទួលភាពស្របច្បាប់សាងសង់ដែលរាល់ការសាងសង់ត្រូវស្នើសុំច្បាប់ចាប់ពីមន្ទីរឡើងទៅ។
លោក ជ័យ បញ្ជាក់ថា៖ «ជាមួយនឹងភាពស្មុគស្មាញដែលមានស្រាប់នៅក្នុងសេវាសុរិយោដី និងសេវាសាងសង់នេះ វាងាយនឹងនាំឱ្យមានការប្រព្រឹត្តអំពើពុករលួយ ឬការឆក់ឱកាសពីក្រុមមន្ត្រីដែលមានសិទ្ធិអំណាច។ អ៊ីចឹងខ្ញុំយល់ថា ប្រសិនបើមានភ័ស្ដុតាងគ្រប់គ្រាន់ ឬការប្ដឹងពីជនរងគ្រោះពីអាជ្ញាធរណាមួយ ឬពីវិស័យឯកជនក្ដី ដើម្បីចាត់ការលើរឿងនេះ ខ្ញុំគិតថា មិនអាក្រក់ទេ»៕