.jpg)
លោករដ្ឋមន្ត្រី ហង់ ជួន ណារ៉ុន បើកវិញ្ញាសាប្រឡងបាក់ឌុបកាលពីឆ្នាំមុន។ ភ្នំពេញ ប៉ុសិ៍្ត
ភ្នំពេញៈ អង្គភាពប្រឆាំងអំពើពុករលួយ (ACU) នឹងមិនដាក់ពង្រាយអ្នកសង្កេតការណ៍ដើម្បីឃ្លាំមើលការប្រឡងសញ្ញាបត្រមធ្យមសិក្សាទុតិយភូមិបាក់ឌុបទៀតទេ នៅក្នុងឆ្នាំនេះ បន្ទាប់ពីស្ថាប័នមួយនេះបានដាក់អ្នកសង្កេតការណ៍រយៈពេល ៥ ឆ្នាំរួចមកតែបានស្នើឱ្យក្រសួងអប់រំ ពង្រឹងយន្តការរបស់ខ្លួន គឺយន្តការអប្បមាទ។
អប្បមាទ គឺជាអ្នកដែលទៅត្រួតពិនិត្យ នៅក្នុងមណ្ឌលប្រឡង និងដំណើរការប្រឡងនៅក្នុងបន្ទប់ប្រឡង។
សេចក្តីជូនដំណឹងរបស់ ACU កាលពីថ្ងៃទី ២៧ ខែ មិថុនា បានបញ្ជាក់ថា ACU មិនដាក់ពង្រាយអ្នកសង្កេតការណ៍នៅក្នុងការប្រឡងបាក់ឌុបឆ្នាំនេះ ដែលនឹងប្រព្រឹតទៅនៅថ្ងៃទី ១៩ និងទី ២០ ខែ សីហា ដូចក្នុងរយៈពេល ៥ ឆ្នាំកន្លងមកនោះទេ។
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្តិ៍កាលពីម្សិលមិញថា ការមិនដាក់ពង្រាយអ្នកសង្កេតការណ៍ប្រឡងនេះនឹងមិនប៉ះពាល់ទៅដល់គុណភាពប្រឡងទេ ពីព្រោះក្រសួងអប់រំ បានបន្តសហការណ៍ជាមួយ ACU ដើម្បីដោះស្រាយរាល់បញ្ហាទាំងអស់ ដែលកើតមានឡើង ប្រសិនជាមានអំពើពុករលួយកើតឡើង។
លោកបញ្ជាក់ថា៖ «ពេលមុន យើងមានអ្នកសង្កេតការណ៍ដើរមើលទៅតាមថ្នាក់ ឥឡូវនេះគឺយើងបង្កើនចំនួនអប្បមាទ ក៏ដូចជាជំនួយការអប្បមាទ ដែលត្រូវបានជ្រើសរើសពីក្នុងចំណោមមន្ត្រីអប់រំ ក៏ដូចជាក្នុងចំណោមគរុសិស្សនិស្សិត ដើម្បីឱ្យគាត់ ដើរពិនិត្យមើលសង្កេតបន្ទប់ប្រឡងនេះ»។
បើតាមលោក សុវាចា យន្តការប្រឡងនេះ គឺមានគណៈកម្មការទូទាំងប្រទេស ដែលទទួលខុសត្រូវលើដំណើរការប្រឡងនៅតាមរាជធានី ខេត្តទាំង ២៥។
លោកបញ្ជាក់ថា៖ «បន្ទាប់មកទៀតគឺក្រសួងមានចាត់តាំងអ្នកទទួលបន្ទុកក្នុងការរៀបចំការប្រឡង ហើយបន្ទាប់មកទៀតគឺយើងមានអប្បមាទ ដែលជាអ្នកត្រួតពិនិត្យទៅលើការងារប្រធានមណ្ឌលប្រឡង។ ប្រធានមណ្ឌលប្រឡង ដើរតួជាតំណាងរបស់រដ្ឋមន្ត្រី ក្រសួងអប់រំ នៅក្នុងមណ្ឌលប្រឡងតែម្តង។ ដោយឡែកអប្បមាទត្រួតពិនិត្យបន្ថែមទៀត នៅក្នុងមណ្ឌលប្រឡងនីមួយៗ ដោយមានការគាំទ្រពីសំណាក់ជំនួយការអប្បមាទដើម្បីជួយត្រួតពិនិត្យ នៅក្នុងបន្ទប់ប្រឡងតែម្តង»។
ក្រសួងអប់រំបានប្រកាសកាលពីពេលថ្មីៗនេះថា ក្រសួងមានការប្តេជ្ញាចិត្តខ្ពស់ ក្នុងការធានាគុណភាពនៃការប្រឡងបាក់ឌុបនេះ ឲ្យមានដំណើរការល្អ ឈរលើគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ ក្រសួងអប់រំបានអំពាវនាវឲ្យបេក្ខជន បុគ្គលិកអប់រំ មាតាបិតា និងគ្រប់ភាគីពាក់ព័ន្ធចូលរួមចំណែកធានាយ៉ាងណា ឱ្យដំណើរការប្រឡងនេះ ប្រព្រឹត្តទៅមានស្តង់ដាខ្ពស់។
លោក សុវាចា បន្ថែមថា៖ «សូមបេក្ខជន និងបុគ្គលិកអប់រំទាំងអស់ គោរពបទប្បញ្ញត្តិរបស់ក្រសួងអប់រំ យុវជន និងកីឡា។ ក្រសួងនឹងអនុវត្តយ៉ាងម៉ឺងម៉ាត់បំផុត នូវបទប្បញ្ញត្តិដែលមានជាធរមាន»។
លោក ឱម យិនទៀង ប្រធាន ACU មិនអាចទាក់ទងសុំអធិប្បាយបានទេ។
ការប្រឡងបាក់ឌុបឆ្នាំ ២០១៩ នេះមានបេក្ខជនដាក់ពាក្យចំនួន ១១៩ ២១៧ នាក់ (ស្រី ៦១ ០៣១ នាក់)។ សំណើមណ្ឌលប្រឡងមាន ២០២ មណ្ឌល។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បានប្រាប់ភ្នំពេញប៉ុស្តិ៍ថា ប្រសិនបើ ACU នៅតែបន្តសហការជាមួយក្រសួងអប់រំបានន័យថា គួរតែរំលាយក្រសួងអប់រំ ហើយទុកឱ្យ ACU ជាអ្នកគ្រប់គ្រងវិញពីព្រោះរដ្ឋាភិបាល ក៏ដូចជាក្រសួងអប់រំ កំពុងតែឧតម្លៃខ្ពស់ទៅលើ ACU។ «តាមពិតទៅល្អហើយ ដែលមានធនធានមនុស្សជួយប៉ុន្តែចង់ឱ្យក្រសួងអប់រំខ្លួនឯងហ្នឹងម្ចាស់ការ មិនមែននៅក្រោមអ្នកណាម្នាក់ សម្រាប់គ្រប់គ្រងទេ ព្រោះអីលោកសុទ្ធតែជាបណ្ឌិតសុទ្ធតែជាបញ្ញវន្ត សុទ្ធតែជាអ្នករៀនបានខ្ពង់ខ្ពស់។ អ៊ីចឹងលោកមានស្ថាប័នមួយទៀតសម្រាប់គ្រប់គ្រងបានន័យថា សមត្ថភាពអស់លោករដ្ឋមន្ត្រីហ្នឹងគឺនៅមានកម្រិតនៅឡើយ»៕
