ភ្នំពេញៈ ប្រធានអង្គភាពប្រឆាំងអំពើពុករលួយ លោក ឱម យិុនទៀង បានអះអាងថា ក្រោយពីស៊ើបអង្កេតបានរកឃើញថា ការសម្ញែងទ្រព្យរបស់លោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី និងលោក ស្រេង សុខា ស្នងការរងនគរបាលខេត្តកណ្ដាលគឺជាទ្រព្យក្លែងក្លាយ និងមិនពាក់ព័ន្ធនឹងពុករលួយទេ។ប៉ុន្តែលោក ថា លោក គឹម រស្មី កំពុងត្រូវបានស៊ើបអង្កេតជាសម្ងាត់ ១ ករណីទៀត រឿងបទល្មើសព្រៃឈើ។
នៅក្នុងសន្និសីទកាសែតកាលពីថ្ងៃទី ២៨ មិថុនា លោក ឱម យិុនទៀង បានថ្លែងថា អង្គភាពប្រឆាំងអំពើពុករលួយ (ACU) បានស៊ើបអង្កេតទ្រព្យសម្បត្តិដូចជា ផ្ទះ ឡាន និងលុយក្នុងធនាគារ រួមទាំងទ្រព្យសម្បត្តិប្រពន្ធ និងកូនទាំង ៥ នាក់ របស់លោក គឹម រស្មី ប៉ុន្តែរកមិនឃើញពាក់ព័ន្ធនឹងអំពើពុករលួយឡើយ រីឯសែក ៥ សន្លឹក តម្លៃសរុប ៥០ ម៉ឺនដុល្លារ ដែលចែកឱ្យកូន ៥ នាក់ ក្នុងថ្ងៃពិធីខួបកំណើត ១ គឺជាសែកគ្មានលុយទេ។
លោកបន្តថា ក្នុងចំណោមសែកទាំង ៥ សន្លឹកគឺ ៣ សន្លឹក ត្រូវបាន ACU ដកហូតធ្វើជាភ័ស្ដុតាង និង ២ សន្លឹកទៀតត្រូវកូនលោក គឹម រស្មី ហែកចោលដោយសារខឹងថាជាសែកចង្រៃអត់លុយដែលធ្វើឱ្យឪពុករបស់ខ្លួនត្រូវអស់បុណ្យស័ក្ដិ។
លោកថា៖ «អ៊ីចឹងយើងមើលទ្រពសម្បត្តិអស់ហ្នឹងមិនទាន់ឃើញធានាអះអាងថា (ពុករលួយទេ)។ អាលុយ ៥០ ម៉ឺនហ្នឹងអត់មានទេ ព្រោះលុយក្នុងធនាគារគាត់មានអត់គ្រប់ ៥០ ម៉ឺនផង អ៊ីចឹងបើសែកហ្នឹងយកទៅបើក ជាសែកដែលអត់លុយទេ។ គឺអួតសម្ញែងទ្រព្យទេ បញ្ហាគាត់ខុសៗត្រង់សម្ញែងទ្រព្យ អ៊ីចឹងរាជរដ្ឋាភិបាលដកគាត់»។
បើតាមលោក យិុនទៀង ពីដំបូងលោក គឹម រស្មី គឺជាអ្នកក្រនិងជាអ្នកមានគ្រួសាររកស៊ីដាំកៅស៊ូ ប៉ុន្តែបន្ទាប់មក លោកបានពង្រឹកមុខរបរដាំកៅស៊ូនោះគឺក្រោយពីគាត់លែងលះប្រពន្ធដើមហើយបានយកគ្នាជាមួយប្រពន្ធបច្ចុប្បន្ន ជាប្អូនស្រី បង្កើតរបស់ភរិយាលោក គន់ គីម អគ្គមេបញ្ជាការរងកងយោធពលខេមរភូមិន្ទ។
លោក ឱម យិុនទៀង បន្ថែមថា ក្រោយហៅប្រពន្ធ កូន និងលោក គឹម រស្មី មកសួរ គឺទ្រព្យសម្បត្តិដែលលោកគឹមរស្មីមានសព្វថ្ងៃបានពីការពង្រីកមុខរបរដាំកៅស៊ូនិងដោយសារប្រពន្ធក្រោយប្រសប់រកស៊ី។ លើសពីនេះ ផ្ទះ ១ កន្លែងនៅក្បែរវត្តលង្ការាជធានីភ្នំពេញដែលត្រូវដាក់ប្រកាសលក់ក្នុងតម្លៃ ១១ លានដុល្លារ គឺជាទ្រព្យផ្ទាល់ដែលប្រពន្ធក្រោយរបស់លោក គឹមរស្មី បានទិញកាលពី ១០ ឆ្នាំមុន តែក្នុងតម្លៃ ១ លានដុល្លារ។
លោកថា៖ «អានេះប្រភពមួយដែលយើងរកឃើញ ឯផ្ទះវីឡាគាត់ទិញមកប៉ុន្មានអីប៉ុន្មានយើងហៅមកសួរឡើងស្ងួតជើងធ្មេញ ហើយក្រុមប្រឹក្សាជាតិប្រឆាំងអំពើពុករលួយណែនាំឱ្យអង្គភាពផ្សាយរឿងហ្នឹងឱ្យលឿន ពីព្រោះសាធារណមតិ និងហ្វេសប៊ុកយកចិត្តទុកដាក់ខ្លាំង»។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃអង្គការអាដហុកបានថ្លែងថាលោកនិងពលរដ្ឋជាច្រើននៅតែមិនទាន់ពេញចិត្តការស៊ើបអង្កេតនេះ ដោយលោកថា លោក គឹម រស្មី គឺជាតួអង្គដ៏សំខាន់មួយទទួលខុសត្រូវចំពោះការកាប់បំផ្លាញព្រៃឈើក្នុងខេត្តរតនគិរី ព្រោះកាលពីឆ្នាំ ២០១០ នៅខេត្តរនតគិរី ក្នុងរយៈពេលតែ ១០ ថ្ងៃ គឺមានរថយន្តដឹកឈើទម្ងន់ ១០០ តោនបានដឹកឈើចេញទៅវៀតណាម ២៦០ ឡាន ដោយក្នុង ១ ឡាន ឈ្មួញត្រូវបង់លុយឱ្យមន្ត្រី ២ ម៉ឺន ៣ ពាន់ដុល្លារ។
លោកថា៖ «អ៊ីចឹងត្រឹមតែ ១០ ថ្ងៃ ចុះតាំងពីមុនមកៗដល់ឥឡូវហ្នឹង បើយើងវិភាគលុយត្រឹម ៥០ ម៉ឺនដុល្លារ វាមិនច្រើនដែលរហូត (លោក គឹម រស្មី) រកមិនបានទេបើយើងមើលតាមការបាត់បង់ព្រៃឈើ»។
លោក ព្រាប កុល នាយកប្រតិបត្តិអង្គការតម្លាភាពកម្ពុជាក៏បានលើកឡើងដែរថា ការចែកសែកឱ្យកូនដោយគ្មានលុយគឺជារឿងចម្លែក និងពិបាកជឿ។
លោកថា៖ «ឪពុកជូនកាដូឱ្យកូនជាសែកធនាគារ ហើយប្រកាសក្ដែងៗប្រាប់គេឯងជាសាធារណៈក្នុងពិធីជប់លៀង។បើសែកនោះក្លែងក្លាយវាជារឿងចម្លែកផង ជារឿងអគុណធម៌ផង។ អគុណធម៌គឺនៅត្រង់ថា ឪពុកម្ដាយបោកប្រាស់កូនខ្លួនឯងជាសាធារណៈ»។
យ៉ាងណាក្ដី លោក ឱម យ៊ិនទៀង បញ្ជាក់ថា ACU នៅបន្តស៊ើបអង្កេតសម្ងាត់លើលោក គឹម រស្មី ១ ករណីទៀត រឿងបទល្មើសព្រៃឈើដែលអាចទទួលបានការសូកប៉ាន់ពីឈ្មោះ ហូ ជីវៃ ដែលគេថា ជាមេខ្លោងធំខាងបទល្មើសព្រៃឈើ។
លោកថា៖ «ប៉ុន្តែយើងខ្ញុំនៅជំពាក់រឿងព្រៃឈើ ១ សុំនិយាយដោយត្រង់ ហើយស៊ើបអង្កេតវគ្គមុនរឿងព្រៃឈើហ្នឹង គឺ ហូ ជីវៃ។ កូនឯងអាចឮហើយឈ្មោះនេះ ហ្វេសប៊ុកម្ដុំនោះនិយាយខ្លាំងណាស់ ប៉ុន្តែភ័ស្ដុតាង ២ បញ្ច្រសគ្នា ខាងអ្នកកាសែតថា គាត់នេះគឺជាមេខ្លោងធំអំពីឈើ គាត់ប៉ាវចិញ្ចឹមគ្រប់ (មន្ត្រី) ដល់ពេលយើងជួប គឹម រស្មី គឹម រស្មី ថា ហូ ជីវៃ នេះគឺជាមនុស្សអ្នកក្រ អត់លុយមាណផង ហើយយើងចូលទៅមើល មនុស្សហ្នឹងលេងតែល្បែងមិនមែនអ្នកមានខ្លាំង ហើយហេតុអី យើងនៅតែបើក (ស៊ើបអង្កេត) ទៀត ព្រោះគាត់ក្រ ប៉ុន្តែមានលុយលេងល្បែងរាល់ថ្ងៃរាល់ខែរាប់ឆ្នាំ»។
ប៉ុន្តែលោក ប៉ែន ប៊ុណ្ណារ៍ អះអាងថា ការស៊ើបអង្កេតអំពើពុករលួយរបស់លោក គឹម រស្មី ជុំវិញបទល្មើសព្រៃឈើនេះមិនពិបាកឡើយ ហើយសាក្សីជាច្រើនអាចផ្ដល់ភ័ស្ដុតាង។
លោកថា៖ «យើងឃើញមានការចុះក្នុងប្រព័ន្ធផ្សព្វផ្សាយច្បាស់ៗណាស់ អ៊ីចឹងសាក្សីដ៏សំខាន់ក្នុងការស្រាវជ្រាវរកទឹកលុយទាំងអស់នោះ អំពើពុករលួយទាំងអស់នោះមិនពិបាកទេ»។
ចំណែកករណីលោក ស្រេង សុខា ស្នងការរងនគរបាលខេត្តកណ្ដាលដែលបង្ហាញថ្លៃបណ្ណាការភ្ជាប់ពាក្យដ៏សម្បើមនោះ ក៏ត្រូវបានលោក ឱម យិុនទៀង អះអាងដែរថា ជាការសម្ញែងទ្រព្យដូច លោក គឹម រស្មីដែរ ព្រោះវត្ថុមានតម្លៃទាំងនោះគឺដាំពេជ្រក្លែងក្លាយ ហើយថ្លៃបណ្ណាការ ១០ ម៉ឺនដុល្លារគឺជាលុយខាងស្រីប៉ុណ្ណោះ។
លោកថា៖ «អានាឡិកាគាត់សុទ្ធតែក្លែងក្លាយទេ អត់មានតម្លៃអីប៉ុន្មានទេ ប៉ុន្តែឃើញអាឡានគេល្អ វាទៅថតរួចហើយផុសទៅ គេច្រឡំថាឡានវា តែមិនមែនឡានវាផងហ្នឹង ហើយហៅសួរ វាថាឯកឧត្តមអើយ ឡានហ្នឹងឡានរបស់គេខ្ញុំថតយកសម្ញែងហ្នឹង ហើយនាឡិកាពេជ្រ ម៉េចមិនប្រកាសទ្រព្យ ប៉ុន្តែគាត់ថា ឯកឧត្តម នាឡិកាហ្នឹងក្លែងក្លាយតើម៉ា ២៥ ដុល្លារហ្នឹង»៕