.jpg)
លោក ឱម យ៉ិនទៀង ប្រធាន ACU។ ហុង មិនា
ភ្នំពេញៈ អង្គភាពប្រឆាំងអំពើពុករលួយកាលពីម្សិលមិញបានសម្រេចពិនិត្យលើពាក្យប្ដឹងរបស់ប្រជាពលរដ្ឋ ២ នាក់ដែលបានដាក់ពាក្យប្ដឹងចោទប្រកាន់មន្ត្រីនគរបាលម្នាក់ និងមេធាវីម្នាក់ដែលបានឃុបឃិតទទួលសំណូកជាទឹកប្រាក់ចំនួនសរុប ១៣០០០ ដុល្លារសហរដ្ឋអាមេរិកក្នុងកិច្ចអន្តរាគមន៍ដោះលែងជនសង្ស័យម្នាក់ដែលត្រូវបាននគរបាលចាប់ខ្លួន។
យោងតាមពាក្យបណ្តឹងដែលធ្វើនៅថ្ងៃទី ២០ ខែឧសភា ឆ្នាំ ២០១៨ ដែលមានស្នាមមេដៃរបស់ម្ចាស់ពាក្យប្ដឹងឈ្មោះ តាំង បុប្ផា និងឈ្មោះ តាំង ហុតជី បានចោទប្រកាន់លោកវរសេនីយ៍ទោ សុខ រិទ្ធ នាយរងការិយាល័យអន្តរាគមន៍ និងតម្រួតបទបញ្ជានៃស្នងការដ្ឋាននគរបាលរាជធានីភ្នំពេញ និងលោកមេធាវីឈ្មោះ ឌុល សុខា ពាក់ព័ន្ធករណីពុករលួយដោយរត់ការសូកប៉ាន់ តុលាការ និងជ្រៀតជ្រែកកិច្ចការតុលាការរាជធានីភ្នំពេញ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានបញ្ជាក់ប្រាប់ភ្នំពេញប៉ុស្តិ៍កាលពីម្សិលមិញថា៖ «យើងទទួលបាននៅថ្ងៃនេះថ្ងៃស្អែក (ថ្ងៃទី៧ ខែមិថុនា ឆ្នាំ ២០១៨) យើងនឹងដាក់ពាក្យប្ដឹងចូលអង្គប្រជុំពេលព្រឹក (ដែលយើងមាន) break fast meeting រាល់ព្រឹកម៉ោង ៧:៣០ គឺប្រជុំពាក្យប្ដឹង ហើយពាក្យប្ដឹងត្រូវដាក់ចូលហើយម្ចាស់ពាក្យប្ដឹងអាចចូលរួមស្ដាប់បាន»។
លោក សុខ រិទ្ធ កាលពីម្សិលមិញមិនអាចទាក់ទងតាមលេខទូរស័ព្ទដែលភ្ជាប់ជាមួយនៅក្នុងពាក្យបណ្ដឹងនោះទេ។
លោកមេធាវី ឌុល សុខា កាលពីម្សិលមិញបានអះអាងប្រាប់ភ្នំពេញប៉ុស្តិ៍ថា លោកបានការពារក្ដីឲ្យលោក ទួន សុវណ្ណា តែមិនបានទទួលយកសំណូកសូកប៉ាន់ដូចមានការចោទប្រកាន់នោះទេ។
លោក សុខា ថ្លែងថា៖ «ខ្ញុំមិនធ្វើអ្វីដូចដែលការចោទប្រកាន់ទេ ហើយខ្ញុំការពារក្តី ខ្ញុំយកតែសេវាការពារក្តីរបស់ខ្ញុំទេហើយខ្ញុំមិនពាក់ព័ន្ធនឹងរឿងអំពើពុករលួយទេ ហើយពេលខ្ញុំយកសេវាការពារក្តី ខ្ញុំមានវិក្កយបត្រ ហើយខ្ញុំមិនយកលុយកូនក្តីទៅធ្វើការងារបែបនេះទេ ហើយការងារនេះគឺជានីតិវិធីរបស់តុលាការហើយខ្ញុំមិនបានទៅជ្រៀតជ្រែក ហើយតុលាការគាត់ធ្វើការតាមនីតិវិធីរបស់គាត់»។
យោងតាមពាក្យប្ដឹងរបស់ លោកស្រី បុប្ផា និងលោក ហុតជី បានឲ្យដឹងថា ប៉ូលិសក្រសួងមហាផ្ទៃបានចាប់ខ្លួនជនសង្ស័យឈ្មោះ ទួន សុវណ្ណា ភេទប្រុសអាយុ ៣៥ ឆ្នាំមុខរបរអគ្គនាយកមីក្រូហិរញ្ញវត្ថុបញ្ជូនទៅតុលាការ។ លោក មេធាវី ឌុល សុខា និងលោក សុខ រិទ្ធ ជាបុគ្គលស្ទាត់ជំនាញ និងមានឥទ្ធិពលខាងជួយអន្តរាគមន៍ដោះលែងជនសង្ស័យ។
លោកស្រី បុប្ផា និងលោក ហុតជី បានអះអាងនៅក្នុងពាក្យប្ដឹងថា៖ «ទង្វើបែបនេះធ្វើឲ្យប៉ះពាល់យ៉ាងខ្លាំងនូវប្រព័ន្ធយុត្តិធម៌របស់ជាតិយ៉ាងធ្ងន់ធ្ងរ ពិសេសធ្វើឲ្យប៉ះពាល់ដល់សន្លឹកឆ្នោតដែលមិនអាចលើកលែងបានហេតុដូចនេះសូម (អង្គភាពប្រឆាំងអំពើពុករលួយ) ស្រាវជ្រាវស៊ើបអង្កេតរឿងនេះឲ្យបានល្អិតល្អន់ និងផ្តន្ទាទោសជនល្មើសទៅតាមច្បាប់»។
យោងតាមសេចក្ដីជូនដំណឹងស្ដីពីកិច្ចប្រជុំរបស់ក្រុមប្រឹក្សាជាតិប្រឆាំងអំពើពុករលួយដែលចេញនៅថ្ងៃទី ៣១ ខែឧសភា ឆ្នាំ ២០១៨ បានឲ្យដឹងថា អង្គភាពប្រឆាំងអំពើពុករលួយបានទទួលពាក្យប្ដឹងចំនួន ៣៤ ពាក្យ (អានាមិក ១៤ ពាក្យស្មើនឹង ៤១ ភាគរយ)។ អង្គភាពបានឲ្យសាមីខ្លួនរងការចោទប្រកាន់ធ្វើការបំភ្លឺចំនួន ១១ លិខិតទទួលបានការបំភ្លឺចំនួន ១៦ លិខិត ហើយបានឆ្លើយតបទៅម្ចាស់បណ្ដឹងចំនួន ៣៣ ម្ចាស់បណ្ដឹង ក្រោយពិចារណាថាពាក្យប្ដឹងរបស់គាត់មិនពាក់ព័ន្ធដល់សមត្ថកិច្ចអង្គភាពប្រឆាំងអំពើពុករលួយ៕
