.jpg)
មន្ត្រីមន្ទីររៀបចំដែនដីខេត្តពោធិ៍សាត់ទាំង ៣ នាក់នេះ ត្រូវបានចាប់ខ្លួនទាក់ទងអំពើពុករលួយ។ សហការី
ភ្នំពេញៈ អង្គភាពប្រឆាំងអំពើពុករលួយ (ACU) បានរកឃើញលុយទទួលពីអំពើពុករលួយបន្ថែមទៀតរបស់ប្រធានមន្ទីរសុរិយោដីខេត្តពោធិ៍សាត់ លោក លៀម ប៊ុនរឿន ដែលបានប្រព្រឹត្តល្មើសច្បាប់ ១៤០ ករណី សរុបចំនួនជិត ៤០ ម៉ឺនដុល្លារ ក្នុងរយៈពេលនៃការកាន់តំណែង ៣ ឆ្នាំ ក្រោយពីជននេះត្រូវបានសាលាដំបូងរាជធានីភ្នំពេញសម្រេចឃុំខ្លួនពាក់ព័ន្ធអំពើពុករលួយចំនួន ១០ ម៉ឺនដុល្លារ។
តាមសេចក្ដីជូនដំណឹងស្ដីពីកិច្ចប្រជុំលើកទី៤៨ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ ចុះថ្ងៃទី ៣០ កក្កដា ដែលភ្នំពេញប៉ុស្ដិ៍ ទទួលបានកាលពីម្សិលមិញឲ្យដឹងថា តាមការស្រាវជ្រាវរកបានភ័ស្ដុតាងរបស់ ACU និងតាមការសារភាពរបស់សាមីខ្លួន តាំងពីឆ្នាំ ២០១៦ មក លៀម ប៊ុនរឿន បានយកសេវាក្រៅច្បាប់ចំនួន ១៤០ ករណី បានប្រាក់ ៣៧២ ៧៤៧ ដុល្លារអាមេរិក និងជាង ៤៩ លានរៀល។ នោះមិនទាន់រាប់ករណី ដែល លៀម ប៊ុនរឿន ទទួលបានប្រាក់ ២ ម៉ឺនដុល្លារ ដូចពាក្យបណ្ដឹងដែល ACU បានទទួលនោះផង។
អង្គភាពប្រឆាំងអំពើពុករលួយបន្តថា ACU បានរកឃើញលុយចំនួន ១៧ ៥២៩ ដុល្លារអាមេរិក និង ១៦ ២៥០ ០០០ រៀល ក្នុងនោះមានលុយដែលដាក់ក្នុងស្រោមសំបុត្រចំនួន ៦ ស្រោមសំបុត្រ និងឯកសារមួយចំនួនត្រូវបានរកឃើញនៅក្នុងការិយាល័យរបស់លោក លៀម ប៊ុនរឿន នៅថ្ងៃទី ២៧ កក្កដា ឆ្នាំ ២០១៩ ដែលសាមីខ្លួនទទួលស្គាល់ថា ជាលុយបានដោយខុសច្បាប់មួយចំនួន។
ACU បានបញ្ជាក់ថា៖ «ជារួមក្រោយពីទទួលបានតំណែងជាប្រធានមន្ទីរសុរិយោដីខេត្តពោធិ៍សាត់ កាលពីឆ្នាំ ២០១៦ មក រហូតដល់ថ្ងៃឃាត់ខ្លួន លោក លៀម ប៊ុនរឿន បានប្រើប្រាស់ប្រាក់ដែលជាផលនៃបទល្មើសក្នុងការជួសជុលផ្ទះ ៤០ ០០០ ដុល្លារ និងទិញផ្ទះចំនួន ២ កន្លែង (១៦៨ ០០០ ដុល្លារ និង ៧២ ០០០ ដុលា្លរ) ដីមួយកន្លែង ៤៤ ០០០ ដុល្លារ។ សង់ផ្ទះត្រចៀកកាំអស់ ៤០ ០០០ ដុល្លារទៀត ដូរឡាន Lexus 570 ទិញឡាន KIA Picanto ដើម្បីទុកដាក់ប្រាក់ពីផលបទល្មើសរបស់ខ្លួន»។
លោក ព្រាប កុល ប្រធានអង្គការតម្លាភាពកម្ពុជា (TI) បានថ្លែងថា បញ្ហាអំពើពុករលួយនៅកម្ពុជា ភាគច្រើនតែងតែកើតមានឡើងនៅតាមមន្ទីរ ស្ថាប័ន ដែលមានឱកាសក្នុងការធ្វើលិខិតស្នាម និងឯកសារផ្សេងៗដែលមានពាក់ព័ន្ធនឹងចំនួនទឹកប្រាក់។
លោកបញ្ជាក់ថា៖ «ស្ថាប័នដែលជាកន្លែងខ្លាញ់ ឬមានហាងឆេងច្រើន ភាគច្រើនទៅលើការស៊ីញ៉េ (ហត្ថលេខា) ឬការធ្វើឯកសារអចលនទ្រព្យផ្សេងៗដែលមានចំនួនទឹកប្រាក់ច្រើន គឺជាកន្លែងងាយប្រព្រឹត្ដអំពើពុករលួយច្រើន»។
លោក ព្រាប កុល គាំទ្រចំណាត់ការរបស់អង្គភាពប្រឆាំងអំពើពុករលួយចំពោះករណីខាងលើនេះ ដោយលោកចាត់ទុកថា ជាវិធានការត្រឹមត្រូវ។ លោកចង់ឃើញការអនុវត្ដវិធានការបែបនេះតាមស្ថាប័នផ្សេងៗទៀតឲ្យមានប្រសិទ្ធភាព ដើម្បីកាត់បន្ថយ និងទប់ស្កាត់អំពើពុករលួយនៅកម្ពុជា។
លោកបន្តថា តាមការសង្កេត ឃើញថា ការទប់ស្កាត់ និងលុបបំបាត់អំពើពុករលួយនៅកម្ពុជា គឺនៅតែមានចំណុចត្រូវកែលម្អបន្ថែម ទោះបីកន្លងមកមានវិធានការពីថ្នាក់ដឹកនាំកម្ពុជាខ្លះក៏ដោយ។ ប៉ុន្ដែនៅតែមានការខ្វះខាតពីភាពអសកម្ម និងចន្លោះប្រហោងច្រើនទៀត ត្រូវតែបន្តធ្វើការកែលម្អបន្ថែម។
មន្ត្រីសុរិយោដីខេត្តពោធិ៍សាត់ទាំង ៣រូប ដែលត្រូវបានអង្គភាពប្រឆាំងអំពើពុករលួយ បញ្ជូនទៅកាន់សាលាដំបូងរាជធានីភ្នំពេញនោះ មានឈ្មោះ លៀម ប៊ុនរឿន ប្រធានមន្ទីរសុរិយោដីខេត្តពោធិ៍សាត់ ឈ្មោះ ជាង វុទ្ធី អនុប្រធានមន្ទីរទទួលការងារសំណង់ និងឈ្មោះ តែ ប៊ុនថេង មន្ត្រីសុរិយោដីខេត្តទទួលបន្ទុកច្រក។ ពួកគេត្រូវបាន ACU ឃាត់ខ្លួននៅខេត្តពោធិ៍សាត់ កាលពីថ្ងៃទី ២៧ ខែ កក្កដា ឆ្នាំ ២០១៩ ដោយសង្ស័យប្រព្រឹត្តអំពើពុករលួយ ទារលុយពីម្ចាស់ដីដោយខុសច្បាប់ចំនួន ១០ ម៉ឺនដុល្លារ ជាថ្នូរនឹងការចេញច្បាប់សាងសង់។
កាលពីល្ងាចថ្ងៃទី ៣១ ខែ កក្កដា ឆ្នាំ ២០១៩ ចៅក្រមស៊ើបសួរនៃសាលាដំបូងរាជធានីភ្នំពេញ បានសម្រេចឃុំខ្លួន មន្ត្រីមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ទាំង ៣ នាក់ ដោយដាក់ពន្ធនាគារព្រៃសជាបណ្តោះអាសន្នក្រោមការចោទប្រកាន់ចំនួន ៣ បទល្មើស។ ក្នុងនោះរួមមាន ទី១-បទវិតិក្រម តាមក្រមព្រហ្មទណ្ឌ ទី២-បទរំលោភអំណាច តាមច្បាប់ស្ដីពីការប្រឆាំងអំពើពុករលួយ និងទី៣-បទសម្អាតប្រាក់ តាមច្បាប់ស្ដីពីការប្រឆាំងការសម្អាតប្រាក់ និងហិរញ្ញវត្ថុ៕
