.jpg)
លោកគឹម រស្មី មុនពេលបណ្ដេញចេញពីក្របខ័ណ្ឌ។ ហ្វេសប៊ុក
ភ្នំពេញៈ លោក ឱម យ៊ិនទៀង ប្រធានអង្គភាពប្រឆាំងអំពើពុករលួយ (ACU) កាលពីម្សិលមិញបានអះអាងថា អង្គភាពបាននិងកំពុងធ្វើការស៊ើបអង្កេតទៅលើលោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី រួចហើយ ទោះបីមិនទាន់ទទួលបានពាក្យបណ្ដឹងផ្លូវការពីប្រភពណាមួយក៏ដោយ។
លោក ឱម យិុនទៀង ថ្លែងថា៖ «អង្គភាពប្រឆាំងអំពើពុករលួយពិតជាបានធ្វើការស៊ើបអង្កេតទៅលើករណីលោក គឹម រស្មី ពិតប្រាកដមែន ការស៊ើបអង្កេតនេះមិនបានធ្វើតាមពាក្យបណ្ដឹងសមាគមណាមួយនោះ (ទេ) នេះមិនមែនជាការពិត។ យើងបានបើកការស៊ើបអង្កេតនេះដោយសមត្ថកិច្ចរបស់ខ្លួនយើង ដោយព័ត៌មានផ្ទាល់របស់ខ្លួនយើង យើងបូកជាមួយព័ត៌មានចំហផ្សេងៗ ដែលគេបានផ្សព្វផ្សាយ ជាទុនមួយសំខាន់ឲ្យយើងខ្ញុំធ្វើការស្រាវជ្រាវ»។
លោក យុិនទៀង អះអាងថា៖ «ខ្ញុំបានបើកការស៊ើបអង្កេតហើយសូមសាធារណជនមេត្តាជ្រាបជាព័ត៌មាន យើងខ្ញុំបង្កើនល្បឿនណាស់មិនឲ្យមានការយឺតយ៉ាវទេ។ យើងមានដំណាក់កាលច្រើន ដំណាក់កាលស្រាវជ្រាវព័ត៌មានសិន ហើយដល់ពេលយើងឃើញតម្រុយហើយ បានយើងមានការប្រជុំដើម្បីពិនិត្យបើកឬមិនបើកការស៊ើបអង្កេត»។
លោក ថ្លែងថាអង្គភាពប្រឆាំងអំពើពុករលួយធ្វើការស៊ើបអង្កេតគឺធ្វើឡើងមិនមានថិរវេលាកំណត់ឡើយ។ ព្រះករុណាព្រះបាទសម្ដេចព្រះបរមនាថ នរោត្តម សីហមុនី បានចេញរាជក្រឹត្យត្រាស់បង្គាប់លុបឈ្មោះឧត្តមសេនីយ៍ត្រី គឹម រស្មី ចេញពីក្របខ័ណ្ឌកងយោធពលខេមរភូមិន្ទកាលពីថ្ងៃទី ៩ កុម្ភៈ។ ខណៈលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាអះអាងថា ការលុបឈ្មោះមន្ត្រីរូបនេះគឺជាការវះកាត់ប្រកបដោយការឈឺចាប់។ ទន្ទឹមនោះដែរមន្ត្រីរាជរដ្ឋាភិបាលពន្យល់ថាគឺជាខ្សែបន្ទាត់ក្រហមមួយចំពោះការវិនិច្ឆ័យរបស់នាយករដ្ឋមន្រ្តីស្ដីពីភាពស្ពឹកស្រពន់ ឬភាពមិនប្រក្រតីរបស់មន្រ្តីនៅក្នុងជួររាជរដ្ឋាភិបាល។
ការបណ្ដេញចេញអតីតមេប៉េអឹមខេត្តរតនគិរី ចេញពីក្របខ័ណ្ឌនៃកងយោធពលខេមរភូមិន្ទ បានធ្វើឡើងក្រោយពីមានការផ្សព្វផ្សាយខ្សែវីដេអូបង្ហាញអំពីកម្មវិធីខួបកំណើតមួយតាមរយៈប្រព័ន្ធផ្សព្វផ្សាយសង្គមហ្វេសប៊ុក ដោយលោក គឹម រស្មី បានចំណាយលុយរហូត ៥០ ម៉ឺនដុល្លារដើម្បីចែកកូនៗចំនួន ៥ នាក់ធ្វើជាទុនសម្រាប់រកស៊ី ហើយក្រោយមកក៏រូបភាពផ្សេងទៀតបង្ហាញអំពីផ្ទះដ៏ស្កឹមស្កៃធ្វើឡើងពីឈើប្រណីតៗរបស់ គឹម រស្មី។
លោក រស់ សារ៉ុម ប្រធានសមាគមជយលាភីបញ្ញាជនកម្ពុជាកាលពីម្សិលមិញបានអះអាងថា មិនទាន់បានដាក់ពាក្យបណ្ដឹងទៅអង្គភាពប្រឆាំងអំពើពុករលួយនៅឡើយទេ។
លោក សារ៉ុម បានថ្លែងថា៖ «(យើង) នឹងបន្តតាមដានការស៊ើបអង្កេតរបស់អង្គភាព ACU នេះ ហើយ (យើង) នឹងនៅតែត្រៀមប្ដឹង នៅពេលសង្កេតឃើញថា អង្គភាពប្រឆាំងអំពើពុករលួយ បានអូសបន្លាយពេលយូរក្នុងការស៊ើបអង្កេត ហើយមិនអាចរកឃើញលទ្ធផលអ្វីសោះនោះ»។
លោក ប៉ែន ប៊ុណ្ណារ៍ មន្រ្តីកម្មវិធីពង្រឹងសិទ្ធិអំណាចសហគមន៍មូលដ្ឋាននៃអង្គការអាដហុកកាលពីថ្ងៃម្សិលមិញបានអះអាងដដែលថានៅតែត្រៀមរៀបចំបណ្ដឹងបរិហារផ្លូវការទៅតុលាការខេត្តរតនគិរី ដោយត្រៀមដាក់នៅមុនថ្ងៃទី ២៥ ខែកុម្ភៈ ស្ដីពីការបាត់បង់ព្រៃឈើក្នុងខេត្តរតនគិរី។
លោក ប៊ុណ្ណារ៍ ថ្លែងថា៖ «ការបាត់បង់ព្រៃឈើក្នុងតំបន់ (ខេត្តរតនគិរី) ហ្នឹង គួបផ្សំនឹងការបង្ហាញទ្រព្យសម្បត្តិរបស់គាត់វាច្រើនអ៊ីចឹងទៅ យើងដាក់ការសង្ស័យថា គាត់ប្រាកដជាមានចំណែកពីការកាងអ៊ីចឹងហើយ (កាងរថយន្តដឹកឈើចូលក្នុងប្រទេសវៀតណាម) »៕
