.jpg)
បុរសម្នាក់ដើរកាត់អង្គភាពប្រឆាំងអំពើពុករលួយ នាពេលកន្លងមក។ ភ្នំពេញ ប៉ុសិ៍្ត
ភ្នំពេញ: សមាជិកក្រុមប្រឹក្សាជាប់ឆ្នោតកាលពីខែឧសភា ដែលទទួលបានតំណែងថ្មីលើកដំបូងឬឈប់ជាស្ថាពរពីសមាជិកហើយមិនមានជាប់មុខងារផ្សេងទៀតដែលមានកាតព្វកិច្ចប្រកាសទ្រព្យសម្បត្តិ និងបំណុលនោះទេ ត្រូវអនុវត្តការប្រកាសទ្រព្យសម្បត្តិ និងបំណុលយ៉ាងយូរបំផុត ៣០ ថ្ងៃ ក្រោយការចូលកាន់តំណែង ឬក្រោយពីឈប់ពីមុខតំណែងនេះ។
យោងតាមសេចក្ដីជូនដំណឹងរបស់អង្គភាពប្រឆាំងអំពើពុករលួយ (ACU) កាលពីថ្ងៃទី ១៩ ខែ មិថុនា។ ប៉ុន្តែសមាជិកក្រុមប្រឹក្សារាជធានី ខេត្ត ក្រុង ស្រុក ឃុំ ខណ្ឌ ដែលធ្លាប់បានប្រកាសទ្រព្យសម្បត្តិ និងបំណុលក្នុងឆ្នាំ ២០១៨ និងឆ្នាំ ២០១៩ ហើយបានជាប់ឆ្នោតបន្តតំណែងក្នុងក្រុមប្រឹក្សា មិនមានការចាំបាច់អនុវត្តការប្រកាសទ្រព្យសម្បត្តិ និងបំណុលនោះទេក្រោយចូលកាន់តំណែងថ្មីម្ដងទៀត។
អ្នកចូលកាន់តំណែងថ្មីអាចមកប្រកាសទ្រព្យសម្បត្តិនិងបំណុល អាចមកកាន់ ACU ដោយមកផ្ទាល់ ឬផ្ញើតាមក្រុមជនបង្គោលប្រឆាំងអំពើពុករលួយប្រចាំរាជធានី ខេត្ត ឬក្រសួងមហាផ្ទៃផ្នែករដ្ឋបាលស៊ីវិល ឬផ្ញើតាមបុគ្គលណាម្នាក់ដែលខ្លួនទុកចិត្ត។
លោក ប៉ា សុជាតិវង្ស ប្រធានក្រុមប្រឹក្សារាជធានីដែលទើបចូលកាន់តំណែងថ្មីៗនេះបានថ្លែងថា តាមច្បាប់ដែលបានចែង មន្ត្រីរាជការដែលមានតួនាទី និងឈ្មោះជាប់ក្នុងច្បាប់នោះ ត្រូវតែគោរព និងអនុវត្តតាមជាកំហិត។
លោកថ្លែងថា៖ «ខ្ញុំគិតថា យើងមន្ត្រីរាជការ គឺចូលរួមអនុវត្តទាំងអស់គ្នា ព្រោះវាមានប្រយោជន៍ចំពោះជាតិយើង។ អាហ្នឹងវាមានប្រយោជន៍ហើយ បានជាគេឲ្យយើងប្រកាសទ្រព្យសម្បត្តិយើងបែបនេះ យើងជាអ្នកដឹកនាំគេ អ៊ីចឹងត្រូវធ្វើឲ្យវាត្រឹមត្រូវអ៊ីចឹងហើយ»។
លោក ព្រាប កុល នាយកប្រតិបត្តិអង្គការតម្លាភាពកម្ពុជា (TI) បានថ្លែងថា ការជូនដំណឹងរបស់ ACU នេះ គឺស្របតាមច្បាប់ ប៉ុន្ដែអ្វីដែលសង្គមស៊ីវិល និងប្រជាពលរដ្ឋចង់បាននោះ គឺចង់ឃើញការប្រកាសនេះ ប្រព្រឹត្តទៅឲ្យមានតម្លាភាព និងតម្កល់ឯកសារជាសាធារណៈ។ ដូច្នេះ តម្រូវឲ្យធ្វើវិសោធនកម្មច្បាប់បច្ចុប្បន្ននេះ ដើម្បីឲ្យមានការតម្កល់ឯកសារជាសាធារណៈឲ្យមហាជនបានដឹងឮ ឬទុកនៅកន្លែងដែលអាចទទួលយកបានពេលដែលត្រូវការវា។
លោកថ្លែងថា៖ «រឿងហ្នឹងវាមានប្រយោជន៍ដែរ តែវាតិចតួចទេ ខ្ញុំថា បើមានមន្ត្រីសាធារណៈម្នាក់ហ្នឹង ទទួលការស្នើសុំពីតុលាការ តាមបណ្ដឹងណាមួយអ៊ីចឹង ទើបតុលាការបញ្ជាឲ្យបើកស្រោមសំបុត្រហ្នឹង ដើម្បីមើលអ្វីក្នុងសំបុត្រហ្នឹង អ៊ីចឹងវាមានប្រយោជន៍នៅពេលហ្នឹង ប៉ុន្ដែនៅស្រុកយើង តើមានប៉ុន្មាននាក់ដែលឆ្លងកាត់ការប្ដឹងផ្ដល់បែបនេះ?ខ្ញុំថា វាមិនទាន់មានទេ បើមានក៏ក្នុងករណីពិសេស រឿងនយោបាយដែរ»៕
