ភ្នំពេញៈ អង្គភាពប្រឆាំងអំពើពុករលួយ (ACU) បានចេញលិខិតឱ្យលោក យឹម ឡាលី ប្រធានក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុនៃអគ្គនាយកដ្ឋានអន្តោប្រវេសន៍ចូលឆ្លើយបំភ្លឺជុំវិញការទទួលយកលុយជនបរទេសដែលគ្មានបណ្ណការងារលើសពីចំនួនកំណត់ត្រូវផាកពិន័យជាករណីដែលសាមីខ្លួនបានបដិសេធថាមិនបានធ្វើអ្វីខុសនឹងច្បាប់។
កាលពីថ្ងៃទី ៩ កញ្ញា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានផ្ញើលិខិតទៅលោកឧត្ដមសេនីយ៍ទោ យឹម ឡាលី ដែលជាមន្ត្រីនគរបាលមានតួនាទីជាប្រធានក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុ ដើម្បីឲ្យឆ្លើយបំភ្លឺអំពីនីតិវិធី និងលក្ខខណ្ឌនៃការផាកពិន័យ និងការទទួលបានថវិកាលើសពីការផាកពិន័យដោយត្រូវផ្ដល់ឯកសារពាក់ព័ន្ធមក ACU ឱ្យបានឆាប់ដើម្បីមានជាមូលដ្ឋានបន្តនីតិវិធី។
លិខិតនោះបញ្ជាក់ថាអង្គភាពប្រឆាំងអំពើពុករលួយបានទទួល និងពិនិត្យលើពាក្យបណ្ដឹងដែលបានរៀបរាប់ថាកាលពីថ្ងៃទី ១២ ខែ សីហា ឆ្នាំ ២០១៩ ក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុដឹកនាំដោយលោក (យឹម ឡាលី) បានចុះដល់ទីតាំងកាស៊ីណូស៊ឹងឈឹងនៅសង្កាត់ ១ ក្រុងព្រះសីហនុ ខេត្តព្រះសីហនុដើម្បីត្រួតពិនិត្យអនុវត្តច្បាប់ស្ដីពីអន្តោប្រវេសន៍ និងច្បាប់ការងារ»។
បើតាមលិខិតដដែលពេលចុះអធិការកិច្ចនោះគឺមានការផាកពិន័យជនបរទេសគ្មានបណ្ណការងារចំនួន ៥៧ នាក់ ដោយក្នុង ១ នាក់ ត្រូវបង់ចំនួន ១២៥ ដុល្លារ និងសរុបទាំង ៥៧ នាក់ ស្មើនឹង ៧ ១២៥ ដុល្លារ និងការពិន័យដាក់ដោយឡែកចំនួន ១ ៦៨០ ដុល្លារ ដោយសារមិនអនុវត្តតាមសេចក្ដីជូនដំណឹងស្ដីពីបុគ្គលិកសេចក្ដីប្រកាសជូនដំណឹងស្ដីពីចលនាបុគ្គលិក និងលិខិតអនុញ្ញាតឱ្យប្រើប្រាស់ហត្ថពលកម្មបរទេស។
ប៉ុន្តែលិខិតលោក ឱម យ៉ិនទៀង បានបន្តថា លោក យឹម ឡាលី បែរជាទទួលបានប្រាក់ពីតំណាងកាស៊ីណូចំនួន ២ ម៉ឺនដុល្លារ លើសពីចំនួនត្រូវផាកពិន័យរហូតចំនួន ១១ ១៩៥ ដុល្លារ។
ទោះជាយ៉ាងណាកាលពីម្សិលមិញលោក យឹម ឡាលី បានប្រាប់ភ្នំពេញប៉ុស្ដិ៍ថា លោកមិនបានធ្វើអ្វីខុសនឹងនីតិវិធីឡើយ ហើយនឹងចូលទៅបំភ្លឺជូនអង្គភាពប្រឆាំងអំពើពុករលួយក្នុងសប្ដាហ៍នេះ ប៉ុន្តែមិនទាន់បានកំណត់ពេលជាក់លាក់នៅឡើយទេ។
លោកថា៖ «ខ្ញុំមិនទាន់ដឹងថ្ងៃណាទេ ប៉ុន្តែខ្ញុំនឹងចូលទៅបំភ្លឺក្នុងសប្ដាហ៍ក្រោយ (សប្ដាហ៍នេះ) នៅពេលដែលរៀបចំឯកសារហើយ»។
កាលពីម្សិលមិញភ្នំពេញប៉ុស្ដិ៍មិនអាចសុំការបំភ្លឺពីលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ និងលោក អាត់ ប៊ុននី អ្នកនាំពាក្យអគ្គនាយកដ្ឋានអន្តោប្រវេសន៍បានទេ ដោយសារមិនមានអ្នកលើកទូរស័ព្ទ។
ទោះបីជាយ៉ាងណាកាលពីថ្ងៃទី ១៣ សីហា លោក យឹម ឡាលី បានធ្វើលិខិតរាយការណ៍មកលោក គៀត ច័ន្ទថារិទ្ធ អំពីមូលហេតុទទួលយកលុយលើសនោះថាគឺដោយសារខាងភាគីកាស៊ីណូបានផ្ដល់ឱ្យក្រុមការងារដែលមានមន្ត្រីតំណាងស្នងការរងទទួលផែនអន្តោប្រវេសន៍ តំណាងមន្ទីរការងារខេត្ត និងក្រុមអធិការកិច្ចមកពីអគ្គនាយកដ្ឋានអន្តោប្រវេសន៍សម្រាប់ចំណាយដោះស្រាយផ្សេងៗ។
លោកអះអាងថាការទទួលទឹកប្រាក់ទាំង ២ ម៉ឺនដុល្លារនោះ គឺធ្វើឡើងនៅចំពោះក្រុមការងារទាំងអស់ ហើយក្រុមការងារគឺបានឯកភាពទទួលយកទាំងអស់គ្នា។
លោក ជួន ណារិន្ទ ស្នងការនគរបាលខេត្តព្រះសីហនុបានប្រាប់ថា លោកមិនបានដឹងរឿងនេះច្បាស់ទេ ដោយសារការចុះធ្វើអធិការកិច្ចជនបរទេសជាក្រុមការងារដាច់ដោយឡែកដែលមានលោក យឹម ឡាលី ជាប្រធាន និងលោក យ៉ូវ ខេមរា ប្រធានមន្ទីរការងារខេត្តជាអនុប្រធាន ហើយមិនមែនជាការទទួលខុសត្រូវរបស់ស្នងការខេត្តឡើយ។
លោកថា៖ «ខាងខ្ញុំ គឺគ្រាន់តែជូនដំណឹងទេ គឺដំណឹងទីតាំងផ្សេងៗអ៊ីចឹងទៅ! ហើយដល់ការចុះដឹកនាំ (កម្លាំង) និងផាកពិន័យ គឺជាបច្ចេកទេសរបស់គាត់ [យឹម ឡាលី]»។
កាលពីម្សិលមិញមិនអាចទាក់ទងលោក យ៉ូវ ខេមរា ប្រធានមន្ទីរការងារសុំការបំភ្លឺបានទេដោយសារមិនអាចទាក់ទងបាន។
ដោយឡែកលោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាក៏មិនអាចទាក់ទងសុំការអត្ថាធិប្បាយពីបញ្ហានេះបានដែរ ខណៈទូរស័ព្ទលោក ឱម យ៉ិនទៀង ប្រធានអង្គភាពប្រឆាំងអំពើពុករលួយមិនមានអ្នកទទួលកាលពីម្សិលមិញ៕