ភ្នំពេញៈ ធនាគារអភិវឌ្ឍន៍អាស៊ី (ADB) និងក្រសួងសេដ្ឋកិច្ច និងហិរញ្ញវត្ថុកាលពីថ្ងៃពុធបានចុះហត្ថលេខាលើកិច្ចព្រមព្រៀងផ្ដល់ហិរញ្ញប្បទានចំនួន ២ ដែលមានជាទឹកប្រាក់ចំនួន ៨៩ លានដុល្លារអាមេរិក ដើម្បីលើកកម្ពស់សេវាផ្គត់ផ្គង់ទឹក និងអនាម័យនៅតាមតំបន់ជនបទ និងធ្វើឱ្យប្រសើរឡើងនូវការអភិវឌ្ឍវិស័យហិរញ្ញវត្ថុរបស់កម្ពុជា។
តាមសេចក្តីប្រកាសព័ត៌មានរបស់ ADB កាលពីថ្ងៃពុធបញ្ជាក់ថា ពិធីចុះហត្ថលេខានេះបានធ្វើនៅរាជធានីភ្នំពេញរវាងលោកស្រី Sunniya Durrani-Jamal នាយិការបស់ ADB ប្រចាំនៅកម្ពុជា និងលោកឧបនាយករដ្ឋមន្ត្រី អូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុសម្រាប់កម្មវិធីអភិវឌ្ឍន៍វិស័យផ្គត់ផ្គង់ទឹក និងអនាម័យជនបទលើកទី ៣ និងកម្មវិធីអភិវឌ្ឍន៍វិស័យហិរញ្ញវត្ថុប្រកបដោយបរិយាប័ន្ន។
ក្នុងសេចក្តីប្រកាសព័ត៌មាននោះលោកស្រី Durrani-Jamal បានថ្លែងថា៖ «កម្មវិធីទាំង ២ គាំទ្រដល់វិស័យអាទិភាពទាំង ៤ នៃយុទ្ធសាស្ត្រចតុកោណដំណាក់កាលទី ៤ ដែលជាការអភិវឌ្ឍធនធានមនុស្សតាមរយៈការកែលម្អការថែទាំសុខភាព និងអាហារូបត្ថម្ភសាធារណៈ ការធ្វើពិពិធកម្មសេដ្ឋកិច្ចតាមរយៈការលើកកម្ពស់ការអភិវឌ្ឍវិស័យហិរញ្ញវត្ថុ និងធនាគារ ការអភិវឌ្ឍវិស័យឯកជនការងារ និងមុខរបរដោយគាំទ្រសហគ្រាសធុនតូច និងមធ្យម និងការអភិវឌ្ឍប្រកបដោយចីរភាព និងបរិយាប័ន្នតាមរយៈការជំរុញការអភិវឌ្ឍកសិកម្ម និងជនបទ»។
សេចក្តីប្រកាសព័ត៌មានបានបញ្ជាក់ថា ពលរដ្ឋជាង ៤០ ម៉ឺននាក់នឹងទទួលបានអត្ថប្រយោជន៍ពីកម្មវិធីអភិវឌ្ឍន៍វិស័យផ្គត់ផ្គង់ទឹក និងអនាម័យជនបទលើកទី ៣ ដែលអនុម័តដោយ ADB កាលពីខែកញ្ញាតាមរយៈការស្ថាបនា និងស្តារឡើងវិញនូវកន្លែងផ្គត់ផ្គង់ទឹក និងអនាម័យចំនួន ២ ៥០០ កន្លែងក៏ដូចជាការអនុវត្តយុទ្ធនាការលើកកម្ពស់ការយល់ដឹងដល់ពលរដ្ឋយ៉ាងហោចណាស់ ៤០០ ភូមិនៅក្នុងខេត្តចំនួន ១០ របស់ប្រទេសកម្ពុជា។
សេចក្តីប្រកាសរបស់ ADB ដដែលថា សេវាកម្មផ្គត់ផ្គង់ទឹក និងអនាម័យប្រកបដោយចីរភាពដែលអាចជឿទុកចិត្តបាននៅតែខ្វះខាតនៅឡើយក្នុងតំបន់ជនបទនៃប្រទេសកម្ពុជាដែលមានពលរដ្ឋប្រមាណ ៧៧ ភាគរយនៃពលរដ្ឋសរុប ១៦,៤ លាននាក់រស់នៅតំបន់នេះ។
ក្នុងឆ្នាំ ២០១៧ ថ្វីបើ ៧៣ ភាគរយនៃគ្រួសារនៅជនបទទទួលបានការផ្គត់ផ្គង់ទឹកបានប្រសើរក្ដី ប៉ុន្តែមានតែ ១១ ភាគរយប៉ុណ្ណោះទទួលបានការផ្គត់ផ្គង់ទឹកតាមទុយោ។ ទន្ទឹមនឹងនេះពលរដ្ឋនៅតាមជនបទ ៥៦ ភាគរយទទួលបានអនាម័យប្រសើរ ប៉ុន្តែក្នុងចំណោមនោះប្រមាណ ៤១ ភាគរយនៅតែបន្ទោបង់ចំហដែលអាចបណ្តាលឱ្យរាក និងប៉ះពាល់សុខភាពសាធារណៈ។
លោក គឹម សុភៈ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុមិនអាចទាក់ទងសុំការបញ្ជាក់បន្ថែមបានទេកាលពីថ្ងៃម្សិលមិញ។ ប៉ុន្តែលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានប្រាប់ (AKP) ពីថ្ងៃព្រហស្បតិ៍ថា ហិរញ្ញប្បទានពី ADB នឹងបន្តរួមចំណែកយ៉ាងធំធេងក្នុងការអភិវឌ្ឍនៅកម្ពុជាដែលជួយកាត់បន្ថយភាពក្រីក្រពីពលរដ្ឋ។
លោកបានបញ្ជាក់ថា៖ «មកដល់ពេលនេះ ADB បានផ្តល់ហិរញ្ញប្បទានសរុបចំនួនប្រមាណ ៣,៣៦ ប៊ីលានដុល្លារអាមេរិកដោយគិតបញ្ចូលទាំងកម្មវិធីទាំង ២ ដែលបានចុះហត្ថលេខាក្នុងថ្ងៃទី ៣០ ខែតុលា ឆ្នាំ ២០១៩ នេះសម្រាប់កម្មវិធី និងគម្រោងអភិវឌ្ឍន៍»។
យ៉ាងណាក្ដីសេចក្តីប្រកាសព័ត៌មានរបស់ ADB ដដែលថា ខណៈសមិទ្ធផលសម្រេចបានច្រើន ប៉ុន្តែលទ្ធភាពទទួលបានហិរញ្ញវត្ថុនៅតែមានកម្រិតជាពិសេសនៅជនបទ។ ស្ទើរតែ ១ ភាគ ៣ នៃពលរដ្ឋមិនមានលទ្ធភាពទទួលបានសេវាកម្មហិរញ្ញវត្ថុទេ។ ការខិតខំប្រឹងប្រែងក្នុងការធ្វើឱ្យប្រសើរឡើងនូវលទ្ធភាពទទួលបានហិរញ្ញវត្ថុនេះត្រូវបានរារាំងដោយសារការយល់ដឹងផ្នែកហិរញ្ញវត្ថុនៅមានកម្រិតទាបនៅឡើយ៕