.jpg)
កម្មការិនី ធ្វើការជាជាងក្រឡឹង។ ADB ថា ឧស្សាហកម្ម ៤.០ អាចនាំដល់ការផ្លាស់ប្តូរនៃជំនាញ និងការងារនៅក្នុងប្រទេសកម្ពុជា។ រូបថត សហការី
ភ្នំពេញៈ របាយការណ៍ស្រាវជ្រាវមួយរបស់ធនាគារអភិវឌ្ឍន៍អាស៊ី ADB ស្នើឱ្យកម្ពុជាពិចារណាលើការអភិវឌ្ឍផែនទីនៃការផ្លាស់ប្តូរឧស្សាហកម្ម សម្រាប់វិស័យសំខាន់ៗ ដើម្បីជួយដល់ការផ្លាស់ប្តូរទៅរកបដិវត្តន៍ឧស្សាហកម្មទី៤ ដោយមានការវិនិយោគគ្រប់គ្រាន់លើការពង្រឹងជំនាញសម្រាប់ការងារថ្មី និងការងារដែលត្រូវផ្លាស់ប្តូរ។
របាយការណ៍ស្រាវជ្រាវនេះចេញផ្សាយកាលពីម្សិលមិញដោយដាក់ចំណងជើងថា «ការទទួលបានអត្ថប្រយោជន៍ពីបដិវត្តន៍ឧស្សាហកម្មទី៤ តាមរយៈការអភិវឌ្ឍជំនាញនៅកម្ពុជា»។
ការសិក្សានេះផ្ដោតជាសំខាន់ទៅលើឧស្សាហកម្មកាត់ដេរសម្លៀកបំពាក់ និងទេសចរណ៍នៅកម្ពុជា ដោយសារតែវិស័យទាំង ២ នេះមានសារៈសំខាន់សម្រាប់កំណើនការងារ ភាពប្រកួតប្រជែងអន្តរជាតិ និង ឧស្សាហកម្មទី៤។
ការស្រាវជ្រាវរកឃើញថា បដិវត្តន៍ឧស្សាហកម្មទី៤ នឹងធ្វើឱ្យបាត់បង់ការងារនៅក្នុងឧស្សាហកម្មកាត់ដេរ និងទេសចរណ៍ ប៉ុន្តែការបាត់បង់នេះនឹងត្រូវជំនួសដោយការកើនឡើងនូវតម្រូវការដែលនាំមកដោយផលិតភាពខ្ពស់ជាងមុន ដែលវាអាចបង្កើតកំណើនការងារ ៣៩ ភាគរយ សម្រាប់ឧស្សាហកម្មកាត់ដេរ និង ២ ភាគរយសម្រាប់វិស័យទេសចរណ៍។
សេចក្ដីប្រកាសព័ត៌មានរបស់ ADB បញ្ជាក់ថា ការបង្កើតការងារជាទូទៅមានភាពវិជ្ជមាននៅក្នុងវិស័យទាំង ២ នេះ ប៉ុន្តែការសិក្សានេះព្រមានថា កម្មករដែលការងាររបស់ខ្លួនត្រូវបានផ្លាស់ប្តូរមិនងាយស្រួលរកការងារដែលបានបង្កើតថ្មីនោះទេ បើគ្មានការវិនិយោគគ្រប់គ្រាន់ និងទាន់ពេលវេលាក្នុងការអភិវឌ្ឍជំនាញរបស់ពួកគេ។ ការផ្លាស់ប្តូរការងារនេះទំនងជាជះឥទ្ធិពលដល់ស្ត្រីដែលមានប្រហែល ៨១ ភាគរយក្នុងឧស្សាហកម្មផលិតសម្លៀកបំពាក់នៅកម្ពុជា។
លោកស្រី Sunniya Durrani-Jamal នាយិកាប្រចាំប្រទេសរបស់ធនាគារអភិវឌ្ឍន៍អាស៊ី មានប្រសាសន៍ថា៖ «ខណៈដែលបដិវត្តន៍ឧស្សាហកម្មទី៤ អាចនាំដល់ការប្រែប្រួលការងារ និងជំនាញនៅប្រទេសកម្ពុជា យើងត្រូវតែដោះស្រាយផលប៉ះពាល់ដែលនឹងមានលើស្ត្រី»។
លោកស្រីបន្តថា៖ «យើងត្រូវតែបង្កើនចំណេះដឹងអំពីបច្ចេកវិទ្យាបដិវត្តន៍ឧស្សាហកម្មទី៤ និងអត្ថប្រយោជន៍របស់វា ជួយសហគ្រាសរួមទាំងសហគ្រាសធុនតូច និងមធ្យម ដើម្បីអាចទទួលយកបច្ចេកវិទ្យាជឿនលឿននេះ និងផ្តល់ការគាំទ្រដល់ការបណ្តុះបណ្តាល ពង្រឹងជំនាញ និងបង្កើតជំនាញ រួមទាំងតាមរយៈការលើកទឹកចិត្ត ដោយការអនុគ្រោះពន្ធ ដើម្បីធានាថា គ្មាននរណាម្នាក់មិនត្រូវបានគិតគូរដល់»។
ការសិក្សាស្នើថា កម្ពុជាគួរតែមានវិធីសាស្ត្រថ្មីៗដើម្បីពង្រឹងបរិយាប័ន្ន និងកិច្ចគាំពារសង្គមសម្រាប់កម្មករទើបចូលបម្រើការងារ កម្មករដែលប្រឈមនឹងហានិភ័យ ដោយមានការផ្លាស់ប្តូរក្នុងការងារ និងកម្មករដែលត្រូវការជំនាញបន្ថែម។ កម្ពុជាគួរតែអភិវឌ្ឍកម្មវិធីអប់រំ និងបណ្តុះបណ្តាលបច្ចេកទេស និងវិជ្ជាជីវៈ (TVET) ដោយផ្តោតលើការទទួលស្គាល់ឧស្សាហកម្មទី៤ ក្នុងវិស័យផលិតកម្មសម្លៀកបំពាក់ និងទេសចរណ៍។
និយោជកនៅកម្ពុជាមានការយល់ដឹងអំពីបដិវត្តន៍ឧស្សាហកម្មទី៤ ទាបជាង បើប្រៀបធៀបទៅនឹងនិយោជកដែលត្រូវបានស្ទង់មតិនៅក្នុងប្រទេសឥណ្ឌូនេស៊ី ហ្វីលីពីន និងវៀតណាម។ នេះបើតាមរបាយការណ៍ដដែល។
លោកស្រី Shanti Jagannathan អ្នកជំនាញជាន់ខ្ពស់ផ្នែកអប់រំរបស់ ADB បានថ្លែងថា៖ «នៅពេលបច្ចេកវិទ្យារីកចម្រើនយ៉ាងឆាប់រហ័ស ការវិនិយោគយ៉ាងច្រើនលើជំនាញឌីជីថលនឹងជួយបង្កើនឱកាសរបស់យុវជន និងមនុស្សចំណាស់ក្នុងការទទួលបានការងារដែលមានគុណភាពខ្ពស់ និងបន្ថយហានិភ័យនៃការបាត់បង់ការងារ»។
លោកស្រីបន្តថា៖ «ឥឡូវនេះគឺជាពេលវេលាដើម្បីគិតឡើងវិញនូវការផ្តល់ជំនាញដោយប្រើវេទិកាតាមអនឡាញ និងបច្ចេកវិទ្យាទូរស័ព្ទចល័ត ព្រមទាំងអភិវឌ្ឍស្ថាប័នបណ្តុះបណ្តាលឱ្យភាពរហ័សរហួនក្នុងការផ្តល់នូវវគ្គសិក្សា និងសញ្ញាបត្រដែលត្រូវនឹងតម្រូវការទីផ្សារ»។
លោក អ៊ុំ សុថា អ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានថ្លែងពីម្សិលមិញថា កម្ពុជាមានគោលនយោបាយអភិវឌ្ឍន៍វិស័យឧស្សាហកម្ម និងយន្តការបន្ថែមមួយចំនួនទៀត ដើម្បីចាប់យកបដិវត្តន៍ឧស្សាហកម្មទី៤ នេះ។ យ៉ាងណាក៏ដោយលោកថា កម្ពុជាក៏មានបញ្ហាប្រឈមដោយសារតែធនធានមនុស្សលើផ្នែកវិទ្យាសាស្ត្រ បច្ចេកវិទ្យា និងនវានុវត្តន៍នៅមានកម្រិត។
លោកបានបញ្ជាក់ថា៖ «អ៊ីចឹងហើយបានជានៅចំពោះមុខនេះ ក្រសួងបានស្នើសុំគោលការណ៍គឺយើងធ្វើម៉េចស្រាវជ្រាវរកអ្នកដែលមានចំណេះដឹងខាងវិទ្យាសាស្ត្រ បច្ចេកវិទ្យា នវានុវត្តន៍ដើម្បីបង្កើតជាបញ្ជីរួមមួយ។ នៅពេលយើងបានបញ្ជីមេមួយទាក់ទងនឹងវិទ្យាសាស្ត្រ បច្ចេកវិទ្យានវានុវត្តន៍ក្នុងប្រទេសកម្ពុជាយើង ហើយយើងចាត់ទុកថាយើងមានខួរក្បាលធំមួយ»។
លោកបានបញ្ជាក់ថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍មានភារកិច្ចធ្វើការសម្របសម្រួលលើបដិវត្តន៍ឧស្សាហកម្មទី៤ នេះ ប៉ុន្តែវាជាកិច្ចការរួម ព្រោះថាគ្រប់វិស័យទាំងអស់សុទ្ធតែពាក់ព័ន្ធនឹងផ្នែកវិទ្យាសាស្ត្រ៕
