សៀមរាបៈ អង្គការមូលនិធិបុរាណវិទ្យា និងអភិវឌ្ឍន៍ (ADF) ក្រោមការគាំទ្រពីក្រសួងបរិស្ថាន និង UNDP កំពុងពង្រីកតំបន់ការពារព្រៃឈើដែលមានស្រាប់ក្នុងឧទ្យានជាតិភ្នំគូលែនរហូតដល់ទំហំ ៨០០ ហិកតា ដើម្បីចូលរួមបញ្ឈប់ការកាប់ព្រៃឈើ និងចូលរួមអភិរក្សបុរាណដ្ឋាន និងវិស័យទេសចរណ៍នៅតំបន់នោះ។
លោក Jean-Baptiste Chevance នាយកកម្មវិធីអង្គការ ADF ប្រាប់ភ្នំពេញប៉ុស្ដិ៍ពីម្សិលមិញថា អង្គការមូលនិធិបុរាណវិទ្យា និងអភិវឌ្ឍន៍គាំទ្រពីក្រសួងបរិស្ថាន និង UNDP បាននិងកំពុងពង្រីកតំបន់ការពារព្រៃឈើដែលមានស្រាប់ក្នុងឧទ្យានជាតិភ្នំគូលែនរហូតដល់ទំហំ ៨០០ ហិកតា។
លោកថ្លែងថា៖ «ការធ្វើបែបនេះនឹងចូលរួមបញ្ឈប់ការកាប់ព្រៃដើម្បីធ្វើចម្ការស្វាយចន្ទីក្នុងសហគមន៍។ វាក៏ជួយដល់ការអភិរក្សបុរាណដ្ឋានជាច្រើនក្នុងតំបន់នេះ សម្រាប់វិស័យទេសចរណ៍ ដូចជា ទឹកជ្រោះនៅលើភ្នំជាដើម។ តំបន់ទេសចរណ៍អេកូធម្មជាតិទាំងនេះបានផ្តល់ជាប្រភពចំណូលបន្ថែមសម្រាប់សហគមន៍»។
បើតាមលោក Jean-Baptiste Chevance មកដល់បច្ចុប្បន្ន ADF បានធ្វើការងារជាង ១២ ឆ្នាំហើយនៅតំបន់ឧទ្យានជាតិភ្នំគូលែន។ ADF បានធ្វើការងារលើគម្រោងជាច្រើនដើម្បីធ្វើការងារគាំទ្រដល់ឧទ្យានជាតិនេះក្នុងនោះក៏មានគម្រោងពង្រីកតំបន់ការពារព្រៃឈើនេះផងដែរ។
លោកថា៖ «ការបង្កើតឡើងនូវគម្រោងការពារព្រៃឈើនេះ ព្រោះព្រៃឈើជាច្រើននៅឧទ្យានជាតិភ្នំគូលែនកំពុងប្រឈមនឹងការកាប់បំផ្លាញដោយពលរដ្ឋដើម្បីយកដីទៅដាំដើមស្វាយចន្ទីជាដើម»។
លោក ស៊ុន គង់ ប្រធានមន្ទីរបរិស្ថានខេត្តសៀមរាបថ្លែងថា រយៈពេលជាង ១២ ឆ្នាំកន្លងមកនេះ ADF ធ្វើការងារជាច្រើនក្នុងការជួយដល់ពលរដ្ឋក្នុងសហគមន៍ ការថែរក្សាបុរាណដ្ឋាន និងការការពារព្រៃឈើនៅតំបន់ឧទ្យានជាតិភ្នំគូលែន។ លោកថា៖ « អង្គការ ADF បានចូលរួមពង្រីកការផ្សព្វផ្សាយណែនាំដល់ពលរដ្ឋនៅក្នុងសហគមន៍មិនឱ្យកាប់បំផ្លាញព្រៃឈើ និងបោះបង្គោលកំណត់តំបន់ការពារព្រៃឈើបន្ថែមទៀតនៅក្នុងសហគមន៍»។
កញ្ញា ហឿង ហ៊ូរ៉ាពេជ្រ មន្ដ្រីទំនាក់ទំនង ADF ឲ្យដឹងថា គម្រោងពង្រីកតំបន់ការពារព្រៃឈើមានស្រាប់នេះធ្វើឡើងតាមរយៈគម្រោងឈ្មោះថា គម្រោងជំរុញបរិយាកាសអំណោយផលសម្រាប់ការអភិវឌ្ឍដោយចីរភាព ធ្វើឡើងចាប់ពីខែមិថុនា ឆ្នាំ ២០១៩ ដល់ខែឧសភា ឆ្នាំ ២០២១។
កញ្ញាថា៖ «ការងារនេះគឺយើងពង្រីកតំបន់ [ការពារ] នៅក្នុងសហគមន៍។ ក្នុងនោះយើងនឹងបោះបង្គោលកំណត់តំបន់ព្រៃការពារបន្ថែមទៀតនៅក្នុងសហគមន៍ ដើម្បីការពារតំបន់នោះឱ្យបានគង់វង្សធំជាងមុនថែមទៀត។ យើងក៏ធ្វើការផ្សព្វផ្សាយបន្ថែមចំពោះសក្តានុពលលើវិស័យទេសចរណ៍ធម្មជាតិក្នុងតំបន់នេះផងដែរដោយសាងសង់ជាមជ្ឈណ្ឌលព័ត៌មាននៅតាមតំបន់មួយចំនួននៃឧទ្យានជាតិភ្នំគូលែននេះ»។
លោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងថា៖ «នេះជាគោលនយោបាយរបស់រាជរដ្ឋាភិបាលនៅក្នុងការបង្កើតសេដ្ឋកិច្ចនៅមូលដ្ឋាន បង្កើនចំណូលដល់ប្រជាពលរដ្ឋដើម្បីធ្វើយ៉ាងណាឱ្យពលរដ្ឋមានចំណូលគ្រប់គ្រាន់អាចផ្គត់ផ្គង់គ្រប់គ្រួសារបាន»៕