.jpg)
អង្គការមូលនិធិកុមារកម្ពុជា ទទួលអំណោយពីសប្បុរសជននាពេលកន្លងមក។ រូបថត CCF
ភ្នំពេញៈ អង្គការមូលនិធិកុមារកម្ពុជា (CCF ) ដែលជួយពលរដ្ឋក្រីក្រនៅតាមសហគមន៍រើសសំរាមកំពុងប្រឈមនឹងការខ្វះខាតហិរញ្ញវត្ថុ ខណៈដែលម្ចាស់ជំនួយនៅក្រៅប្រទេសកំពុងជួបនឹងវិបត្តិដោយសារការរាតត្បាតនៃជំងឺកូវីដ ១៩។
លោក ហូយ លាងហ័ន (Hoy Leanghoin) ប្រធានកម្មវិធីទំនាក់ទំនងសហគមន៍នៃអង្គការ CCF ថ្លែងពីម្សិលមិញថា បច្ចុប្បន្ន CCF កំពុងផ្ដល់ជំនួយគាំទ្រដល់ពលរដ្ឋក្រីក្រជាង ៣ ពាន់គ្រួសារ ហើយបើទោះជាមានសប្បុរសជននៅកម្ពុជាមួយចំនួនបានជួយឧបត្ថម្ភស្បៀងខ្លះៗ ប៉ុន្ដែ CCF នៅត្រូវការជំនួយបន្ថែមជាច្រើនទៀត ដើម្បីអាចបន្តគាំទ្រដល់ពលរដ្ឋក្រីក្របានក្នុងកាលៈទេសៈដែលកំពុងមានការរីករាលដាលនៃជំងឺកូវីដ ១៩។
លោកថ្លែងថា៖ «ក្នុងពេលវិបត្ដិកូវីដ១៩នេះ យើងបានជួយដល់ពលរដ្ឋនៅកម្ពុជាជិត ៤ ពាន់នាក់នៅក្នុងសហគមន៍។ នៅក្នុងសហគមន៍របស់ CCF មិនមានករណីឆ្លងជំងឺកូវីដ១៩កើតឡើងឡើយ។ CCF សង្ឃឹមថាប្រទេសកម្ពុជាអាចជោគជ័យនៅក្នុងការប្រយុទ្ធប្រឆាំងនឹងជំងឺកូវីដ ១៩ នេះ។ CCF នៅកំពុងត្រូវការជំនួយពីសប្បុរសជនមកពីគ្រប់ផ្នែកទាំងក្នុង និងក្រៅប្រទេស។ តម្រូវការចាំបាច់បំផុតសម្រាប់ពួកយើងគឺជាស្បៀងអាហារ និងអង្ករ»។
បើតាម CCF «សមាជិកសហគមន៍របស់យើងភាគច្រើនជាអ្នករើសសំរាម ហើយបច្ចុប្បន្នមិនមានអ្នកទិញសម្ភារកែច្នៃរបស់ពួកគេទេ។ ជាលទ្ធផលមានសមាជិកសហគមន៍ជាច្រើនគឺបាត់បង់ចំណូល។ យើងកំពុងស្វែងរកអ្វីគ្រប់យ៉ាងដែលពួកគេត្រូវការដើម្បីឆ្លងកាត់ដំណាក់កាលនេះរួមមានអង្ករ អាហារ និងការជួយឧបត្ថម្ភចំពោះកន្លែងជួលស្នាក់នៅរបស់ពួកយើង ប៉ុន្តែតម្រូវការដែលសំខាន់បំផុតនោះគឺអង្ករ»។
ទោះបីយ៉ាងណា CCF បញ្ជាក់ថា វិបត្ដិជំងឺកូវីដ ១៩ នេះ ក៏បានធ្វើឲ្យប្រជាជនកម្ពុជាសាមគ្គីគ្នាផងដែរ។ ជាក់ស្ដែងក្នុងរយៈពេលប្រឈមនឹងវិបត្ដិកូវីដ ១៩ CCF បានទទួលអំណោយជាការឧបត្ថម្ភជាច្រើនពីសប្បុរសជននៅកម្ពុជាក្នុងនោះរួមមាន អង្ករជាង ៤,៥ តោន ចំណីអាហារ ប្រេងឆា និងទឹកបរិសុទ្ធជាដើម។
អ្នកស្រី ម៉េង រឹម អាយុ ៤៩ ឆ្នាំ ជាស្ដ្រីមេម៉ាយមានស្រុកកំណើតនៅខេត្តព្រៃវែងដែលមានកូន ៥ នាក់ ក្នុងបន្ទុកបានមកសុំឲ្យ CCF ជួយហើយ CCF បានចាប់ផ្ដើមជួយផ្ដល់ជំនួយ និងឲ្យកូនៗអ្នកស្រីបានចូលរៀនតាំងពី ៧ ឆ្នាំមុនរហូតមកដល់បច្ចុប្បន្ន។
អ្នកស្រីឲ្យដឹងថា៖ «ព្រោះតែខ្ញុំជាស្ដ្រីមេម៉ាយហើយមានកូន ៥ នាក់ក្នុងបន្ទុក មានជីវភាពលំបាកពេកទើបមកសុំឲ្យអង្គការ CCF ជួយ។ បច្ចុប្បន្នខ្ញុំ និងកូនតូចៗកំពុងរស់នៅសហគមន៍ដែលអង្គការឲ្យរស់នៅស្ទឹងមានជ័យ។ អង្គការមិនបានយកថ្លៃផ្ទះ ហើយបានផ្ដល់អង្ករឲ្យខ្ញុំរាល់ខែទើបតែខែនេះមិនទាន់ទទួលបានមិនដឹងយ៉ាងម៉េចដែរ»។
អ្នកស្រី រឹម បានឲ្យដឹងថា ជាទូទៅក្នុង ១ ខែៗអង្គការបានផ្ដល់អង្ករដល់អ្នកស្រី ២០ គីឡូក្រាម និងសម្លៀកបំពាក់ សៀវភៅ ដល់កូនៗអ្នកស្រីផងដែរ។ ក្រៅពីនេះនៅពេលមានរដូវបុណ្យទានធំៗ អង្គការក៏បានផ្ដល់ជាថវិកាដល់អ្នកស្រីសម្រាប់ទៅលេងស្រុកកំណើតផងដែរ៕
