.jpg)
ភ្នំពេញៈ ក្លឹបអ្នកកាសែតកម្ពុជា បានអះអាងថា «ព័ត៌មានមិនពិត ឬព័ត៌មានក្លែង (Fake News)» កំពុងតែរីករាលដាលខ្លាំងឡើង នៅលើបណ្ដាញសង្គម ខណៈដែល គ.ជ.ប បានបង្កើតក្រុមតាមដានព័ត៌មានមិនពិតនេះ ដែលអាចនឹងមានការផ្ទុះឡើងកាន់តែខ្លាំង នៅក្នុងការបោះឆ្នោតនៅចុងសប្តាហ៍នេះ។
នៅក្នុងកិច្ចពិភាក្សាពិសេសស្តីពី «ព័ត៌មានមិនពិត និងដំណើរការនៃការបោះឆ្នោតនីតិកាលទី៦» ដែលធ្វើឡើងនៅថ្ងៃទី ២៣ ខែកក្កដា ឆ្នាំ ២០១៨ លោក ប៉ែន បូណា ប្រធានក្លឹបអ្នកកាសែតកម្ពុជា (CCJ) បានលើកឡើងថា «ព័ត៌មានមិនពិត ឬព័ត៌មានក្លែង (Fake News)» គឺជាប្រធានបទមួយ ដែលសំខាន់ ហើយធំនាពេលបច្ចុប្បន្ន និងកំពុងក្លាយជាប្រធានបទក្ដៅបំផុតមួយ នៅក្នុងពិភពលោកផងដែរ។
លោកបន្ដថា៖«ក្នុងនាមជាអ្នកសារព័ត៌មាន យើងមានតួនាទីការពារ វិជ្ជាជីវៈសារព័ត៌មាន ព្រោះការផ្សព្វផ្សាយព័ត៌មានមិនពិតនេះ នឹងធ្វើឲ្យប៉ះពាល់ដល់សារព័ត៌មានរបស់យើង ប៉ះពាល់ដល់ជំនឿរបស់មហាជនមកលើវិស័យសារព័ត៌មាន ព្រោះតែសារព័ត៌មានក្លែងក្លាយនេះ បានបំពុលបរិយាកាស ពិសេសបណ្ដាញសង្គម»។
បើតាមលោក បូណា បន្តថា ការផ្សព្វផ្សាយព័ត៌មានមិនពិតនឹងលិចចេញមកកាន់តែច្រើន ដែលអាចធ្វើឲ្យប៉ះពាល់ដល់ការសម្រេចចិត្ដទៅបោះឆ្នោតរបស់ប្រជាពលរដ្ឋ។
លោកបញ្ជាក់ថា៖«សល់ពេលប្រហែលមួយសប្តាហ៍ទៀត យើងនឹងដល់ពេលបោះឆ្នោត។ ដូច្នេះព័ត៌មានមិនពិត អាចនឹងផ្ទុះឡើងរឹតតែច្រើន»។
លោក ឌឹម សុវណ្ណារុំ អ្នកនាំពាក្យ គ.ជ.ប បានលើកឡើង នៅក្នុងកិច្ចពិភាក្សា ដែលរៀបចំធ្វើឡើង ដោយក្លឹបអ្នកកាសែតកម្ពុជានេះផងដែរថា គ.ជ.ប នឹងផ្ដល់ព័ត៌មានទៅគ្រប់ស្ថាប័នព័ត៌មាន ដែលបានចុះបញ្ជីត្រឹមត្រូវតាមផ្លូវច្បាប់។
លោកបានឲ្យដឹងថា៖ «គ.ជ.ប មានក្រុមការងារ ធ្វើការតាមដានលើការផ្សព្វផ្សាយព័ត៌មានផ្សេងៗ បើសិនជាមានកំហុសឆ្គង គ.ជ.ប នឹងប្រាប់ឲ្យស្ថាប័នព័ត៌មាននោះកែតម្រូវឡើងវិញ»។
ទាក់ទិនទៅនឹងការទប់ស្កាត់ព័ត៌មានមិនពិតនេះ លោក សុវណ្ណារុំ បានបញ្ជាក់ដែរថា គ.ជ.ប មិនទាន់មានយន្តការណា ដើម្បីប្រយុទ្ធប្រឆាំងនឹងព័ត៌មានមិនពិត នឹងការផ្សព្វផ្សាយព័ត៌មាននៅលើបណ្ដាញសង្គមទេ។
លោកបានបន្ដបកស្រាយថា៖ «ប៉ុន្ដែមាត្រា ១៤២ នៃច្បាប់ស្ដីពីការបោះឆ្នោតជ្រើសតាំងតំណាងរាស្ដ្រ បាននិយាយថា ជនណាក៏ដោយ ដែលប្រើគ្រប់មធ្យោបាយទុច្ចរិត,… ឥឡូវយកចំណុចមួយពាក់ព័ន្ធនឹងការចុះផ្សាយព័ត៌មានមិនពិត ឬ ចុះផ្សាយទៅធ្វើឲ្យមានការភ័ន្តច្រឡំ នាំឲ្យមានការបាត់បង់ទំនុកចិត្ដនៃការបោះឆ្នោត បង្កការរំខានដល់ការបោះឆ្នោត បាត់ទំនុកចិត្ដលើការសម្ងាត់នៃការបោះឆ្នោត នឹងត្រូវពិន័យជាប្រាក់ពី ៥លានរៀលទៅដល់ ២០ លានរៀល»។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានក៏បានថ្លែងនៅក្នុងកិច្ចពិភាក្សានេះដែរថា ចំពោះការផ្សព្វផ្សាយព័ត៌មានមិនពិតក្រសួងនឹងចាំស្ដាប់បញ្ជាពី គ.ជ.ប។
លោកបន្ដថា៖«បើស្ថាប័ននោះបានចុះបញ្ជីត្រឹមត្រូវ ក្រសួងព័ត៌មាននឹងសុំឲ្យគាត់កែតម្រូវ នូវកំហុសរបស់ពួកគាត់»។
លោកបានរំឭកថា៖«ដូចកាលពីឆ្នាំ ២០១៣ មានស្ថាប័នវិទ្យុមួយ គាត់បានផ្សាយព័ត៌មានខុស ក្រសួងបានស្នើសុំឲ្យគាត់កែតម្រូវ ប៉ុន្ដែគាត់មិនកែតម្រូវ ក្រសួងបានចុះទៅបិទស្ថានីយនោះតែម្ដង»៕
