.jpg)
លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជា។ CHRC
ភ្នំពេញៈ គណៈកម្មាធិការសិទ្ធិមនុស្សកម្ពុជា (CHRC) នឹងបង្កើតក្រុមផ្តល់ជំនួយផ្លូវច្បាប់ ដើម្បីការពារប្រជាពលរដ្ឋដែលទទួលរងការរំលោភបំពានលើសិទ្ធិរបស់ពួកគេ។ នេះបើយោងតាមហ្វេសប៊ុករបស់ CHRC ។
លោក ជិន ម៉ាលីន អ្នកនាំពាក្យ CHRC បានថ្លែងកាលពីថ្ងៃអង្គារថា ក្រុមផ្តល់ជំនួយផ្លូវច្បាប់របស់ CHRC នឹងត្រូវបង្កើតឡើងជាក្រុមផ្តល់ជំនួយផ្លូវច្បាប់បន្ថែម។
លោកថ្លែងថា៖ «នេះជាយន្តការបន្ថែមមួយដើម្បីធ្វើឲ្យប្រជាពលរដ្ឋមានជម្រើសជាងមុន។ យើងមានរួចហើយ នូវជំនួយផ្លូវច្បាប់ ដែលផ្តល់ដោយក្រសួងយុត្តិធម៌ គណៈមេធាវី អង្គការក្រៅរដ្ឋាភិបាល និងស្ថាប័នរដ្ឋមួយចំនួនទៀតដូចជា ក្រសួងមហាផ្ទៃ ក្រសួងការពារជាតិ និងក្រសួងកិច្ចការនារី។ ជាងនេះទៀត ក៏មានយន្តការឯកជនផងដែរ ដូចជាយន្តការនៃក្រុមផ្តល់ជំនួយផ្លូវច្បាប់របស់សម្តេចនាយករដ្ឋមន្រ្តី ហ៊ុន សែន»។
លោក ម៉ាលីន ថ្លែងថា ក្រុមផ្តល់ជំនួយផ្លូវច្បាប់របស់ CHRC មានការងារធំៗ ៣ រួមមានការផ្តល់ប្រឹក្សាយោបល់ផ្លូវច្បាប់ដល់ប្រជាពលរដ្ឋ ការសម្របសម្រួលក្នុងការដោះស្រាយជម្លោះក្រៅប្រព័ន្ធតុលាការ និងការការពារសិទ្ធិចុងចោទនៅក្នុងសវនាការតុលាការសម្រាប់ប្រជាពលរដ្ឋក្រីក្រ។
CHRC ក៏បានលើកឡើងនូវប្រធានបទនេះទៅលោក Simon Walker តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាផងដែរ ក្នុងអំឡុងកិច្ចជំនួបលាគ្នាកាលពីថ្ងៃចន្ទ។
លោក Walker បានប្រាប់ភ្នំពេញប៉ុស្តិ៍កាលពីថ្ងៃអង្គារថា ប្រជាពលរដ្ឋគ្រប់រូប មានសិទ្ធិទទួលបានជំនួយផ្លូវច្បាប់ដូច្នេះយន្តការណាក៏ដោយ ដែលផ្តល់ជំនួយផ្លូវច្បាប់គឺទទួលបានការស្វាគមន៍។
លោកថ្លែងតាមអុីមែលថា៖ «ការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា គាំទ្រការពង្រឹងនិងការសម្របសម្រួលការផ្តល់ជំនួយផ្លូវច្បាប់ ក្នុងបរិបទនេះ ហើយបាននិងកំពុងធ្វើការជាមួយក្រសួងយុត្តិធម៌ អំពីដំណើរការវិវឌ្ឍន៍នៃគោលនយោបាយការផ្តល់ជយផ្លូវច្បាប់។ ការិយាល័យឧត្តមស្នងការជំរុញឲ្យមានការអនុវត្តគោលនយោបាយនេះលឿនៗ ជាមួយនឹងការផ្តល់ធនធានគ្រប់គ្រាន់ដើម្បីគាំទ្រវា»។
លោក យុង ផានិត អនុប្រធាននាយកដ្ឋានការពារផ្លូវច្បាប់ សម្រាប់ប្រជាពលរដ្ឋក្រីក្រនៅគណៈមេធាវីនៃព្រះរាជាណាចក្រកម្ពុជា បានប្រាប់ភ្នំពេញប៉ុស្តិ៍ កាលពីថ្ងៃអង្គារថា លោកស្វាគមន៍ គំនិតផ្តួចផ្តើមនេះ។ លោកថ្លែងថា ការណ៍នេះនឹងកាត់បន្ថយសំណើសុំមេធាវីដែលបានកើនឡើងនៅគណៈមេធាវី។
លោកថ្លែងថា៖ «ប្រសិនបើគោលដៅរបស់ពួកគេ គឺសម្រាប់ប្រជាពលរដ្ឋក្រីក្រ ការងាររបស់ពួកគេនឹងកាត់បន្ថយបន្ទុកដែលគណៈមេធាវីកំពុងជួបប្រទះ។ គណៈមេធាវីការពារតែប្រជាពលរដ្ឋក្រីក្រប៉ុណ្ណោះ»។
លោក ផានិត ថ្លែងថា ចំនួននៃការស្នើសុំការផ្តល់ជំនួយផ្លូវច្បាប់មកគណៈមេធាវីបានកើនឡើងពី ១ ឆ្នាំទៅ ១ ឆ្នាំ ដោយក្នុងនោះមានចំនួន ២ ៣០៤ ករណី ក្នុងឆ្នាំ ២០១៧ ចំនួន ២ ៦៥៥ ករណី ក្នុងឆ្នាំ ២០១៨ និង ១ ៨៨៦ ករណីក្នុងរយៈពេល ៨ ខែក្នុងឆ្នាំ ២០១៩៕
