.jpg)
ក្រុមមេធាវីនៃគណៈកម្មាធិការសិទ្ធិមនុស្សកម្ពុជាដែលជាមេធាវីក្នុងកម្មវិធីប្រឹក្សាច្បាប់។ រូបថត CHRC
ភ្នំពេញៈ គណៈកម្មាធិការសិទ្ធិមនុស្សកម្ពុជា (CHRC) បានរៀបចំ និងដាក់ឲ្យអនុវត្តកម្មវិធីប្រឹក្សាច្បាប់តាមទូរស័ព្ទដោយឥតគិតកម្រៃ ដើម្បីលើកស្ទួយសិទ្ធិទទួល បានយុត្តិធម៌របស់ពលរដ្ឋ ជួយសម្រួលការលំបាក និងបង្ខិតសេវាប្រឹក្សាច្បាប់ទៅដល់ពលរដ្ឋគ្រប់ទីកន្លែងទាំងអស់តាមប្រព័ន្ធទូរស័ព្ទ ដែលកម្មវិធីនេះមានការគាំទ្រពីសង្គមស៊ីវិល ប៉ុន្ដែជំរុញឲ្យអនុវត្តមានប្រសិទ្ធភាព និងតម្លាភាព។
លោក ជិន ម៉ាលីន អ្នកនាំពាក្យក្រសួងយុត្តិធម៌ និងជាប្រធានក្រុមអ្នកច្បាប់ និងមេធាវីសិទ្ធិមនុស្សនៃគណៈកម្មាធិការសិទ្ធិមនុស្សកម្ពុជាប្រាប់ភ្នំពេញប៉ុស្ដិ៍ពីម្សិលមិញថា គណៈកម្មាធិការសិទ្ធិមនុស្សកម្ពុជាបានរៀបចំ និងដាក់ឲ្យអនុវត្តកម្មវិធីប្រឹក្សាច្បាប់តាមទូរស័ព្ទដោយឥតគិតកម្រៃ។ គោលបំណង គឺដើម្បីលើកស្ទួយ សិទ្ធិទទួលបានយុត្តិធម៌របស់ពលរដ្ឋជួយសម្រួលការលំបាក។ ជាពិសេសបង្ខិតសេវាប្រឹក្សាច្បាប់នេះទៅដល់ពលរដ្ឋគ្រប់ទីកន្លែងទាំងអស់តាមរយៈប្រព័ន្ធទូរស័ព្ទ ដោយមិនចាំបាច់ធ្វើដំណើរមកទទួលសេវាដោយផ្ទាល់នៅការិយាល័យរាជធានីភ្នំពេញ។
លោកបានបន្តថា កម្មវិធីប្រឹក្សាច្បាប់តាមទូរស័ព្ទដោយឥតគិតកម្រៃនេះមានក្រុមមេធាវីសិទ្ធិមនុស្សរបស់គណៈកម្មាធិការសិទ្ធិមនុស្សកម្ពុជាប្រចាំការជារៀងរាល់ថ្ងៃសរុបចំនួន ៣៥ នាក់។ ក្នុង ១ ថ្ងៃមានអ្នកប្រចាំការចាំទទួលទូរស័ព្ទ និងឆ្លើយតបទៅនឹងចម្ងល់ និងក្តីកង្វល់ផ្សេងៗរបស់សាធារណជនពាក់ព័ន្ធនឹងបញ្ហាផ្លូវច្បាប់ចំនួន ៥ នាក់។
លោកបញ្ជាក់ថា៖ «កន្លងមកយើងបានជួយប្រឹក្សាផ្នែកច្បាប់នៅការិយាល័យយើងផ្ទាល់ និងការពារក្ដីជូនគាត់នៅតាមតុលាការ។ ប៉ុន្ដែយើងយល់ថា ប្រជាពលរដ្ឋខ្លះគាត់មានការលំបាកក្នុងការមកទីស្នាក់ការយើងផ្ទាល់ ដូចជា គាត់នៅឆ្ងាយ តំបន់ដាច់ស្រយាលជាដើមនោះ។ អ៊ីចឹងបានជាយើងសម្រេចបង្កើតកម្មវិធីនេះឡើងដើម្បីឲ្យគាត់ងាយស្រួលបំផុត»។
លោកស្រី អ៊ិត មធុរា សមាជិកមេធាវីនៃគណៈកម្មាធិការសិទ្ធិមនុស្សកម្ពុជាបានថ្លែងថា លោកស្រីនឹងខិតខំប្រឹងប្រែងជួយប្រជាពលរដ្ឋទាក់ទងនឹងការប្រឹក្សាផ្នែកច្បាប់ដោយមិនគិតកម្រៃ។ គណៈកម្មាធិការសិទ្ធិមនុស្សកម្ពុជា បានបង្កើតកម្មវិធីពិតជាមានសារៈសំខាន់ខ្លាំងណាស់សម្រាប់ពលរដ្ឋដែលនៅតាមជនបទ ហើយកំពុងមានបញ្ហារំលោភលើសិទ្ធិរបស់ពួកគាត់។
លោកស្រីបានបន្តថា កន្លងមកពលរដ្ឋនៅតាមជនបទមួយចំនួនធ្លាប់មានបញ្ហារំលោភសិទ្ធិ និងបញ្ហាទាក់ទងនឹងផ្នែកច្បាប់។ ប៉ុន្ដែពួកគេគ្មានអ្នកប្រឹក្សា និងគ្មានអ្នកផ្ដល់យោបល់ ទាក់ទងច្បាប់ ខណៈដែលពួកគេមិនសូវយល់ដឹងពីច្បាប់ទៀតនោះ ទើបបានធ្វើឲ្យមានឧបសគ្គក្នុងការតតាំងក្ដីនៅតុលាការជាមួយភាគីម្ខាងទៀត។
លោកស្រី មធុរា ថ្លែងថា៖ «ដោយសារយើងឃើញមានករណី ១ ចំនួនគឺពួកគាត់នៅតំបន់ឆ្ងាយ តែគាត់ត្រូវការជំនួយផ្នែកច្បាប់។ ប៉ុន្ដែគាត់គ្មានមធ្យោបាយមកភ្នំពេញជួបមេធាវី ឬមករកសេវាផ្នែកច្បាប់ ហើយគាត់ត្រូវចំណាយលុយទៀត ហើយត្រូវខាតការងារ ខាតពេលវេលាជាដើម។ អ៊ីចឹងការផ្ដល់សេវាឲ្យគាត់តាមទូរស័ព្ទនេះ គឺជាការផ្តល់ភាពងាយស្រួលបំផុត ហើយនៅពេលដែលពួកខ្ញុំដឹងថា គាត់ត្រូវបានគេរំលោភលើសិទ្ធិគាត់ធ្ងន់ធ្ងរ គឺក្រុមអ្នកច្បាប់យើងនឹងចុះទៅជួបគាត់ដល់ផ្ទះតែម្ដង ដើម្បីជួយគាត់»។
លោក អំ សំអាត ប្រធានគ្រប់គ្រងផ្នែកឃ្លាំមើលសិទ្ធិមនុស្សនៃអង្គការការពារសិទ្ធិមនុស្ស (LICADHO) ថ្លែងថា លោកគាំទ្រឲ្យមានសេវានេះ។ ព្រោះប្រជាពលរដ្ឋភាគច្រើននៅតាមជនបទមិនសូវបានយល់ដឹងពីបញ្ហាច្បាប់ ឬនៅពេលមានបញ្ហាអ្វីមួយគឺពួកគាត់មិនដឹងថា ត្រូវទៅរកអ្នកណាឲ្យជួយ ខណៈពួកគាត់ខ្លះមិនមានសែស្រឡាយ អ្នកចេះដឹង អ្នកធ្វើការងារធំ និងគ្មានសាច់ញាតិអ្នកចេះច្បាប់។ ដូច្នេះពួកគាត់កំពុងមានបញ្ហាច្រើនទាក់ទងជាមួយផ្នែកច្បាប់នេះ។
លោកបានបន្តថា គណៈកម្មាធិការសិទ្ធិមនុស្សកម្ពុជាដែលបានបង្កើតកម្មវិធីដោយឥតគិតកម្រៃនេះគឺជាជំហានមួយល្អប្រសើរ។ ប៉ុន្តែអ្វីដែលសំខាន់វាស្ថិតនៅលើសេវាកម្ម និងឆន្ទៈបម្រើប្រជាពលរដ្ឋបានកម្រិតណា។ លោកផ្តល់ជាយោបល់ថា បញ្ហាទាំងនេះគួរតែបង្កើតឲ្យមានតាំងពីយូរមកហើយ ដើម្បីជួយពលរដ្ឋមួយចំនួនដែលមានបញ្ហាដីធ្លី ឬបញ្ហាសិទ្ធិមនុស្សមួយចំនួនទៀត។
លោក សំអាត បានបញ្ជាក់ថា៖ «កន្លងមកទន្ទឹមនឹងការខ្វះអ្នកប្រឹក្សាផ្នែកច្បាប់នេះ ពលរដ្ឋយើងក៏នៅខ្វះមេធាវីជាច្រើន ដើម្បីជួយពួកគាត់ក្នុងការតតាំងក្ដីនៅតុលាការហើយប្រសិនបើគណៈកម្មាធិការសិទ្ធិមនុស្សកម្ពុជាជួយផ្ដល់មេធាវីឲ្យពលរដ្ឋដោយឥតគិតកម្រៃទៀតគឺកាន់តែល្អប្រសើរ ព្រោះអ្នកនៅតាមជនបទ គាត់ក៏មិនសូវមានលុយទៅជួលមេធាវីទេ»៕
