ក្រចេះ: ក្រុមអង្គភាពកំចាត់មីន នៃមជ្ឈមណ្ឌលកំចាត់មីនកម្ពុជា (CMAC) ប្រចាំទិសខេត្តត្បូងឃ្មុំ កាលពីថ្ងៃទី ២១ ខែមករា បានចុះអន្តរាគមន៍ដោះគ្រាប់បែក BLU-24 ដែលជាប្រភេទគ្រាប់បែកចង្កោមចំនួនមួយសាងស្មើនឹង ១៣២ គ្រាប់ នៅចំណុចភូមិសម្រង ឃុំខ្សឹម ស្រុកស្នួល ខេត្តក្រចេះ។ នេះបើតាមលោក កែវ សារ៉ាត់ ប្រធានអង្គភាពកម្ចាត់មីនទី ៥ ពីម្សិលមិញ។
លោក សារ៉ាត់ បញ្ជាក់ថា៖ «គ្រាប់បែក BLU-24 នេះ ជាផលិតផលរបស់អាមេរិក និងជាកាកសំណល់នៃសង្គ្រាមនាអំឡុងទសវត្សរិ៍ឆ្នាំ ១៩៧០ ។ គ្រាប់បែកនេះ ជាប្រភេទគ្រាប់បែកចង្កោម ដែលត្រូវបានគេទម្លាក់ពីលើយន្តហោះ។ វាត្រូវបានគេច្រកនៅក្នុងបំពង់ដែលមានប្រវែង ២ ម៉ែត្រ ដែលក្នុងមួយសាងរបស់វាមានចំនួន ៦ បំពង់ស្មើ ១៣២គ្រាប់»។
បើតាមលោកសារ៉ាត់ គ្រាប់បែកនេះ ត្រូវបានប្រជាពលរដ្ឋក្នុងភូមិសម្រងប្រទះឃើញកប់នៅក្នុងដីស្រែរបស់ពួកគាត់ ក្រោយពីមានការដុតព្រៃ និងកាប់ឆ្ការ ដើម្បីពង្រីកផ្ទៃដីដាំដុះ កាលពីរសៀលថ្ងៃទី ២០ មករា ឆ្នាំ ២០១៩ ហើយបានរាយការណ៍ប្រាប់សមត្ថកិច្ចមូលដ្ឋានឲ្យជួយអន្តរាគមន៍មកកាន់ក្រុមមន្ត្រីជំនាញនៃអង្គភាពកំចាត់មីនទី ៥ របស់លោកនៅព្រឹកថ្ងៃទី ២១ ខែមករា ឆ្នាំ ២០១៩។ នៅរសៀលថ្ងៃដដែលមន្ត្រីជំនាញទៅដោះគ្រាប់បែក BLU-24 នោះដោយជោគជ័យ។
លោក ហេង រតនា អគ្គនាយក CMAC កាលពីថ្ងៃចន្ទ បានអំពាវនាវដល់ប្រជាពលរដ្ឋនៅក្នុងបណ្ដាខេត្តជាប់ព្រំដែនកម្ពុជា វៀតណាម ឲ្យប្រុងប្រយ័ត្ន និងនៅឲ្យឆ្ងាយពីគ្រាប់បែក ឬយុទ្ធភណ្ឌមិនទាន់ផ្ទុះដោយហាមប៉ះពាល់ឬជីកកកាយវាជាដាច់ខាត ព្រោះវាអាចបង្កឲ្យផ្ទុះស្លាប់បានគ្រប់ពេល។ លោកថា៖ «សូមបងប្អូនប្រុងប្រយ័ត្ន កុំប៉ះពាល់ ឬជីកកកាយវាជាដាច់ខាត ព្រោះវាងាយនឹងផ្ទុះបំផុត»។
លោកឲ្យដឹងដែរថា យោងតាមទិន្នន័យដែល CMAC ទទួលបាន អាមេរិកបានទម្លាក់គ្រាប់បែកនៅកម្ពុជាមានចំនួន ១១៥-២៧៥ ទីតាំង មានការហោះហើរទម្លាក់គ្រាប់ចំនួន ២៣០ ៥៤៤ លើក ស្មើនឹងជាង ២ លាន ៥៩ ម៉ឺនគ្រាប់ ដែលមានទម្ងន់សរុបជាង ២ លាន ៨ សែនតោន (២,៨០៣,៨៦៨,១៥២ គីឡូក្រាម) ក្នុងនោះមានគ្រាប់បែកចង្កោម គិតជាកូនគ្រាប់បែកចង្កោម ចំនួនជាង ២៧ លាន ៩ សែនគ្រាប់៕