.jpg)
មន្ត្រីកម្ពុជា និងថៃក្នុងជំនួបនៅព្រំដែនកាលពីថ្ងៃចន្ទ។ រូបថត CMAC
បន្ទាយមានជ័យៈ មជ្ឈមណ្ឌលសកម្មកំចាត់មីនកម្ពុជា-ថៃ (CMAC-TMAC) កាលពីព្រឹកថ្ងៃចន្ទបានសហការគ្នាចុះត្រួតពិនិត្យទីតាំងដែលត្រូវបោសសម្អាតមីន និងគ្រាប់មិនទាន់ផ្ទុះនៅតាមខ្សែបន្ទាត់ព្រំដែនក្នុងខេត្តបន្ទាយមានជ័យនៃប្រទេស កម្ពុជា និងខេត្តស្រះកែវនៃ ប្រទេស ថៃ ដោយបានឈានដល់ការចុះហត្ថលេខាលើកំណត់ហេតុកំណត់ទីតាំងធ្វើសកម្មភាព។
លោក ហេង រតនា អគ្គនាយក CMAC បានប្រាប់ភ្នំពេញប៉ុស្តិ៍នៅព្រឹកថ្ងៃអង្គារថា ជាលទ្ធផលក្រុមគណៈកម្មការបច្ចេកទេសនៃប្រទេសទាំង ២ បានចុះហត្ថលេខាលើកំណត់ហេតុរួមគ្នាមួយស្ដីពីការកំណត់ទីតាំងនៃតំបន់កិច្ចសហប្រតិបត្តិការបោសសម្អាតមីន និងគ្រាប់មិនទាន់ផ្ទុះនៅតាមខ្សែបន្ទាត់ព្រំដែនដើម្បីចូលរួមគាំទ្រដល់ការងារអភិវឌ្ឍន៍នៃប្រទេសទាំង ២។
លោក រតនា បានថ្លែងថា តាមលទ្ធផលរវាងភាគីកម្ពុជា-ថៃ CMAC និង TMAC តំបន់ចម្ការមីនដែលបានឯកភាពសម្រាប់កិច្ចសហប្រតិបត្តិការខាងលើនេះគឺខាងភាគីកម្ពុជាបានសម្រេចជ្រើសរើសទីតាំងសំខាន់ៗមួយចំនួននៅក្នុងភូមិសាស្ត្រក្រុងប៉ោយប៉ែត និងស្រុកម៉ាឡៃ ខេត្តបន្ទាយមានជ័យ ខណៈភាគីថៃបានសម្រេចជ្រើសរើសទីតាំងក្នុងតំបន់ភូមិសាស្ត្រឃុំថាខាំ ស្រុកអារញ្ញប្រាថេត ខេត្តស្រះកែវ។
លោកបានបញ្ជាក់ថា៖ «ការបោសសម្អាតមីន និងគ្រាប់មិនទាន់ផ្ទុះគឺធ្វើឡើងនៅលើទីតាំងចម្ការមីនក្នុងបូរណភាពទឹកដីនៃប្រទេសរៀងៗខ្លួនពោលគឺភាគីទាំង ២ CMAC និង TMAC មិនប្រើប្រាស់សម្ភាររួមគ្នានោះទេ។ ប៉ុន្តែដោយសារពួកយើងបានជ្រើសរើសទីតាំងចម្ការមីនក្នុងភូមិសាស្ត្រក្បែរគ្នា ដូច្នេះពួកយើងអាចផ្លាស់ប្តូរបទពិសោធបច្ចេកទេសគ្នាទៅវិញទៅមកបាន នៅពេលចុះប្រតិបត្តិការជាក់ស្ដែង»។
លោកបន្ថែមថាការបោសសម្អាតមីនតាមបណ្តោយព្រំដែនកម្ពុជា-ថៃគឺជាភារកិច្ចរបស់អង្គភាព CMAC និងអង្គភាព TMAC ដែលត្រូវអនុវត្តជាសេនាធិការជូនគណ:កម្មការ ព្រំដែនទូទៅកម្ពុជា-ថៃដែលរាជរដ្ឋាភិបាលនៃប្រទេសទាំង ២ បានប្រគល់ឲ្យ។
ជាមួយគ្នានេះលោក សំ វីរៈ ប្រធានមជ្ឈមណ្ឌលកងឯកភាពកំចាត់មីនទី ១ ខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា ចម្ការមីនដែលភាគីកម្ពុជាត្រៀមដោះខាងលើនេះមាន ១៤ ទីតាំងដែលមានចម្ងាយ ៣០០ ទៅ ៥០០ ម៉ែត្រពីអូរព្រំដែន និងស្ថិតក្នុងឃុំ-សង្កាត់ចំនួន ៤ នៃស្រុកម៉ាឡៃ និងក្រុងប៉ោយប៉ែតខេត្តបន្ទាយមានជ័យមានផ្ទៃដីសរុបជាង ១២៦ ហិកតា។
លោកបានបញ្ជាក់ថា៖ «ទីតាំងចម្ការមីនទាំងនោះ សម្បូរទៅដោយប្រភេទមីនប្រឆាំងមនុស្ស និងប្រឆាំងរថក្រោះនៅរាយប៉ាយ។ ផ្ទៃដីនៃតំបន់ចម្ការមីនទាំងនេះមានមួយចំនួនស្ថិតនៅជាប់ដីស្រែចម្ការរបស់ប្រជាពលរដ្ឋដែលជារឿយៗបានបង្កគ្រោះថ្នាក់ដល់ពលរដ្ឋដែលបាននាំគ្នាកាប់រានពង្រីកផ្ទៃដីដាំដុះរបស់ពួកគេ»។
លោក វីរៈ ក៏បានប្រាប់ឲ្យដឹងដែរថា ខេត្តបន្ទាយមានជ័យមានចម្ការមីនចំនួន ៦ ២៤៩ កន្លែងស្មើនឹង ៣៥ ៨៩៧ ហិកតា។ ក្នុងនោះផ្ទៃដីចម្ការមីនដែលបានបោសសម្អាតរួចមានចំនួន ៣ ៤១៨ កន្លែង ស្មើនឹង ១៨ ០៧៧ ហិកតា និងផ្ទៃដីចម្ការមីនដែលមិនទាន់បោសសម្អាតមាន ២ ៨៣១ កន្លែងស្មើនឹង ១៧ ៨២០ ហិកតា។ បច្ចុប្បន្ននេះចម្ការមីនមួយចំនួនត្រូវបានប្រជាពលរដ្ឋសង់លំនៅឋានរស់នៅផងដែរ។
បើតាមលោក វីរៈ នៅក្នុងជំនួបនៃការចុះត្រួតពិនិត្យទីតាំងបោសសម្អាតមីន និងគ្រាប់មិនទាន់ផ្ទុះនេះទាំងភាគី CMAC និង TMAC សុទ្ធតែបានបង្ហាញពីការយកចិត្តទុកដាក់ និងកិច្ចខិតខំប្រឹងប្រែងក្នុងការពង្រឹងកិច្ចសហប្រតិបត្តិការដោយអនុលោមទៅតាមស្មារតីកិច្ចប្រជុំ និងការសម្រេចរបស់គណៈកម្មាធិការព្រំដែនទូទៅកម្ពុជា-ថៃ (GBC) ដើម្បីគាំទ្រដល់ដំណើការអភិវឌ្ឍន៍របស់រដ្ឋាភិបាលនៃប្រទេសទាំង ២ កម្ពុជា-ថៃ៕
