.jpg)
មន្រ្តី CMAC ប្រមូលគ្រាប់មីន និងយុទ្ធភណ្ឌមិនទាន់ផ្ទុះ ៧៧ គ្រាប់បំផ្លាញចោល។ រូបថត CMAC
បន្ទាយមានជ័យ: គ្រាប់មីន និងគ្រាប់យុទ្ធភណ្ឌមិនទាន់ផ្ទុះចំនួន ៧៧ គ្រាប់ ត្រូវបានមន្ត្រីជំនាញនៃមជ្ឈមណ្ឌលសកម្មភាពកំចាត់មីនកម្ពុជា (CMAC) ចុះទៅប្រមូលមកបំផ្លាញចោលពីភូមិតាគង់ ឃុំតាគង់ស្រុកម៉ាឡៃ ខេត្តបន្ទាយមានជ័យ បន្ទាប់ពីព្រះសង្ឃគង់នៅវត្តតាគង់បានរាយការណ៍។
លោក ខេន ស្រ៊ាង ប្រធានក្រុមជំនាញខាងគ្រឿងផ្ទុះតាមទីវាលរបស់ (CMAC) ប្រចាំនៅខេត្តបន្ទាយមានជ័យបានថ្លែងនៅថ្ងៃទី ៩ កក្កដា នេះថា មន្ត្រីជំនាញ CMAC បានចុះទៅប្រមូលយកគ្រាប់មីន និងគ្រាប់យុទ្ធភណ្ឌមិនទាន់ផ្ទុះទាំងនោះមកបំផ្លាញចោលរួចរាល់ហើយកាលពីថ្ងៃទី ៨ ខែកក្កដា ប៉ុន្ដែមិនមានបង្កគ្រោះថ្នាក់ដល់ពលរដ្ឋមូលដ្ឋានទេ។
លោកបន្តថា ប្រតិបត្តិការនេះក្រោយពីទទួលបានសេចក្ដីរាយការណ៍ពីព្រះសង្ឃដែលគង់នៅវត្តតាគង់ ឃុំតាគង់ ដោយព្រះអង្គបានប្រទះឃើញគ្រាប់មីនទាំងនេះជាបន្តបន្ទាប់ក្នុងអំឡុងពេលព្រះអង្គបានឈូសឆាយដីក្បែរកុដិដើម្បីដាំដំណាំ។
បន្ទាប់មកព្រះចៅអធិការវត្តតាគង់បានរាយការណ៍មកមន្ត្រីជំនាញ CMAC ឲ្យចុះទៅប្រមូលបំផ្លាញចោលចៀសវាងគ្រោះថ្នាក់ណាមួយជាយថាហេតុ។
លោកបញ្ជាក់ថា៖ «យើងបានប្រមូលគ្រាប់ទាំងអស់ហ្នឹងហើយ គឺវាមានច្រើនប្រភេទដូចជា គ្រាប់បែកប្រភេទ ២៣ មិល្លីម៉ែត្រ ចំនួន ៤២ គ្រាប់, ប្រភេទ ៦០ មិល្លីម៉ែត្រ ចំនួន ១១ គ្រាប់, គ្រាប់កាំភ្លើងត្បាល់ប្រភេទ ១២០ មិល្លីម៉ែត្រចំនួន ២ គ្រាប់ និងគ្រាប់មីនមួយចំនួនទៀតសរុបទាំងអស់ ៧៧ គ្រាប់។ បន្ទាប់ពីប្រមូលបានយើងមិនអាចរក្សាទុកទេ គឺបំផ្លាញចោលភ្លាមៗតែម្ដង ព្រោះគ្រាប់ខ្លះនៅមានប្រសិទ្ធភាព ខ្លាចពេលយើងដឹកតាមផ្លូវ គឺវាផ្ទុះ ដូច្នេះយើងបំផ្លាញចោលតែម្ដង»។
លោក បេន សំអាត អធិការនគរបាលស្រុកម៉ាឡៃបានថ្លែងនៅថ្ងៃទី ៩ កក្កដា នេះថា មន្ត្រីនគរបាលស្រុកមិនបានចូលរួមប្រតិបត្តិការជាមួយក្រុមមន្ត្រី CMAC ទេ ប៉ុន្ដែមន្ត្រីប៉ុស្ដិ៍រដ្ឋបាលឃុំតាគង់បានចូលរួមក្នុងការងារនេះ។ លោកថា នៅស្រុកម៉ាឡៃកាលពីថ្មីៗនេះធ្លាប់មានពលរដ្ឋរងគ្រោះដោយសារគ្រាប់មីនក្នុងពេលពួកគាត់កំពុងភ្ជួរដីស្រែ។
លោកបញ្ជាក់ថា៖ «ពួកខ្ញុំធ្លាប់បានចុះផ្សព្វផ្សាយតាមមូលដ្ឋានជាមួយមន្ត្រីជំនាញ CMAC និងអង្គការក្រៅរដ្ឋាភិបាលនានាពីប៉ះពាល់នៃគ្រាន់មីននិងគ្រាប់យុទ្ធភណ្ឌមិនទាន់ផ្ទុះដែរ ប៉ុន្ដែនៅមានពលរដ្ឋមួយចំនួនតូចតែងតែប្រមូលគ្រាប់បែកទាំងនោះមកទុកនៅក្នុងផ្ទះ។ ដូច្នេះវាអាចបង្កគ្រោះថ្នាក់ដល់ខ្លួនគាត់ជាពិសេសក្រុមគ្រួសារគាត់អ៊ីចឹងយើងអប់រំណែនាំគាត់ជាញឹកញាប់»។
តាមរបាយការណ៍របស់អាជ្ញាធរមីន (CMAA) បានឲ្យដឹងកាលពីថ្ងៃទី ៨ ខែកក្កដា ថា រដ្ឋាភិបាលប្រទេសអូស្ត្រាលី នៅថ្ងៃទី ៨ ខែកក្កដា បានប្រកាសបន្តគាំទ្រផ្តល់ជំនួយថវិកាក្នុងវិស័យមីន ៧,៦ លានដុល្លារអូស្ត្រាលី ដោយចាប់អនុវត្តគម្រោងពីឆ្នាំ ២០២០ ដល់ឆ្នាំ ២០២៤ តាមរយៈគម្រោងបោសសម្អាតមីនដើម្បីលទ្ធផលដំណាក់កាលទី៤ (CFR-IV)។
របាយការណ៍បន្តថា រាជរដ្ឋាភិបាលនិងពលរដ្ឋអូស្ត្រាលីបានចូលរួមជាដៃគូដ៏សំខាន់និងរួមចំណែកយ៉ាងធំធេងក្នុងការគាំទ្រដល់ការងារអភិវឌ្ឍន៍និងវិស័យសកម្មភាពមីននៅកម្ពុជា។ ក្នុងនោះអូស្ត្រាលីបានគាំទ្រថវិកាបោសសម្អាតមីនមនុស្សធម៌ចាប់តាំងពីឆ្នាំ ១៩៩៤ រហូតមក សរុបមានចំនួនជាង ១០០ លានដុល្លារអូស្ត្រាលី៕
