.jpg)
អង្គភាពនៃមជ្ឈមណ្ឌលសកម្មភាពកំចាត់មីនកម្ពុជា (CMAC) រកឃើញគ្រាប់មិនទាន់ផ្ទុះជាង ១០០ គ្រាប់ក្នុងខែមករា។ CMAC
ភ្នំពេញៈ អង្គភាពនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានរកឃើញគ្រាប់បែកទម្លាក់ពីយន្តហោះប្រភេទ MK ចំនួន ១៤ គ្រាប់ ដោយបានជីកកាយយកចេញពីទីតាំងក្នុងដី ១៤ កន្លែងផ្សេងគ្នាក្នុងរាជធានី និងបណ្ដាខេត្តមួយចំនួន ហើយគ្រាប់បែកទាំងនោះស្ថិតក្នុងស្ថានភាពគុណភាពអាចបង្កផ្ទុះបាន។ នេះបើយោងតាម Facebook របស់ លោក ហេង រតនា អគ្គនាយក CMAC។
លោក រតនា បានរៀបរាប់ថាគ្រាប់បែកទម្លាក់ពីយន្តហោះប្រភេទ MK ចំនួន១៤ គ្រាប់នោះត្រូវបានយកចេញពីក្នុងដី និងបានបន្សាបជាតិផ្ទុះបានសម្រេចដោយជោគជ័យចំនួន ១៣ គ្រាប់ ខណៈ ១ គ្រាប់ទៀតត្រូវបានបំផ្ទុះចោលនៅនឹងកន្លែង ព្រោះមិនអាចរំកិលវាចេញពីតាំងក្នុងដីបាន។
លោក រតនា បញ្ជាក់ថា៖ «គ្រាប់បែកទាំងនោះបានកប់ក្នុងដីជម្រៅជ្រៅៗប្រមាណ ៥-៧ ម៉ែត្រ និងមានទីតាំងស្ថិតនៅរាជធានីភ្នំពេញ ខេត្តកណ្តាល តាកែវ កំពង់ចាម ព្រៃវែង និងខេត្តស្វាយរៀង។ នេះជាការគំរាមកំហែងយ៉ាងធ្ងន់ធ្ងរមួយដល់សុវត្ថិភាពក្នុងការអភិវឌ្ឍប្រទេសជាតិ ជាពិសេសលើការកសាងហេដ្ឋារចនាសម្ព័ន្ធផ្លូវ ធារាសាស្ត្រ សំណង់លំនៅឋាន ស្ពាន និងការជីកកាយដីផ្សេងៗដែលអាចនឹងមានគ្រោះថ្នាក់កើតឡើង ហើយទំហំខូចខាតក៏អាចមានទំហំធំផងដែរ!»។
ដោយឡែកនៅឯខេត្តប៉ៃលិន មន្ត្រីអង្គភាពកំចាត់មីនម្នាក់បានប្រាប់ភ្នំពេញប៉ុស្តិ៍ថា គ្រាប់មីនប្រឆាំងរថក្រោះចំនួន ៤ គ្រាប់ ត្រូវបានរំដោះចេញពីដីចម្ការរបស់គ្រួសារមួយដែលមានទីតាំងស្ថិតនៅក្នុងក្រុងប៉ៃលិនកាលពីព្រឹកថ្ងៃអង្គារទី ៤ ខែ កុម្ភៈ ឆ្នាំ ២០២០ បន្ទាប់ពីបុរសម្ចាស់ចម្ការបានប្រើត្រាក់ទ័រភ្ជួរដីចម្ការនោះដើម្បីដាំពោត ហើយបានប្រទះឃើញគ្រាប់មីន ១ គ្រាប់នៅតាមគន្លងនៃអាចម៍បំណះដី ដែលគាត់បានភ្ជួរនោះ ប៉ុន្តែសំណាងល្អគ្រាប់មីននោះមិនផ្ទុះ។
លោក រិន ឈូក ប្រធានក្រុមការងារ CMAC ខេត្តប៉ៃលិនបាននិយាយថា៖ «នៅពេលក្រុមការងារយើងចុះទៅដល់ទីតាំងកើតហេតុ យើងបានបន្តធ្វើការស្រាវជ្រាវបន្ថែមនៅលើទីតាំងដីនោះ ក៏បានរកឃើញគ្រាប់មីន ៣ គ្រាប់ទៀត ដែលត្រូវបានគេកប់នៅជាប់ៗគ្នា ហើយក្រុមការងារយើងក៏បានជីកកាយដោះយកគ្រាប់មីនទាំងនោះចេញបានដោយសុវត្ថិភាព»។
លោក ឈូក ថា នៅប៉ៃលិនបានរកឃើញ និងដោះចេញនូវគ្រាប់ផ្សេងជាង ១០០ គ្រាប់ និងសម្អាតផ្ទៃដីបានចំនួនជាង ២០ ហិកតាក្នុងខែមករា៕
