The Phnom Penh Post Search

Search form




Logo of Phnom Penh Post newspaper Phnom Penh Post - CNRP ត្រៀម​រៀបចំ​អ្នក​សង្កេតការណ៍​បោះឆ្នោត




CNRP ត្រៀម​រៀបចំ​អ្នក​សង្កេតការណ៍​បោះឆ្នោត

Content image - Phnom Penh Post
លោក កឹម សុខា នៅ​ខេត្ត​ក្រចេះ​កាល​ពី​ថ្ងៃ​អាទិត្យ។ រូបថត ហ្វេសប៊ុក

CNRP ត្រៀម​រៀបចំ​អ្នក​សង្កេតការណ៍​បោះឆ្នោត

ភ្នំពេញៈ បន្ទាប់ពី​រៀបចំ​បេក្ខជន​ឃុំ​សង្កាត់​ជាង​ ២ ម៉ឺន​នាក់​​​​ដើម្បី​ប្រកួត​​ប្រជែង​​ការ​បោះឆ្នោត​ឃុំ​សង្កាត់​​​នា​ខែ​មិថុនា​រួច​រាល់​ គណបក្ស​​សង្គ្រោះជាតិ​ (CNRP) ក៏​នឹង​រៀបចំ​អ្នក​​សង្កេតការណ៍​ជាង​ ៤ ម៉ឺន​​​នាក់​ដើម្បី​ឃ្លាំ​មើល​ការ​បោះឆ្នោត​ផង​ដែរ​ដោយ​ខណៈ​នេះ​បាន​ប្រកាន់​យក​ជំហរ​មិន​ឈ្លោះ​ក្រោម​ហេតុផល​ថា​គណបក្ស​មាន​​ការងារ​​សំខាន់​ច្រើន​ដែល​ត្រូវ​ធ្វើ​។

ថ្លែង​ទៅ​កាន់​សមាជិក ​និង​សកម្មជន​​ក្នុង​ខេត្ត​ក្រចេះ​​កាលពី​ថ្ងៃ​អាទិត្យ​លោក កឹម សុខា ប្រធាន​ស្តីទី​នៃ​គណបក្ស​សង្គ្រោះជាតិ​​បាន​អំពាវនាវ​ទៅ​​សមាជិក​របស់​ខ្លួន​​មិន​ឲ្យ​ឈ្លោះ​ប្រកែក​ជាមួយ​អ្នក​ដទៃ​​ដោយ​សារ​គណបក្ស​សង្គ្រោះ​ជាតិ​មាន​ការងារ​ច្រើន​​​​ដែល​ត្រូវ​ធ្វើ​សម្រាប់​ការ​បោះឆ្នោត​នា​ពេល​ខាង​មុខ​ដូច្នេះ​​គណបក្ស​សង្គ្រោះ​ជាតិ​​មិន​មាន​ពេល​​ឈ្លោះ​ជាមួយ​​​អ្នក​ដទៃ​ទេ​។ ​

លោក កឹម សុខា បាន​អះអាង​​ថា ​បន្ទាប់ពី​បញ្ចប់​បញ្ជី​​ឈ្មោះ​បេក្ខជន​ឃុំ​សង្កាត់​គណបក្ស​​នឹង​ជ្រើសរើស​​អ្នក​សង្កេតការណ៍​បោះឆ្នោត​ផង​ដែរ​។

លោក កឹម សុខា បាន​បញ្ជាក់​ថា​៖ «​​យើង​ត្រូវ​តែ​​ជ្រើសរើស​ភ្នាក់ងារ​សង្កេតការណ៍​​ជាង​ ៤ ម៉ឺន​នាក់​ហើយ​​យើង​ត្រូវ​តែ​ធ្វើ​វគ្គ​បណ្តុះបណ្តាល​​ឲ្យ​ពួកគេ​យល់​ច្បាស់​។ ដូច្នេះ​ខ្ញុំ​សូម​​ថ្លែង​ជា​ដដែល​ថា យើង​​មាន​ការងារ​ច្រើន​ណាស់​ដែល​ត្រូវ​ធ្វើ​។ យើង​មិន​មាន​ពេល​​ឈ្លោះ​ជាមួយ​នរណា​ទេ​»។ «​យើង​​បន្ត​ឆ្ពោះ​​ទៅ​រក​ការ​​បោះឆ្នោត​»។

លោក កឹម សុខា បាន​បន្ថែម​ថា​ការ​រៀបចំ​​បញ្ជី​​​បេក្ខជន​បោះឆ្នោត​​ឃុំ​សង្កាត់​​ជាង​ ២ ម៉ឺន​​នាក់​ដើម្បី​ប្រកួត​ប្រជែង​​នៅ​​ក្នុង​ការ​បោះឆ្នោត​ឃុំ​សង្កាត់​​ថ្ងៃ​ ទី​៤ មិថុនា គណបក្ស​សង្គ្រោះ​ជាតិ​​ជិត​​បញ្ចប់​ហើយ​។

អ្នក​នាំពាក្យ​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) ​លោក ហង្ស ពុទ្ធា បាន​ថ្លែង​ថា​ គ.ជ.ប​ ស្វាគមន៍​ចំនួន​ច្រើន​នៃ​​អ្នក​សង្កេតការណ៍​បោះឆ្នោត​ដែល​ជ្រើសរើស​ដោយ​គណបក្ស និង​បាន​ជំរុញ​ឲ្យ​គណបក្ស​​​​​នីមួយៗ​​បណ្តុះបណ្តាល​​អ្នក​សង្កេតការណ៍​​​ឲ្យ​បាន​​សមស្រប​​ពាក់ព័ន្ធ​នឹង​ការងារ​​បោះឆ្នោត​។

លោក ពុទ្ធា បាន​បន្ត​ថា​៖ «​​ចំនួន​អ្នក​សង្កេតការណ៍ គ.ជ.ប.​មិន​កំណត់​ទេ​​ ដូច្នេះ​គណបក្ស​ណា​​ស្នើសុំ​អ្នក​សង្កេតការណ៍​​ចំនួន​ប៉ុន្មាន​​ ​គ.ជ.ប.​នឹង​យល់ព្រម​ឲ្យ​ពួកគេ​​បំពេញ​តួនាទី​​​​ដើម្បី​ពិនិត្យ​មើល​​តម្លាភាព ​​និង​​គណនេយ្យភាព​​​នៃ​ដំណើរការ​បោះឆ្នោត​»​។ លោក​បន្ថែម​ថា​ ​គ.ជ.ប. ​ក៏​នឹង​ពិចារណា​​ក្នុង​ការ​ជួយ​​លើ​វគ្គ​បណ្តុះ​បណ្តាល​សម្រាប់​អ្នក​សង្កេតការណ៍​ប្រសិន​បើ​គណបក្ស​ណា​ស្នើ​សុំ​​​ឲ្យ​ជួយ​។

លោក ហង្ស ពុទ្ធា បាន​បន្ត​ថា​៖ «​​ពិត​ណាស់ ពួកគេ​ត្រូវ​តែ​ទទួល​ការ​បណ្តុះ​បណ្តាល​​អំពី​ច្បាប់​​​ និង​នីតិវិធី​នៃ​ការ​បោះឆ្នោត​​ និង​ក្រមសីលធម៌​​ព្រម​ទាំង​មាន​ជំនាញ​ក្នុង​ការ​ធ្វើ​ការងារ​​​បំពេញ​តួនាទី​​​ឲ្យ​បាន​ប្រសើរ​»។

លោក​បាន​បន្ថែម​ថា​មាន​ការិយាល័យ​បោះឆ្នោត​ជាង​​ ២ ម៉ឺន​​​ការិយាល័យ​ដូច្នេះ​​អ្នក​សង្កេតការណ៍​បោះឆ្នោត​​ជាង​ ៤ ម៉ឺន​​នាក់​​​ដែល​ជ្រើសរើស​ដោយ​គណបក្ស​សង្គ្រោះ​ជាតិ​​គឺ​មិន​ច្រើន​ពេក​ទេ​ហើយ​ថា​គណបក្ស​សង្គ្រោះ​ជាតិ​​អាច​​ដាក់​អ្នក​សង្កេតការណ៍​របស់​ខ្លួន​ចំនួន​ ២ ​នាក់​នៅ​តាម​ការិយាល័យ​​បោះឆ្នោត​នីមួយៗ​។

លោក គល់ បញ្ញា ​នាយក​ប្រតិបត្តិ​នៃ​អង្គការ​ខុមហ្វ្រែល ដែល​ជា​អង្គការ​ឃ្លាំ​មើល​ការ​បោះឆ្នោត​បាន​ថ្លែង​ថា​​បើ​ទោះបី​ជា​​​គណបក្ស​នយោបាយ ​​​និង​សង្គម​ស៊ីវិល​​ដាក់​អ្នក​សង្កេតការណ៍​ច្រើន​តាម​ការិយាល័យ​​បោះឆ្នោត​​​ក៏​ដោយ ក៏​​​មិន​អាច​ធានា​​ថា​លទ្ធផល​នៃ​ការ​បោះឆ្នោត​អាច​យុត្តិធម៌​បាន​ដែរ ​ដោយ​​លោក​ថា​ការ​ដាក់​អ្នក​សង្កេតការណ៍​​គ្រាន់​តែ​​ដើម្បី​​សង្កេតការណ៍​លើ​​ដំណើរការ​បោះឆ្នោត​ប៉ុណ្ណោះ​ ប៉ុន្តែ​លទ្ធផល​​អាស្រ័យ​​ទៅ​លើ​ការ​រាប់​សន្លឹក​ឆ្នោត​​របស់​ គ.ជ.ប.។

លោក បញ្ញា បាន​បន្ត​ថា​៖ «​​ចំនួន​ [អ្នក​សង្កេតការណ៍​] ​មិន​សំខាន់​ទេ​ ​សំខាន់​គឺ​ គ.ជ.ប.។ ​ឥឡូវ​នេះ​យើង​ទាមទារ​ឲ្យ​ គ.ជ.ប. ​មាន​តម្លាភាព​​នៅ​ពេល​រាប់ [​សន្លឹក​ឆ្នោត] ​​នៅ​ពេល​បោះឆ្នោត​ដើម្បី​ឲ្យ​​យើង​​​មាន​ការ​រាយការណ៍​ពី​ការ​បោះឆ្នោត ការ​រាប់​​ [សន្លឹក​ឆ្នោត​] ​សមស្រប​»។

លោក គល់ បញ្ញា ​បាន​បញ្ជាក់​ថា ខុម ហ្វ្រែល​ ​កំពុង​ពិភាក្សា​ជាមួយ​អង្គការ​ដទៃៗ​ទៀត​​ដើម្បី​ដាក់​អ្នក​សង្កេតការណ៍​ជាង​ ២ ម៉ឺន​​នាក់​​​សម្រាប់​ការ​បោះឆ្នោត​ឃុំ​សង្កាត់​នេះ​​ដើម្បី​ធានា​ថា​នៅ​ការិយាល័យ​​​បោះឆ្នោត​នីមួយៗ​ត្រូវ​តែ​មាន​​អ្នក​សង្កេតការណ៍​ម្នាក់​មកពី​អង្គការ​៕ PS

អត្ថបទគួរចាប់អារម្មណ៍