.jpg)
មានការដេញដោលគ្នា»៕ទិដ្ឋភាពរដ្ឋសភាពេលពិភាក្សាគ្នាកាលពីថ្ងៃទី ១០ មេសា។ រូបថត រដ្ឋសភា
ភ្នំពេញៈ គណៈកម្មការដើម្បីការបោះឆ្នោតដោយសេរី និងយុត្តិធម៌នៅកម្ពុជា (Comfrel) បានលើកឡើងថា រដ្ឋសភាដែលមានបក្សតែ ១ មានសកម្មភាពធ្លាក់ចុះ ប៉ុន្តែមន្ត្រីនាំពាក្យរដ្ឋសភាថា អត់មានចុះថយអីទេ ដោយក្នុងអាណត្តិទី ៦ នេះតំណាងរាស្ត្របានចុះមូលដ្ឋានជាច្រើនដង សូម្បីតែពេលបើកសម័យប្រជុំក៏ចុះមូលដ្ឋានដែរ ដើម្បីបម្រើប្រជាជនគ្រប់វិស័យ ដូចជាវិស័យសុខាភិបាល សង្គមកិច្ច ជាដើម។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភាកម្ពុជា ប្រាប់ភ្នំពេញ-ប៉ុស្តិ៍ពីម្សិលមិញថា តំណាងរាស្ត្របានចុះមូលដ្ឋានបានច្រើនដងណាស់ សូម្បីតែពេលបើកសម័យប្រជុំក៏ចុះមូលដ្ឋានដែរ ដើម្បីបម្រើប្រជាជនគ្រប់វិស័យដូចជាវិស័យសុខាភិបាល សង្គមកិច្ចជាដើម។ លោកថា ប្រសិនបើមានប្រជាជនជួបគ្រោះភ័យផ្សេងៗដូចជាបាក់អគារ ខ្យល់ព្យុះធ្វើឱ្យខូចខាតផ្ទះ និងគ្រោះថ្នាក់ផ្សេងៗ តំណាងរាស្ត្រចុះទៅដល់កន្លែងតែម្តង និងបានដោះស្រាយបញ្ហាជូនប្រជាជន។
លោក ប៉េង ឡុង បានថ្លែងថា៖ «បើយើងប្រៀបធៀបកាលសម័យមានគណបក្សប្រឆាំងអត់មានចុះថយសកម្មភាពអីទេ។ ទោះបីគណបក្សប្រឆាំងនៅពេលនោះក៏គាត់ចុះ ចុះជួបតែអ្នកដែលបោះឆ្នោតឱ្យគាត់ហ្នឹងឯង។ គាត់អត់មានចុះជួបអ្នកផ្សេងទេ។ តែឥឡូវនេះគឺថាតំណាងរាស្ត្រគាត់ចុះទៅគឺចុះទៅទាំងអស់»។
គណៈកម្មការដើម្បីការបោះឆ្នោតដោយសេរី និងយុត្តិធម៌នៅកម្ពុជាហៅកាត់ថា (Comfrel) លើកឡើងថា ប្រសិទ្ធភាពសភាដែលមានគណបក្សតែ ១ ក្នុងឆ្នាំទី ១ អាណត្តិទី ៦ នេះបានធ្លាក់ចុះ បើធៀបនឹងរដ្ឋសភាដែលធ្លាប់មានពហុបក្ស ព្រោះមិនឃើញមានតំណាងរាស្ត្រនិយាយពីភាពអសកម្មក្នុងការដោះស្រាយបញ្ហាជូនពលរដ្ឋក៏ដូចជា ការសួរដេញដោលលើការអនុវត្តច្បាប់។
សេចក្តីប្រកាសព័ត៌មានរបស់ Comfrel ស្តីពីរបាយការណ៍សង្ខេបនៃការសង្កេតរដ្ឋសភា និងតំណាងរាស្ត្រឆ្នាំទី ១ និងនីតិកាលទី ៦ កាលពីថ្ងៃទី ២៧ ខែឧសភា បញ្ជាក់ថា សកម្មភាពចុះមូលដ្ឋានរបស់អ្នកតំណាងរាស្ត្រក្នុងគោលបំណងដើម្បីសំណេះសំណាលជាមួយប្រជាពលរដ្ឋ ពង្រឹងផ្ទៃក្នុងរបស់គណបក្ស អមដំណើរថ្នាក់ដឹកនាំគឺផុសផុលលើកលែងតែសកម្មភាពក្នុងគោលបំណងចុះជួយអន្តរាគមន៍ ដោះស្រាយបញ្ហា។ ជាពិសេសទំនាស់ដីធ្លីជូនប្រជាពលរដ្ឋ មិនត្រូវបានសង្កេតឃើញមានតំណាងរាស្ត្រខ្នះខ្នែង ឬយកចិត្តទុកដាក់ជួយដោះស្រាយនោះទេ»។
សេចក្តីប្រកាសព័ត៌មានបន្តថា៖ «ក្នុងសម័យប្រជុំ តំណាងរាស្ត្របានឡើងបញ្ចេញមតិក្នុងការអនុវត្តច្បាប់នានា។ ភាគច្រើនបំផុតក្នុងសម័យប្រជុំទាំងនោះមិនសូវមានឃើញតំណាងរាស្ត្រណាម្នាក់ជំទាស់ រិះគន់ ឬសួរដេញដោលដោយស៊ីជម្រៅឡើយ។ ផ្ទុយមកវិញគឺមានតែការកោតសរសើរ និងគាំទ្រដល់ការដឹកនាំរបស់រាជរដ្ឋាភិបាលតែប៉ុណ្ណោះ»។
Comfrel បញ្ជាក់ក្នុងសេចក្តីប្រកាសថា ក្នុងសម័យប្រជុំរបស់រដ្ឋសភាឆ្នាំទី ១ នេះតំណាងរាស្ត្រចំនួន ១២ រូបឡើង បញ្ចេញមតិចំនួន ៣៨ ដង គិតជាថេរវេលាមានរយៈពេល ២០៩ នាទី។ បើគិតពីចំនួនអ្នកតំណាងរាស្ត្រ និងរយៈពេលគឺតិចជាង បើប្រៀបធៀបទៅនឹងឆ្នាំទី ១ ដូចគ្នានៃអាណត្តិទី ៥។
សេចក្តីប្រកាសព័ត៌មានបន្តថា ក្នុងចំណោមតំណាងរាស្ត្រទាំង ១២៥ រូបគឺមានតែ ៥៥ រូប (៤៤%) ប៉ុណ្ណោះមានសកម្មភាពចុះមូលដ្ឋាន ដែលមានចំនួន ១០៤១ លើក។ ចំនួននេះគិតជាមធ្យម គឺ ១៩ លើកក្នុងអ្នកតំណាងរាស្ត្រម្នាក់ដែលបានចុះបេសកកម្ម។
Comfrel បញ្ជាក់ថា៖ «អ្នកតំណាងរាស្ត្រដែលបានចុះបេសកកម្មនេះបើគិតជាភាគរយនៃចំនួនអ្នកតំណាងរាស្ត្រក្នុងបក្សរបស់ខ្លួនឃើញថា មានចំនួនបេសកកម្មតិចជាងឆ្នាំទី ១ នៃអាណត្តិទី ៥ (៥០ រូបស្មើនឹង ៧៤ ភាគរយ)»។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិនៃអង្គការ Comfrel បានប្រាប់ភ្នំពេញប៉ុស្តិ៍ពីម្សិលមិញថា តំណាងរាស្ត្រនៅក្នុងអាណត្តិទី ៦ ឆ្នាំទី ១ នេះគឺមិនដូចតំណាងរាស្ត្រកាលពីសម័យមុនៗនោះទេ ព្រោះកាលពីមុនមានគណបក្សចម្រុះនៅក្នុងរដ្ឋាភិបាល។ ដោយឡែកសម្រាប់អាណត្តិទី ៦ នេះគឺមានគណបក្សតែ ១ ពោលគឺទាំងនីតិប្រតិបត្តិ និងនីតិប្បញ្ញត្តិដែលទាំង ២ អំណាចនេះគឺគ្រប់គ្រងដោយគណបក្សតែ ១។
លោក សាវាង្ស បានថ្លែងថា៖ «ប្រសិនជានៅក្នុងសភាមានគណបក្សចម្រុះ វាជាចំណុចមួយដែលល្អដែរ ដែលធ្វើឱ្យគាត់ហ្នឹង (តំណាងរាស្ត្រ) អាចឆ្លុះបញ្ចាំងគ្នា។ មានន័យថាគាត់អាចរិះគន់ គាត់អាចធ្វើការវែកញែក គាត់អាចបង្ហាញថា នែ! ខាងស្ថាប័ននីតិប្រតិបត្តិគាត់អនុវត្តមានបញ្ហាខ្វះចន្លោះត្រង់នេះ ឬមួយក៏ការស្នើសុំច្បាប់សម្រាប់ឱ្យអង្គនីតិប្រតិបត្តិអនុវត្តហ្នឹងវាមានចន្លោះប្រហោង អ៊ីចេះៗៗៗ។ អាហ្នឹងជាការដេញដោល ទោះបីថា ការសម្រេចហ្នឹងទៅដល់កម្រិតណាក៏ដោយ ប៉ុន្តែវាមានការដេញដោលគ្នា»៕
