ភ្នំពេញៈ គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (Comfrel) កាលពីម្សិលមិញបានបញ្ជាក់ថា បញ្ជីឈ្មោះបោះឆ្នោតដែលបានប្រកាសជាផ្លូវការដោយ គ.ជ.ប កាលពីចុងឆ្នាំ ២០២០ មានគុណភាពអាចទទួលយកបាន បើទោះបីនៅតែមានឈ្មោះស្ទួនដែលអាចធ្វើឱ្យអ្នកមានឈ្មោះនៅក្នុងបញ្ជីបោះឆ្នោត អាចនឹងបាត់សិទ្ធិបោះឆ្នោត។
យោងតាមសេចក្ដីប្រកាសព័ត៌មានស្ដីពីលទ្ធផលនៃការសង្កេតការចុះឈ្មោះ និងសវនកម្មបញ្ជីឈ្មោះបោះឆ្នោតឆ្នាំ ២០២០ ចេញផ្សាយកាលពីម្សិលមិញបានឱ្យដឹងថា Comfrel បានរកឃើញឈ្មោះស្ទួនចំនួន ៧៩ ស្មើនឹងមានឈ្មោះ ចំនួន ១៥៨ នាក់។ ក្នុងចំណោមឈ្មោះស្ទួន ៧៩ ឈ្មោះនោះមាន ៥៤ ឈ្មោះបានស្ទួនខុសខេត្ត ១៨ ឈ្មោះបានស្ទួនក្នុងខេត្តតែ ១ តែខុសឃុំ ៤ ឈ្មោះស្ទួនក្នុងការិយាល័យ និង ៣ ឈ្មោះស្ទួនក្នុងឃុំតែ ១ តែខុសការិយាល័យ។
ករណីសិក្សាលើឈ្មោះស្ទួនដែលបានរកឃើញនេះ Comfrel ជ្រើសរើសយកឈ្មោះចំនួន ៣ ក្នុងបញ្ជីឈ្មោះបោះឆ្នោតទៅសិក្សានៅខេត្តបន្ទាយមានជ័យ ខេត្តកណ្ដាល ខេត្តកំពត និងខេត្តសៀមរាប បានរកឃើញថា អ្នកមានសិទ្ធិបោះឆ្នោតម្នាក់ពិតជាមានឈ្មោះ ២ ប្រាកដមែន។
សេចក្ដីប្រកាសព័ត៌មានដដែលបានអះអាងថា៖ «យោងតាមការរកឃើញ ហើយវិភាគត្រឹមឈ្មោះស្ទួនក្នុងបញ្ជី Comfrel នៅតែយល់ឃើញថា បញ្ជីឈ្មោះបោះឆ្នោតមានគុណភាពអាចទទួលយកបាន តែបើពិនិត្យលើសិទ្ធិអ្នកចុះឈ្មោះបោះឆ្នោតវិញ គឺនៅមិនទាន់អាចបំពេញបាននៅឡើយទេ ទាក់ទងនឹងអ្នកចំណាកស្រុកនៅក្រៅប្រទេស»។ «ឈ្មោះស្ទួននេះបើប្រៀបធៀបជាមួយឆ្នាំ ២០១៩ ឃើញថាមានតួលេខកើនឡើង (កាលពីឆ្នាំ ២០១៩ មានចំនួន ១៧ ឈ្មោះ) Comfrel កត់សម្គាល់ឃើញថា ឈ្មោះស្ទួនដែលបានកើតឡើងក្នុងបញ្ជីឈ្មោះបោះឆ្នោតឆ្នាំ ២០១៩ ដែល Comfrel បានបញ្ជូនឈ្មោះទាំងនោះទៅ គ.ជ.ប ដើម្បីដោះស្រាយគឺមាន ១៧ ឈ្មោះបានលុបចេញពីបញ្ជីរួចហើយ»។
លោក សោម សូរិដា អគ្គលេខាធិការរង គជប បានឱ្យដឹងថា គ.ជ.ប បានទទួលរួចហើយនូវរបាយការណ៍ស្តីពីការសង្កេតការណ៍បោះឆ្នោត និងសវនកម្មបញ្ជីបោះឆ្នោតឆ្នាំ ២០២០ របស់អង្គការ Comfrel ជាមួយនឹងការវាយតម្លៃខ្ពស់ចំពោះលទ្ធផលនៃការស្រាវជ្រាវនេះដោយបានចាត់ទុកថាជាធាតុចូលដ៏សំខាន់ក្នុងការរួមចំណែកធ្វើឱ្យប្រសើរឡើង និងគុណភាពបញ្ជីបោះឆ្នោតឱ្យមានភាពពេញលេញត្រឹមត្រូវ និងមានបច្ចុប្បន្នភាព។
លោក សោម សូរិដា ថ្លែងថា៖ «លទ្ធផលនៃការរកឃើញនេះគឺជាគុណភាពនៃការវាស់បញ្ជីបោះឆ្នោតរបស់ គ.ជ.ប ឱ្យមានភាពត្រឹមត្រូវ និងអាចជឿទុកចិត្ត ហើយផ្អែកទៅលើការរកឃើញរបស់ Comfrel រួមជាមួយនឹងការរកឃើញរបស់ គ.ជ.ប ចំនួន ៤៤ ទៀត គជបនឹងត្រូវធ្វើការកែតម្រូវ បញ្ជីបោះឆ្នោតរបស់គជប ឆ្នាំ ២០២០»។
លោក សោម សូរិដា អះអាងថា មូលហេតុដែលធ្វើឱ្យមានឈ្មោះស្ទួននេះ ដោយសារបញ្ហាបច្ចេកទេស និងជាសំណល់ដែលសល់ពីឆ្នាំ ២០១៦ ដែល គ.ជ.ប រៀបចំការបោះឆ្នោតសាកល្បង។
លោកថ្លែងថា៖ «ទោះជាយ៉ាងណាក៏ដោយនៅ ២០២១ គ.ជ.ប ពិនិត្យឡើងវិញ និងចុះទៅដល់ទីកន្លែងដើម្បីផ្ទៀងផ្ទាត់នឹងលុបឈ្មោះអ្នកមានឈ្មោះស្ទួននោះចេញពីបញ្ជីបោះឆ្នោតដោយរក្សាទុកឈ្មោះតែ ១ ដែលត្រូវបានចុះឈ្មោះចុងក្រោយ»។
យោងតាមឯកសារនៅក្នុងគេហទំព័ររបស់គណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា ប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតផ្លូវការឆ្នាំ ២០២០ មានចំនួន ៨ ៨៣១ ៩៧១ នាក់ ប្រមាណជាង ៨៥ ភាគរយ ធៀបនឹងចំនួនប្រជាពលរដ្ឋប៉ាន់ស្មានសរុបដែលមានអាយុចាប់ពី ១៨ ឆ្នាំឡើង៕