អត្ថបទវិភាគ
ភ្នំពេញៈ មហាសន្និបាតគណបក្សប្រជាជនរយៈពេលបីថ្ងៃ ដែលបានបើកកាលពីថ្ងៃសុក្រ ជាកិច្ចការឆ្លុះបញ្ចាំង ផ្តោតលើកំណែទម្រង់ដែលនឹងព្យាយាមកំណត់ពីមូលដ្ឋានសម្រាប់ការបោះឆ្នោតជាតិនាឆ្នាំ ២០១៨ ដោយដាក់បញ្ចូលនូវអ្នកជំនាន់ថ្មី និងគំនិតថ្មី ក្នុងថ្នាក់ដឹកនាំរបស់គណបក្ស។
ប៉ុន្តែ អ្នកវិភាគពីក្រុមសិទិ្ធមនុស្សនិងបក្សប្រឆាំងកាលពីម្សិលមិញមើលឃើញថា ការពង្រីកសមាជិកភាព ក្នុងគណៈកម្មាធិការកណ្តាលគណបក្សនេះ ក្នុងមហាសន្និបាតដែលបានបញ្ចប់កាលពីថ្ងៃអាទិត្យ ជាសញ្ញាបង្ហាញថា របៀបដំណើរការរបស់បក្សនៅតែមិនផ្លាស់ប្តូរ ព្រោះវាហាក់បីដូចជា មួយភាគ បង្កើតឡើងដើម្បីពង្រឹងការគ្រប់គ្រងរបស់គណបក្សទៅលើកងសន្តិសុខរបស់រដ្ឋ។
លោក បណ្ឌិត ឡៅ ម៉ុងហៃ អ្នកវិភាគជើងចាស់ដែលថ្មីៗ ត្រូវបានតែងតាំងជាទីប្រឹក្សាលោក កឹម សុខា អនុប្រធានគណបក្សប្រឆាំងបានថ្លែងថា៖ «ខ្ញុំមិនគិតថា មានការផ្លាស់ប្តូរ [ពិតប្រាកដ] ដែលអាចមើលឃើញទេ»។
លោកបន្តថា៖ «ពួកគេបានបន្ថែមមនុស្សច្រើនថែមទៀត នេះគឺជាលក្ខណៈ យូរអង្វែងនៃគោលនយោបាយគណបក្សប្រជាជន។ ដោយមិនយកអ្នកថ្មីមកជំនួសអ្នកចាស់ តែពួកគេចូលចិត្តបន្ថែម»។
លោកបន្តថា បើទោះជាមានការតែងតាំងសមាជិកវ័យក្មេងជាច្រើនក្នុងស្ថាប័នធ្វើសេចក្តីសម្រេចនៅថ្នាក់កណ្តាល ដែលរួមបញ្ចូលទាំងកូនរាប់សិបនាក់របស់សមាជិកចាស់របស់គណបក្ស ក្នុងនោះ មានកូនលោកនាយករដ្ឋមន្រ្តី ហ៊ុន សែន ដែលការតែងតាំងនេះ គឺជារឿងធម្មតាក្នុងគណបក្សប្រជាជនរហូតទាល់តែមានអ្នកដឹកនាំថ្មី ឬមនុស្សថ្មីមកកាន់តំណែងសំខាន់»។
អ្នកស្រី មូរ សុខហួរ តំណាងរាស្រ្តរបស់គណបក្សសង្គ្រោះជាតិយល់ស្របតាមលោក ឡៅ ម៉ុងហៃ បានវាយតម្លៃ។
លោកស្រីថ្លែងថា៖ «រយៈពេល ថ្ងៃនេះ គេបានពិនិត្យខាងក្នុងបក្សផ្ទាល់។ គេបានចង្អុលបង្ហាញពីប្រព័ន្ធតុលាការពុករលួយជាបញ្ហាមួយ បក្ខពួកនិយមជាបញ្ហាមួយ ហើយតមក គេនឹងបែរខ្នងចេញ ហើយគ្មានអ្វីត្រូវផ្លាស់ប្តូរទេ»។
ខណៈគណបក្សប្រជាជនបានបោះឆ្នោតគាំទ្រសមាជិកថ្មី ៣០៦ នាក់ ក្នុងគណៈកម្មាធិការកណ្តាលនោះ គ្មានការផ្លាស់ប្តូរក្នុងគណៈកម្មាធិការអចិន្រៃ្តយ៍ ដែលសមាជិកសុទ្ធតែជាជើងចាស់របស់គណបក្ស និងជាប្រធានស្ថាប័នមានអំណាចបំផុតនៅក្នុងប្រទេស។
ទោះយ៉ាងណា ការសំខាន់នោះ គឺអគ្គស្នងការរងនគរបាលជាតិយ៉ាងហោចណាស់ ៩ នាក់ បន្ថែមពីលើឧត្តមសេនីយ៍និងមេបញ្ជាការកងទ័ពមានអំណាចជាច្រើននាក់ ក្នុងនោះ មួយចំនួនបញ្ជាឲ្យបង្ក្រាបផ្ទាល់លើបាតុកម្មនយោបាយ បន្ទាប់ពីបោះឆ្នោត ខែកក្កដា ឆ្នាំ ២០១៣ ក៏បានជាប់ឆ្នោតចូលក្នុងគណៈកម្មការកណ្តាលដែរ។
តាមបញ្ជីឈ្មោះ រួមមានលោក ជួន សុវណ្ណ ស្នងការនគរបាលរាជធានីភ្នំពេញ លោក ហ៊ីង ប៊ុនហៀង មេបញ្ជាការរងនៃកងយោធពលខេមរភូមិន្ទ ជាប្រធានអង្គភាពអង្គរក្សរបស់លោកនាយករដ្ឋមន្រ្តី និងលោក រ័ត្ន ស៊្រាង មេបញ្ជាការកងរាជអាវុធរាជធានីភ្នំពេញ។
លោក Lee Morgenbesser អ្នកស្រាវជ្រាវអំពីរបបផ្តាច់ការនៅអាស៊ីអាគ្នេយ៍នៅសាកលវិទ្យាល័យ Griffith ប្រទេសអូស្ត្រាលី បានថ្លែងថា អាយុកាន់តែចាស់របស់មេដឹកនាំជាន់ខ្ពស់របស់គណបក្សប្រជាជនកម្ពុជា «តម្រូវឲ្យមន្រ្តីក្មេងៗត្រូវយកចូលជំនួស ដើម្បីធានាអំពីភាពយូរអង្វែររបស់បក្សនយោបាយ»។
លោកថ្លែងតាមអ៊ីមែលថា៖ «ប្រភេទនៃការបញ្ចូលមនុស្សសំខាន់ៗ ចូលទៅក្នុងបក្សនេះជាស្តង់ដារអនុវត្តសម្រាប់របបផ្តាច់ការជាច្រើននៅលើពិភពលោក»។
លោកបន្តថា ទំហំនៃការពង្រីកដែលបានធ្វើឡើងចុងសប្តាហ៍នេះគឺ វិសាមញ្ញ។
លោកបន្តថា៖ «គ្មានអ្វីត្រូវសង្ស័យទេ ការពង្រីកគណៈកម្មាធិការកណ្តាលបក្សគឺដើម្បីបញ្ចូលអ្នកធ្វើសេចក្តីសម្រេចសំខាន់ៗបន្ថែមនៅក្នុងយោធានិងនគរបាល ដើម្បីធានាថាស្ថាប័នទាំងនេះនឹងនៅតែស្មោះត្រង់ចំពោះគណបក្សប្រជាជនកម្ពុជា ក្នុងអំឡុងការបោះឆ្នោតនាពេលខាងមុខ»។
លោកបន្ថែមថា ជាលទ្ធផល បើគណបក្សសង្គ្រោះជាតិឈ្នះការបោះឆ្នោតឆ្នាំ ២០១៨ ការផ្ទេរអំណាចដោយសន្តិវិធីនឹងមិនទំនងជាធ្វើទៅរួចទេ។ ប៉ុន្តែ លោកស្រី មូរ សុខហួរ ទទូចថា គណបក្សសង្គ្រោះជាតិជឿថា កម្លាំងប្រដាប់អាវុធនឹងមិនស្តាប់បញ្ជាថ្នាក់លើខ្លួនដើម្បីរារាំងការផ្ទេរអំណាចដោយសន្តិវិធីទេ ប្រសិនបើខ្លួនឈ្នះឆ្នោត ដោយលើកឡើងអំពីបទពិសោធនាថ្មីៗរបស់គណបក្សប្រឆាំងនៅប្រទេសស្រីលង្កា។
អ្នកស្រីបន្ថែមថា៖ «ពួកគេបានឈ្នះដោយសារកងទ័ពនិងកម្លាំងប្រដាប់អាវុធនៅទីបំផុតមិនស្តាប់តាមបញ្ជាថ្នាក់លើ។ សរុបទៅយើងជឿថា ការនេះនឹងដូចគ្នានៅកម្ពុជា»។
មន្រ្តីនគរបាលនិងមន្រ្តីជាន់ខ្ពស់មួយចំនួនមិនអាចទាក់ទងសុំអត្ថាធិប្បាយបានឬបដិសេធមិនធ្វើអត្ថាធិប្បាយ។
កាលថ្ងៃអាទិត្យរដ្ឋមន្រ្តីការពារជាតិ លោក ទៀ បាញ់ បានប្រាប់អ្នកកាសែតថា ការបន្ថែមមន្រ្តីយោធាទៅក្នុងគណៈកម្មាធិការកណ្តាលគឺជា «មធ្យោបាយដើម្បីធ្វើវាឲ្យកាន់តែរឹងមាំ»។
លោក ម៉ុង ឫទ្ធី ព្រឹទ្ធសមាជិក និងជាសមាជិកគណៈកម្មាធិការកណ្តាលគណបក្សប្រជាជនដែលទើបត្រូវបានជ្រើសរើសបានបដិសេធចំពោះការចោទប្រកាន់ អំពីបក្ខពួកនិយមលើគណបក្សលោកកាលម្សិលមិញ ប៉ុន្តែ លោកអះអាងថា «បក្ខពួកនិយម គឺមានគ្រប់ទីកន្លែង មិនមែនតែក្នុងគណបក្សប្រជាជនកម្ពុជាមួយទេ»។
លោកបន្ថែមថា ទោះយ៉ាងណាគណបក្សមានយុទ្ធសាស្រ្តកំណែទម្រង់ថ្មី ហើយការពង្រីកគណៈកម្មាធិការកណ្តាលគឺជាផ្នែកសំខាន់មួយ។ «ប៉ុន្តែមានការសម្ងាត់មួយចំនួនដែលយើងនិយាយមិនបាន»៕TK / PS
