The Phnom Penh Post Search

Search form

Logo of Phnom Penh Post newspaper Phnom Penh Post - CPP ទាមទារ​ឲ្យ CNRP សុំទោស​ចំពោះ​ការ​រិះគន់​ខ្លាំងៗ




CPP ទាមទារ​ឲ្យ CNRP សុំទោស​ចំពោះ​ការ​រិះគន់​ខ្លាំងៗ

Content image - Phnom Penh Post
លោក លី ពឿង នៅក្នុង​ពិធី​នៅ​ប្រទេស​បារាំង​កាលពី​ថ្ងៃ​ទី​ ២៥ ​កុម្ភៈ។ រូបថត ហ្វេសប៊ុក

CPP ទាមទារ​ឲ្យ CNRP សុំទោស​ចំពោះ​ការ​រិះគន់​ខ្លាំងៗ

ភ្នំពេញ: គណបក្ស​ប្រជាជន​បាន​ថ្កោលទោស និង​​ទាមទារ​ឲ្យ​គណបក្ស​សង្គ្រោះ​ជាតិ ធ្វើការ​សុំទោស​ជា​សាធារណៈ​ចំពោះ​រាជរដ្ឋាភិបាល និង​បាន​អំពាវនាវ​ឲ្យ​អាជ្ញាធរ​មាន​សមត្ថកិច្ច​ចាត់​វិធានការ​ជា​បន្ទាន់​ស៊ើបអង្កេត​ចំពោះ​តំណាងរាស្ត្រ​គណបក្ស​ប្រឆាំង​មួយ​​រូប និង​សកម្មជន​មួយ​រូប​ចំពោះ​​អ្វី​ដែល​គណបក្ស​កាន់​អំណាច​អះអាង​ថា​អ្នក​ទាំង​ពីរ​រូប​នេះ​បាន​ចោទ​របប​ដឹកនាំ​នៅ​កម្ពុជា​បច្ចុប្បន្ន​ថា «ជា​របប​តិរច្ឆាន»។

នៅ​ក្នុង​សេចក្តី​ថ្លែងការណ៍​មួយ​ចេញ​​ដោយ​អ្នក​នាំ​ពាក្យ​គណបក្ស​ប្រជាជន​កាលពី​ម្សិលមិញ​បាន​សរសេរ​ថា​គណបក្ស​សូម​ប្រកាស​ថ្កោលទោស​​យ៉ាង​ដាច់​អហង្ការ​ចំពោះ​សេចក្តី​អំពាវនាវ​ដ៏​អកុសល​របស់​គណបក្ស​សង្គ្រោះ​ជាតិ​ដែល​អាន​​ដោយ​លោក​ លី ពឿង ប្រធាន​សាខា​គណបក្ស​សង្គ្រោះ​ជាតិ​ខេត្ត​ លីយ៉ុង​ ប្រទេស​បារាំង​ដោយ​​មាន​វត្តមាន​អ្នក​តំណាងរាស្ត្រ​មណ្ឌល​​ខេត្ត​ព្រៃវែង​លោក ទួត ឃឿត កាលពី​ថ្ងៃ​ទី ២៥ ខែ​កុម្ភៈ ឆ្នាំ ២០១៧។

សេចក្តី​ថ្លែងការណ៍​បញ្ជាក់​ថា​លោក លី ពឿង «បាន​​ជេរ​ប្រមាថ​ជា​សាធារណៈ​បែប​វិកល​ចរិត​ចោទ​ប្រកាន់​ដ៏ខ្មៅ​ងងឹត​ចំពោះ​រាជរដ្ឋាភិបាល​ដែល​ដឹកនាំ​ដោយ​គណបក្ស​ប្រជាជន​កម្ពុជា​ថ្នាក់ដឹកនាំ​គណបក្ស និង​​សេចក្តី​ថ្លៃថ្នូរ​របស់​​ក្រុម​គ្រួសារ​សំដៅ​​ញុះញង់​ឲ្យ​មាន​ការ​រើសអើង​ស្អប់ខ្ពើម​រវាង​ខ្មែរ​ និង​ខ្មែរ​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​ និង​បង្កភាព​បាក់បែក​ក្នុង​សង្គម​ដែល​គម្រាម​​កំហែង​ដល់​សន្តិភាព​​នៅ​កម្ពុជា​»​។

បើ​តាម​គណបក្ស​ប្រជាជន​សេចក្តី​អំពាវនាវ​របស់​គណបក្ស​សង្គ្រោះ​ជាតិ​នៅ​ប្រទេស​បារាំង​បាន​ប្រើ​ពាក្យ​អសុរោះ​គ្រប់​ម៉ាត់​ដូចជា​ការ​ប្រើ​ពាក្យ «របប​តិរច្ឆាន សត្វ​តិរច្ឆាន ជន​ពាល ល្ងង់​ខ្លៅ អាយ៉ង​វៀតណាម បំផ្លិច​បំផ្លាញ​ជាតិ សម្លាប់​ប្រជាជន​ខ្មែរ សាហាវ​ជាង​របប​ខ្មែរ​​ក្រហម លួច​សន្លឹក​ឆ្នោត​ប្លន់​ប្រជាជន សម្លុត​​បាញ់​​ប្រហារ...»។​

សេចក្តី​ថ្លែងការណ៍​នេះ​បន្ត​ថា​គណបក្ស​ប្រជាជន​កម្ពុជា​សូម​អំពាវនាវ​ដល់​ថ្នាក់ដឹកនាំ​គណបក្ស​សង្គ្រោះ​ជាតិ សូម​ពន្យល់​ឲ្យ​បាន​ច្បាស់លាស់​ចំពោះ​សេចក្តី​អំពាវនាវ​ដ៏អកុសល​ខាង​លើ និង​ត្រូវ​សូម​ទោស​រាជរដ្ឋាភិបាល និង​ថ្នាក់ដឹកនាំ​គណបក្ស​ប្រជាជន​ជា​សាធារណៈ។

សេចក្តី​ថ្លែងការណ៍​​បញ្ជាក់​ទៀត​ថា​៖ ​«(គណបក្ស​សង្គ្រោះ​ជាតិ) ត្រូវ​ចាត់​វិធានការ​វិន័យ​ចំពោះ​ឈ្មោះ លី ពឿង និង​ ទួត ឃឿត នេះ​ជា​ដាច់​ខាត។ គណបក្ស​ប្រជាជន​សូម​អំពាវនាវ​ដល់​អាជ្ញាធរ​មាន​សមត្ថកិច្ច​ចាត់​វិធានការ​ជា​​បន្ទាប់​ស៊ើបអង្កេត​លើ​ករណី​នេះ និង​ចាត់​​ការ​តាម​នីតិវិធី​ច្បាប់​ជា​ធរមាន​»។

លោក​ សុខ ឥសាន ​​អ្នក​នាំពាក្យ​​គណបក្ស​ប្រជាជន​បាន​បញ្ជាក់​បន្ថែម​កាលពី​ម្សិលមិញ​ថា​លោក លី ពឿង បាន​ថ្លែង​​ដោយ​ជេរ​ប្រមាថ​មក​លើ​គណបក្ស​ប្រជាជន​នៅក្នុង​ពិធី​ជួបជុំ​សមាជិក​សមាជិកា​គណបក្ស​សង្គ្រោះ​ជាតិ​នៅ​ខេត្ត​លីយ៉ុង ប្រទេស​បារាំង​។

លោក​បញ្ជាក់​ថា​៖ «បរិហារកេរ្តិ៍​សុទ្ធ ឯ​ណា​រដ្ឋ​អំណាច​​តិរច្ឆាន...អ៊ីចឹង​ទៅ...អ្នក​នាំពាក្យ​ទាមទារ​ឲ្យ​អស់​លោក​ហ្នឹង សុំទោស​ជា​សាធារណៈ​ពីព្រោះ​គាត់​វ៉ៃ​ប្រមាថ​លើ​​អាជ្ញាធរ​ដែល​ស្រប​ច្បាប់​អ៊ីចឹង​គឺ​អត់​ត្រូវ​ទេ»។

លោក ឥសាន ​បាន​ឲ្យ​​ដឹង​ថា​ក្រុម​ការងារ​គណបក្ស​ប្រជាជន​បាន​ទទួល​ព័ត៌មាន​ច្បាស់​ការ​ហើយ​សហការី​គណបក្ស​ប្រជាជន​គេ​មិន​មែន​ធ្វើ​សកម្មភាព​តែ​នៅ​ស្រុក​បារាំង​ទេ​គឺ​នៅ​សហរដ្ឋ​អាមេរិក​ក៏​មាន​ដែរ​។

លោក​បញ្ជាក់​​ថា៖«អ៊ីចឹង​យើង​គ្រាន់​តែ​ចេញ​សេចក្តី​ថ្លែងការណ៍​ទាមទារ​ឲ្យ​គាត់​ទទួល​​ខុស​​ត្រូវ​សុំទោស​ជា​សាធារណៈ​តែ​ប៉ុណ្ណឹង​​។ ចាត់​វិធានការ​ច្បាប់​? អត់​ទេ។ ទៅ​ចាប់​គេ​ម៉េច​? គេ​នៅ​ក្នុង​អធិបតេយ្យ​របស់​ប្រទេស​បារាំង​។ លុះត្រា​យើង​មាន​ពាក្យ​​បណ្តឹង។ នេះ​គឺ​គ្រាន់តែ​ជា​សេចក្តី​ថ្លែងការណ៍​ទេ»។

នៅ​ពេល​សាកសួរ ថា​តើ​នឹង​ត្រូវ​ដាក់​បណ្តឹង​ទៅ​តុលាការ​ឬ​យ៉ាង​ណា​លោក​ គី តិច មេធាវី​​ការពារ​ក្តី​ឲ្យ​លោក​នាយក​រដ្ឋមន្ត្រី ហ៊ុន សែន និង​រាជរដ្ឋាភិបាល​បាន​ប្រាប់​ភ្នំពេញ​ប៉ុស្តិ៍​ថា៖ «មក​ដល់​ម៉ោង​នេះ​ខ្ញុំ​មិន​ទាន់​ទទួល​ការ​ណែនាំ​ឲ្យ​ធ្វើ​អ្វី​នោះ​ទេ»។

អ្នក​នាំពាក្យ​គណបក្ស​សង្គ្រោះ​ជាតិ​លោក យ៉ែម បុញ្ញឫទ្ធិ ដែល​ក៏​ជា​អ្នក​តំណាងរាស្ត្រ​មណ្ឌល​ព្រៃវែង​ផង​ដែរ​នោះ​មិន​អាច​ទាក់ទង​សុំ​អធិប្បាយ​បាន​ទេ​កាលពី​ម្សិលមិញ​ដោយ​ទូរស័ព្ទ​របស់​លោក​ពុំ​មាន​អ្នក​ទទួល។

ប៉ុន្តែ​លោក លី ពឿង បាន​ថ្លែង​តាម​តាម​​ទូរស័ព្ទ​កាលពី​ល្ងាចមិញ​​ពី​​ប្រទេស​បារាំង​ថា៖«ខ្ញុំ​ពិតជា​ខក​ចិត្ត​ខ្លាំង​ណាស់​ចំពោះ​ប្រតិកម្ម​របស់​គណបក្ស​ប្រជាជន​ ប៉ុន្តែ​ខ្ញុំ​មិន​ភ្ញាក់​ផ្អើល​នោះ​ទេ»។

ជា​កម្មករ​​ម្នាក់​ធ្វើការ​នៅ​ក្នុង​ហាង​លក់​គ្រឿង​​បន្លាស់​រថយន្ត​ និង​ជា​មេដឹកនាំ​នៃ​បណ្តាញ​​របស់​គណបក្ស​សង្គ្រោះ​ជាតិ​នៅ​ខេត្ត​លីយ៉ុង​លោក​ ពឿង​ បាន​និយាយ​​ថា​លោក​​បាន​មក​រស់នៅ​ក្នុង​ប្រទេស​បារាំង​ចាប់​តាំងពី​ឆ្នាំ​ ១៩៨៥ ​មក​​ម្ល៉េះ​​ហើយ​លោក​​បាន​ធ្វើ​ដំណើរ​មក​លេង​ស្រុក​ខ្មែរ​​បាន​បី​ដង​ដែរ ហើយ​​ការ​ធ្វើ​ដំណើរ​មក​លេង​ចុងក្រោយ​គឺ​នៅ​ក្នុង​ឆ្នាំ​ ២០០៥។

លោក​​ថ្លែង​ថា៖ ​«​ខ្ញុំ​បាន​តាមដាន​ស្ថានការណ៍​ក្នុង​ប្រទេស​កម្ពុជា​ចាប់​តាំងពី​ការ​កាន់កាប់​របស់​វៀតណាម​មក​ម្ល៉េះ​។ យើង​មាន​បញ្ហា​ជាច្រើន​នៅក្នុង​ប្រទេស​គឺ​ប្រជាជន​នៅ​តែ​ក្រីក្រ​ហើយ​មេដឹកនាំ​កំពុង​តែ​លួច​អ្វីៗ​ពី​ប្រទេស​យើង​ដើម្បី​ឲ្យ​ក្លាយ​ជា​អ្នក​​មាន»។​

លោក ពឿង បាន​​ថ្លែង​បែប​នេះ​ដោយ​​ចង់​ចង្អុល​ទៅ​ដល់​ការ​បំផ្លិច​បំផ្លាញ​ព្រៃឈើ​ និង​ការ​ទាញ​យក​ផល​ពី​ធនធាន​ធម្មជាតិ​របស់​ប្រទេស​កម្ពុជា​ដើម្បី​ធ្វើ​មាន​ធ្វើ​បាន​របស់​លោក​ ហ៊ុន ​សែន និង​មន្ត្រី​ជាន់​ខ្ពស់​រដ្ឋាភិបាល​មួយ​ចំនួន​​។

លោក​ លី ពឿង​ ក៏​បាន​បញ្ជាក់​ដែរ​ថា​៖ «ប៉ុន្តែ​គ្មាន​នរណា​ម្នាក់​អាច​រិះគន់​លោក​ ហ៊ុន សែន​ បាន​ទេ ...​បើ​សិន​រិះគន់​គាត់​​នោះ​​អ្នក​នឹង​ត្រូវ​ជាប់​ពន្ធនាគារ​»៕ NS

រាយការណ៍​បន្ថែម​ដោយ Shaun Turton

អត្ថបទគួរចាប់អារម្មណ៍