.jpg)
លោក សួស យ៉ារ៉ា (ស្ដាំ) និងលោក ឈឹម ផលវរុណ អ្នកនាំពាក្យគណបក្សប្រជាជនកម្ពុជាថ្លែងនៅក្នុងសន្និសីទសារព័ត៌មានពីម្សិលមិញ។ ហុង មិនា
ភ្នំពេញៈ អង្គសន្និបាតគណៈកម្មាធិការកណ្ដាលនៃគណបក្សប្រជាជនកម្ពុជាកាលពីម្សិលមិញបានកែសម្រួលរចនាសម្ព័ន្ធ និងបោះឆ្នោតជ្រើសតាំងបន្ថែមសមាជិកគណៈអន្រៃ្តយ៍នៃគណៈកម្មាធិការកណ្ដាលចំនួន ៧ រូបបន្ថែមពីលើរចនាសម្ព័ន្ធដែលមានស្រាប់ចំនួន ៣០ រូប។
យោងតាមសេចក្ដីជូនដំណឹងស្ដីពីលទ្ធផលនៃសន្និបាតគណៈកម្មាធិការកណ្ដាលលើកទី ៤១ អាណត្តិទី V របស់គណបក្សប្រជាជនកម្ពុជា ចេញផ្សាយកាលពីម្សិលមិញបានឲ្យដឹងថា សមាជិកជាប់ឆ្នោតទាំង ៧ រូបគឺលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងហិរញ្ញវត្ថុ លោក វង្ស ពិសេន អគ្គមេបញ្ជាការកងយោធពលខេមរភូមិន្ទលោក សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសលោក ឥត សារ៉ាត់ នាយសេនាធិការចម្រុះ កងយោធពលខេមរភូមិន្ទលោក ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ មេបញ្ជាការកងទ័ពជើងគោក និង ជាមេបញ្ជាការកងអង្គភាពប្រឆាំងអំពើភេរវកម្ម។ ដោយឡែកលោក ឯក សំអុល ក៏ត្រូវបានជាប់ឆ្នោតជាប្រធានគណត្រួតពិនិត្យរបស់បក្សជំនួសលោកនៃប៉េណាដែលបានទទួលមរណភាព។
សន្និបាតគណៈកម្មាធិការកណ្ដាលបើកទូលាយលើកទី ៤១ អាណត្តិទី V របស់គណបក្សប្រជាជនបានដំណើរការចាប់តាំងពីថ្ងៃទី ១៨ ហើយបានបញ្ចប់កាលពីម្សិលមិញដោយមានសមាសភាពចូលរួមចំនួន ៣១៦៤ រូបក្រោមអធិបតីភាពលោក ហ៊ុន សែន ប្រធានគណបក្ស និងជានាយករដ្ឋមន្ត្រីនៃព្រះរាជាណាចក្រកម្ពុជា និងលោក ហេង សំរិន ប្រធានកិត្តិយសគណបក្ស និងប្រធានរដ្ឋសភា។
តាមសេចក្ដីជូនដំណឹងដដែលនេះបានឲ្យដឹងថា៖ «តាមរយៈការបោះឆ្នោត [កន្លងទៅ] នេះបានឆ្លុះបញ្ចាំងឲ្យឃើញច្បាស់ថាប្រជាជនគាំទ្រយ៉ាងមុតមាំដល់ដំណើរការដ៏ល្អនៃលទ្ធិប្រជាធិបតេយ្យ និងសិទ្ធិសេរីភាពនៅកម្ពុជាក្នុងការបន្តដឹកនាំប្រទេសលើមាគ៌ាសន្តិភាព ការអភិវឌ្ឍ និងការកែទម្រង់»។
លើសពីនេះទៅទៀតអង្គសន្និបាតបានតម្កល់ខ្ពស់ស្មារតីស្នេហាជាតិ ការពារដាច់ខាតនូវឯករាជ អធិបតេយ្យ និងបូរណភាពទឹកដី ប្រឆាំងការជ្រៀតជ្រែករបស់បរទេសចូលកិច្ចការផ្ទៃក្នុងកម្ពុជា ការមួលបង្កាច់ ភាពត្រឹមត្រូវនៃនយោបាយ និងសកម្មភាពរបស់កម្ពុជាដោយមិនឱនក្បាលចំពោះការដាក់សម្ពាធណាពីខាងក្រៅ។» ជាមួយគ្នានេះដែរ អង្គសន្និបាតបានធ្វើការព្រមានអនុវត្តច្បាប់យ៉ាងម៉ឺងម៉ាត់ដើម្បីថែរសណ្ដាប់ធ្នាប់ និងសុវត្ថិភាពសង្គមឲ្យបានរឹងមាំរាំងស្កាត់រាល់សកម្មភាពប្រទូសរ៉ាយដែលបង្កដោយពួកប្រឆាំង និងមជ្ឈដ្ឋានអគតិនានា ។
សមាជិកគណបក្សប្រជាជនកម្ពុជាពេលចេញពីសន្និបាតគណៈកម្មាធិការកណ្ដាលបក្សពីម្សិលមិញ។ រូបថត ហ្វេសប៊ុក SPM
សេចក្ដីជូនដំណឹងបន្ថែមថាគណបក្សប្រជាជនកម្ពុជានឹងបន្តគាំទ្រពេញទំហឹងនូវចំណងមិត្តភាពជាមួយប្រទេសជិតខាង និង « ការពន្លឿនការដោះស្រាយបញ្ចប់បញ្ហាព្រំដែនដែលនៅសេសសល់សំដៅកសាងខ្សែបន្ទាត់ព្រំដែនរួមប្រកបដោយមិត្តភាព សន្តិភាព ស្ថិរភាព និងសហប្រតិបត្តិការរឹងមាំយូរអង្វែង។»
ចំពោះវិស័យសេដ្ឋកិច្ចសេចក្ដីជូនដំណឹងបានបង្ហាញមោទនភាពលើរាជរដ្ឋាភិបាលដែលសម្រេចកំណើនសេដ្ឋកិច្ចខ្ពស់ ៧,៣% និងបានកាត់បន្ថយអត្រាភាពក្រីក្រឲ្យធ្លាក់ចុះមកក្នុងរង្វង់ ៩% ក្នុងឆ្នាំ ២០១៨»។
លោក ឈឹម ផលវរុន អ្នកនាំពាក្យគណបក្សប្រជាជនកម្ពុជាថ្លែងទៅកាន់អ្នកសារព័ត៌មាននៅក្នុងសន្និសិតថា៖ «ដំណើរការនៃសន្និបាតគណៈកម្មាធិការកណ្តាលរបស់គណបក្សប្រជាជនយើងបានដំណើរទៅដោយប្រក្រតីតាមលក្ខខណ្ឌកំណត់របស់គណបក្សហើយយើងធ្វើការវាយតម្លៃទៅលើការងារគណបក្សក្នុងនាមជាគណបក្សដឹកនាំរាជរដ្ឋាភិបាលរយៈពេលមួយឆ្នាំកន្លងមក តើយើងបានសម្រេចអ្វីខ្លះហើយមានអ្វីដែលយើងត្រូវបន្ត និងកែលម្អ និងបន្ថែមការងារ។ ជាមួយគ្នានោះផងយើងក៏បានកំណត់ទិសដៅសម្រាប់ឆ្នាំ ២០១៩ ហើយយើងផ្តោតខ្លាំងទៅលើកំណែរទម្រង់ខាងក្នុង និងពង្រីកមិត្តភាពទៅខាងក្រៅ»។
លោក ផលវរុន ថ្លែងបន្តថា៖ «យើងអនុវត្តនៅរបបនយោបាយប្រជាធិបតេយ្យ សេរីពហុបក្សមានន័យថាគណបក្សដឹកនាំប្រទេសតាមរយៈសន្លឹកឆ្នោតដូច្នេះគណបក្សទទួលបាននូវការគាំទ្រពីប្រជាពលរដ្ឋម្ចាស់ឆ្នោត និងម្ចាស់អំណាចដែលគាត់គាំទ្រនៅកម្មវិធីនយោបាយរបស់គណបក្ស។ ដូច្នេះគណបក្សត្រូវតែមានការទទួលខុសត្រូវតបជូនប្រជាពលរដ្ឋម្ចាស់ឆ្នោតវិញគឺយកកម្មវិធីនយោបាយរបស់ខ្លួនដែលយកទៅឃោសនាបោះឆ្នោតបម្លែងទៅជាកម្មវិធីនយោបាយរបស់រាជរដ្ឋាភិបាល»។
តាមព័ត៌មានពីអ្នកចូលរួមអង្គសន្និបាតដែលសូមមិនបញ្ចេញឈ្មោះបានឲ្យដឹងថាលោកនាយករដ្ឋមន្ត្រី ហ៊ុន សែន ក្នុងនាមជាប្រធានបក្សបានក្រើនរំឭកដល់មន្ត្រីបក្សទាំងអស់ឲ្យយកចិត្តទុកដាក់បម្រើរាស្ត្រ និងដោះស្រាយបញ្ហាជូនរាស្ត្រឲ្យបានទាន់ពេលវេលាចៀសវាងពីការចិញ្ចឹមបញ្ហា។ លោកក៏បានក្រើនរំឭកដល់រដ្ឋមន្ត្រីទាំងអស់ឲ្យខិតខំបង្ខិតសេវាទៅរកប្រជាជនឲ្យបានច្រើន ពុំនោះសោធទេនឹងមានការផ្លាស់ប្ដូរគណរដ្ឋមន្ត្រីមួយនៅឆ្នាំ ២០២០ នេះមិនខាន។
ចំពោះលោក មាស នី អ្នកវិភាគនយោបាយថ្លែងថាគណបក្សប្រជាជនកម្ពុជាបាននិងកំពុងខិតខំប្រឹងប្រែងដាក់កូនថា្នក់ដឹកនាំ និងមន្ត្រីជំនិតរបស់ខ្លួនដើម្បីរក្សាអំណាច និងពង្រឹងរចនាសម្ព័ន្ធរបស់ខ្លូន។
លោកបន្តថា៖ «ការដាក់បញ្ចូលសមាជិកថ្មីនៅក្នុងនេះ ដើម្បីពង្រឹងរចនាសម្ព័ន្ធរបស់គណបក្សនាពេលអនាគតយើងមើលសមាសភាពទាំងអស់ដែលមានមន្ត្រីជាន់ខ្ពស់ស៊ីវិលក្នុងអចិន្រៃ្តយ៍នៃគណៈកម្មាធិការកណ្ដាលវាជារឿងធម្មតា»៕
