.jpg)
អ្នកជំនាញ CPU ចុះអង្កេតករណីសម្លាប់ក្មេងនៅខេត្តកំពង់ស្ពឺពីថ្ងៃ ១៤ មីនា។ រូប CPU
ភ្នំពេញ៖ ក្នុងរយៈពេល ៩ ឆ្នាំមកនេះ អង្គភាពការពារកុមារ (CPU) បានចូលរួមធ្វើការស៊ើបអង្កេតជាមួយសមត្ថកិច្ចក្នុងសំណុំរឿងឃាតកម្មលើកុមារបានប្រមាណ ២០០ ករណី ដោយអង្គការនេះ ចាត់ទុកអំពើឃាតកម្ម ដែលបានកើតឡើងលើកុមារទាំងនេះ គឺជាភាពងងឹត និងភាពសោកសៅ។
នៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី ១៥ មីនា អង្គការ CPU បានឱ្យដឹងថា ២០០ ករណី ដែលក្រុមការងារ CPU បានចូលរួមស៊ើបអង្កេតជាមួយសមត្ថកិច្ច គឺជាការលះបង់ និងការប្តេជ្ញា ដែលតួលេខនេះ គឺមិនមែនជាតួលេខសម្រាប់ការអបអរសាទរ ឬមោទនភាពនោះទេ។ ផ្ទុយទៅវិញវាជាតួលេខពោរពេញទៅដោយភាពងងឹត និងភាពសោកសៅ។ ថ្ងៃទី ១៥ ខែមីនា គឺជាថ្ងៃដែលក្រុមការងារទទួលសំណុំរឿងគម្រប់ចំនួន ២០០ ករណីឃាតកម្ម និងករណីស្លាប់ដោយមានការសង្ស័យរបស់កុមារដែលអង្គភាពការពារកុមារ (CPU) បានចូលរួមធ្វើការស៊ើបអង្កេត។
ក្រៅពីបង្ហាញតួលេខនេះ ក្នុងនាមនាយកប្រតិបត្តិអង្គភាពការពារកុមារ លោក James McCabe បានសរសេរទៀតថា លោកចង់ផ្តោតទៅលើក្រុមការងារតូចរបស់លោក ដែលប្រតិបត្តិការជុំវិញ ២៤ ម៉ោង ក្នុង ១ ថ្ងៃ ៧ ថ្ងៃក្នុង ១ សប្តាហ៍ អស់រយៈពេល ៩ ឆ្នាំមកហើយ ដើម្បីធ្វើការស៊ើបអង្កេតចំពោះករណីបែបនេះ។
លោកបានបញ្ជាក់ថា៖ «ក្នុងឆ្នាំ ២០១៣ យើងបានចាប់ផ្តើមបង្កើតជាក្រុមការងារជំនាញស៊ើបអង្កេតករណីឃាតកម្មលើកុមារដំបូងគេ នៅក្នុងប្រទេស ដោយមានសមាជិក ៣ នាក់។ សមាជិកក្រុមការងារនេះ បានកើនឡើងដល់ទៅ ១០ នាក់ ដែលមានបទពិសោធជំនាញខ្ពស់ មានការប្តេជ្ញា និងវិជ្ជាជីវៈរួមមានជាមន្ត្រីជំនាញផ្នែកកោសល្យវិច័យ មន្ត្រីស៊ើបអង្កេត និងមន្ត្រីគាំពារ ប្រចាំការនៅក្នុងការស៊ើបអង្កេតករណីឃាតកម្មទៅលើកុមារនីមួយៗ និងគាំពារដល់ក្រុមគ្រួសារសាកសព។ ខ្ញុំមានមោទនភាពក្នុងការដឹកនាំក្រុមការងារដែលមានការប្តេជ្ញាមួយនេះ»។
ជាបទពិសោធ លោក James McCabe សង្កត់ធ្ងន់ថា គ្រប់ករណីឃាតកម្មទៅលើកុមារ ត្រូវបានក្រុម CPU ចងចាំជានិច្ច និងគា្មនថ្ងៃភ្លេច ប៉ុន្តែតែងតែមានករណីខ្លះៗដែលនឹងបន្សល់ទុកនូវស្លាកស្នាមខ្លោចផ្សានៅលើបេះដូងយើងជានិច្ច ដែលនេះគឺជាធម្មជាតិនៃការងាររបស់យើង ហើយគ្មាននរណាម្នាក់ចៀសផុតពីបញ្ហានេះបានទេ ហើយយើងនឹងចងចាំរហូតអំពីករណីដែលបានប៉ះពាល់ដល់អារម្មណ៍យើងបំផុត។ លោកបញ្ជាក់ថា៖ «នេះ គឺជាការពិត ដែលយើងត្រូវតែមានអារម្មណ៍ខឹង និងស្អប់ខ្ពើមដល់ជនល្មើស ដើម្បីជំរុញឱ្យយើងស្វែងរកភាពយុត្តិធម៌ និងធ្វើឱ្យប្រាកដថា គ្រប់បុគ្គលដែលបង្កគ្រោះថ្នាក់ដល់កុមារ នឹងត្រូវទទួលខុសត្រូវចំពោះមុខច្បាប់នូវអំពើរបស់ខ្លួន»។
កាលពីឆ្នាំ ២០១៩ ក្រសួងមហាផ្ទៃបានចុះហត្ថលេខាលើអនុស្សរណៈយោគយល់គ្នា (MOU) ជាមួយអង្គការសង្គមស៊ីវិលចំនួន ៥ ដែលធ្វើការប្រឆាំងការជួញដូរមនុស្ស ជាពិសេសផ្តោតលើការការពារកុមារក្នុងនោះក៏មានអង្គការ CPU ផងដែរ។
លោកស្រី ជូ ប៊ុនអេង ជាអនុប្រធានអចិន្រៃ្តយ៍នៃគណៈកម្មាធិការជាតិ ប្រយុទ្ធប្រឆាំងការជួញដូរថ្លែងពីម្សិលមិញថា ក្នុងពេលបច្ចុប្បន្នបទល្មើសដែលបានកើតឡើង គឺកាន់តែមានរូបភាពអាក្រក់ឡើងៗជាពិសេសបទល្មើសដែលបានកើតមានឡើងលើកុមារ។ លោកស្រីបន្តថា រូបភាពសាហាវទាំងនេះ ក៏ព្រោះតែជនល្មើសភាគច្រើន ច្រើនតែជាអ្នកដែលបាត់បង់សតិ ដោយសារបញ្ហាគ្រឿងញៀន។ «បច្ចុប្បន្ននេះបញ្ហាដែលបានកើតមានឡើងពាក់ព័ន្ធនឹងបទឧក្រិដ្ឋ ឬអំពើហិង្សានេះ កើតឡើងច្រើនណាស់ តែវាមិនមែនមានតែកម្ពុជាទេ។ កម្ពុជាយើងក៏ទទួលនូវសម្ពាធខាងផ្លូវអារម្មណ៍ ឬរៀនសូត្រពីបណ្តាញសង្គមនានាគ្រប់រូបភាព តែបើយើងមិនខំប្រឹងបន្ថែមទៀតទេ យើងនឹងជួបបញ្ហាធ្ងន់ដូច្នេះយើងខំប្រឹងទប់ស្កាត់ និងដោះស្រាយបានល្អប្រសើរ»។
យ៉ាងណាក្តីលោកស្រី ជូ ប៊ុនអេង បានបញ្ជាក់ថា ក្នុងនាមអាជ្ញាធរមានសមត្ថកិច្ចដោយមានការសហការពីក្រុមអង្គការជាដៃគូ នឹងបន្តការប្តេជ្ញាចិត្ត ក្នុងការបង្ក្រាប និងទប់ស្កាត់ថែមទាំងបានអប់រំផ្សព្វផ្សាយបន្ថែមទៀត ដើម្បីធ្វើយ៉ាងណាឱ្យប្រាកដថា ជនប្រព្រឹត្តបទល្មើស ត្រូវតែទទួលទោសតាមច្បាប់។
លោកស្រីបន្ថែមថា៖ «យើងពេញចិត្តនឹងបញ្ហាការសហការជាមួយគ្នា (CPU) ដោយសារតែអង្គការនេះ ក៏ដូចជាអង្គការដៃគូទាំងអស់ គាត់ធ្វើការបានល្អ និងសហការជាមួយកម្លាំងសមត្ថកិច្ច ជាពិសេសបទល្មើសដែល CPU ចូលរួមស៊ើបអង្កេត គឺបង្ក្រាបបានដល់ទៅជាង ៩០ ភាគរយ»៕
វីដេអូ៖
