.jpg)
គ្រាប់មិនទាន់ផ្ទុះជាច្រើនគ្រាប់ ត្រូវបានរកឃើញដោយអង្គការដោះមីនកម្ពុជា។ រូបថត CSHD
ឧត្ដរមានជ័យៈ អង្គការដោះមីនកម្ពុជា (CSHD) កាលពីម្សិលមិញបានកម្ទេចគ្រាប់មិនទាន់ផ្ទុះចម្រុះចំនួន ១៨១ គ្រាប់ បន្ទាប់ពីរកឃើញពីថ្ងៃទី ៤ មេសា នៅភូមិពោធិ៍ចាស់ ឃុំបេង ស្រុកបន្ទាយអម្ពិល ខេត្តឧត្តរមានជ័យ ខណៈក្នុងឆ្នាំ ២០២០ ខេត្តនេះប្រមូលគ្រាប់ចម្រុះបាន ៣ ៣៥២ គ្រាប់ និងគ្រាប់កាំភ្លើងដៃចំនួន ១១៦,៥ គីឡូក្រាម។
លោក ឈុន ប៉ូរ៉ា មន្ត្រីបណ្តុះបណ្តាលជំនាញដោះមីន និងត្រួតពិនិត្យបច្ចេកទេសដោះមីននៃអង្គការដោះមីនកម្ពុជាបានប្រាប់ពីម្សិលមិញថា អង្គការលោកបានបំផ្ទុះកម្ទេចគ្រាប់ចម្រុះចំនួន ១៨១ គ្រាប់ និងគ្រាប់កាំភ្លើងដៃចំនួន ១១០ គីឡូក្រាម។ ប៉ុន្តែទីតាំងដែលយកគ្រាប់ទៅកម្ទេចនោះគឺនៅឯស្រុកជីក្រែង ខេត្តសៀមរាបឯណោះទេ ព្រោះថានៅស្រុកជីក្រែងមានទីលានធំ ងាយស្រួលធ្វើការងារ និងមានសុវត្ថិភាព។
លោកថ្លែងថា៖ «យើងមិនបានសហការជាមួយអាជ្ញាធរមីនកម្ពុជាទេ គឺយើងកម្ទេចគ្រាប់ទាំងនោះដោយផ្ទាល់របស់យើង ប៉ុន្តែទីតាំងដែលយើងជ្រើសរើសសម្រាប់កម្ទេចគឺយើងស្នើសុំពីអាជ្ញាធរស្រុក-ខេត្តជាមុន ទើបបានកម្ទេច ព្រោះបើទីតាំងរកឃើញគ្រាប់យើងមិនអាចកម្ទេចបានទេ ព្រោះប៉ះផ្ទះពលរដ្ឋ»។
បើតាមលោក បូរ៉ា កាលពីថ្ងៃទី ៤ មេសា មានពលរដ្ឋម្នាក់នៅភូមិពោធិ៍ចាស់ ឃុំបេងបានបើកត្រាក់ទ័រភ្ជួរដីហើយបានឃើញគ្រាប់កាំភ្លើងមួយចំនួនផុសចេញពីដី។ ពេលនោះគាត់ក៏បានរាយការណ៍ទៅប៉ុស្តិ៍នគរបាលឃុំបេង ហើយនគរបាលឃុំក៏រាយការណ៍បន្តទៅអធិការនគរបាលស្រុកទើបមានការជូនដំណឹងដល់អង្គការរបស់លោក។
លោកបន្តថា ក្រោយពីទទួលដំណឹងលោកបាននាំមន្ត្រីជំនាញចុះដល់ទីតាំងនោះហើយលោកបានដាក់ម៉ាស៊ីនរាវរកគ្រាប់នៅជុំវិញបរិវេណនោះរហូតប្រមូលបានគ្រាប់មិនទាន់ផ្ទុះប្រភេទ ៨២ មិល្លីម៉ែត្រ គ្រាប់មីន គ្រាប់ B40 គ្រាប់រ៉ុក្កែត គ្រាប់ឡង់ គ្រាប់កាំភ្លើងត្បាល់...សរុបចំនួន ១៨១ គ្រាប់ និងគ្រាប់កាំភ្លើងដៃមានចំនួន ១១០ គីឡូក្រាម។
លោកថា៖ «គ្រាប់ទាំងនោះសុទ្ធតែមានគុណភាពអាចនៅប្រើបាន ព្រោះវាត្រូវគេស្រោបដាក់ស្រោម ប៉ុន្តែមានគ្រាប់ខ្លះចូលទឹកមានច្រែះចាប់ តែនៅមានគុណភាព»។
ជាមួយគ្នានេះ លោក ឈុន ប៉ូរ៉ា ក៏បានឱ្យដឹងដែរថា សម្រាប់ឆ្នាំ ២០២០ ក្នុងខេត្តឧត្តរមានជ័យទាំងមូល អង្គការរបស់លោកបានរកឃើញគ្រាប់ចម្រុះច្រើនប្រភេទរួមមានមីនប្រឆាំងមនុស្សមីនប្រឆាំងរថក្រោះ មីនច្នៃ គ្រាប់ UCO ក្បាលផ្ទុះគ្រប់ប្រភេទ គ្រាប់បែកចង្កោមសរុបចំនួន ៣ ៣៥២ គ្រាប់ និងគ្រាប់កាំភ្លើងដៃចំនួន ១១៦,៥ គីឡូក្រាមផងដែរ។
ដោយឡែកក្នុងរយៈពេល ៣ ខែឆ្នាំនេះ អង្គការរបស់លោកបានរកឃើញគ្រាប់មីនប្រឆាំងមនុស្ស ៣៦៩ គ្រាប់ មីនប្រឆាំងរថគ្រោះ ២ គ្រាប់ គ្រាប់យុទ្ធភណ្ឌមិនទាន់ផ្ទុះគ្រប់ប្រភេទ ៧៦៧ គ្រាប់ក្បាលផ្ទុះចំនួន ៥៩ គ្រាប់ គ្រាប់កាំភ្លើងដៃ ៨ គីឡូដែលគ្រាប់ទាំងនោះត្រូវបានកម្ទេចចោលទាំងអស់។ ចំពោះស្រុកដែលសម្បូរគ្រាប់ជាងគេគឺនៅស្រុកបន្ទាយអម្ពិលតែម្តង។
ពាក់ព័ន្ធនឹងការរកឃើញគ្រាប់ចំនួន ១៨១ គ្រាប់ចុងក្រោយនេះលោក ថង កុសល អធិការនគរបាលស្រុកបន្ទាយអម្ពិលប្រាប់កាលពីម្សិលមិញថា ករណីនេះគឺដំបូងពលរដ្ឋបានភ្ជួរដីប្រទះឃើញហើយបានរាយការណ៍ប្រាប់លោក ប៉ុន្តែលោកបានប្រគល់ទៅខាងជំនាញដើម្បីឱ្យមកយកគ្រាប់ទាំងនោះ៕
