.jpg)
លោក ហូលីយ៉ូអេ ហេលដ្រែស និងលោក ឆាំង យុ (ស្តាំ) នៅមជ្ឈមណ្ឌល DC-Cam។ រូប DC-Cam
ភ្នំពេញៈ លោក ឆាំង យុ ប្រធានមជ្ឈមណ្ឌលឯកសារកម្ពុជា (DC-Cam) ចាត់ទុកឯកសារថ្មីស្តីអំពីប្រវត្តិសាស្ត្រកម្ពុជាសហសម័យជាពិសេសក្នុងសម័យកម្ពុជាប្រជាធិបតេយ្យដែលបានផ្តល់ដោយលោក ហូលីយ៉ូអេ ហេល ដ្រែស ថាវាមានតម្លៃជាឯកសារប្រវត្តិសាស្ត្រដ៏មានតម្លៃ និងសំខាន់ សម្រាប់សង្គមសព្វថ្ងៃ ជាពិសេសសាធារណជនអ្នកស្រាវជ្រាវ សិស្សានុសិស្ស និងគ្រូបង្រៀនប្រើប្រាស់។
ការថ្លែងរបស់លោកនាយកមជ្ឈមណ្ឌលឯកសារកម្ពុជា លោក ឆាំង យុ បានធ្វើឡើងបន្ទាប់ពីមជ្ឈមណ្ឌលឯកសារកម្ពុជាបានទទួលឯកសារថ្មីស្តីអំពីប្រវត្តិសាស្ត្រកម្ពុជាសហសម័យ។ ជាពិសេសក្នុងសម័យកម្ពុជាប្រជាធិបតេយ្យ ប៉ុលពត ដែលទទួលបានពីលោកហេលដ្រែស ដែលជាអតីតលេខាផ្ទាល់ និងជាអ្នកសរសេរជីវប្រវត្តិរបស់អតីតព្រះមហាវីរក្សត្រព្រះបាទនរោត្តម សីហនុ នៃព្រះរាជាណាចក្រកម្ពុជា និងអ្នកស្រាវជ្រាវជាន់ខ្ពស់នៃវិទ្យាស្ថានសិក្សាអំពីទស្សនវិជ្ជាប្រវត្តិសាស្ត្រ និងអន្តរជាតិនៃសាកលវិទ្យាល័យម៉ូណាស។
លោក ឆាំង យុ បានថ្លែងថាមជ្ឈមណ្ឌលឯកសារកម្ពុជាបានទទួលឯកសារថ្មីស្តីអំពីប្រវត្តិសាស្ត្រកម្ពុជាសហសម័យដែលរួមមាន រូបភាព សៀវភៅ ក្រដាស ខ្សែភាពយន្ត ជារូបថតជាវត្ថុ CDs, Picture Frames និងឯកសារសិក្សាស្រាវជ្រាវសម័យខ្មែរក្រហមដែលមានទម្ងន់ប្រមាណ ១ តោន និង ៥៨០ គីឡូក្រាមកាលពីថ្ងៃទី ៦ ខែធ្នូ។ ឯកសារប្រវត្តិសាស្ត្រនេះនឹងចូលរួមចំណែកនៅក្នុងការអប់រំយុវជន និងសិស្សានុសិស្ស អ្នកស្រាវជ្រាវ និងសាធារណជននឹងជួយបង្កើនការបង្រៀនប្រវត្តិសាស្ត្រខ្មែរក្រហមឲ្យកាន់តែមានប្រសិទ្ធភាព។
លោកបានបញ្ជាក់ថា៖ «យើងនឹងថែរក្សាវាតាមរបៀបថតចម្លងឌីជីថល និងធ្វើការចែកចាយទៅតាមការិយាល័យស្រាវជ្រាវរបស់យើងដែលបានធ្វើការសហការជាមួយក្រសួងអប់រំក្នុងមជ្ឈមណ្ឌលទាំង ៦ នៅក្នុងប្រទេស កម្ពុជា។ យើងស្កេន និងថត និងចម្លងវាហើយដាក់ចូលទៅក្នុងប្រព័ន្ធកុំព្យូទ័រ ហើយនឹងចែកចាយតាមប្រព័ន្ធអ៊ីនធឺណិតដែលសាធារណជនអាចមើល និងប្រើប្រាស់បាន។ ឯកសារទាំងអស់នេះយើងមិនធ្វើការវិភាគទេគឺយើងរក្សាទុកភាពដើមរបស់វា ដើម្បីសម្រួលដល់ការធ្វើការស្រាវជ្រាវរបស់សាធារណជន សិស្សានុសិស្ស និងគ្រូបង្រៀនផង»។
លោកបន្ថែមថា៖ «ឯកសារទាំងអស់ដែលទាក់ទងនឹងសម័យប៉ុលពតសុទ្ធតែមានតម្លៃដោយសារវាធ្វើឲ្យយើងយល់កាន់តែច្បាស់ថា មូលហេតុអ្វីបានជារបបប៉ុលពតមានរូបរាង និងឡើងកាន់អំណាចសម្លាប់ប្រជាជនកម្ពុជាប្រមាណ ២ លាននាក់។ ឯកសារនេះគឺជាបំណែកនៃសាច់រឿងទាំងស្រុង។ ដូច្នេះហើយវាមានតម្លៃជាប្រវត្តិសាស្ត្រ និងសង្គមយើងសព្វថ្ងៃ»។
លោកបានឲ្យដឹងដែរថា ឯកសារប្រវត្តិសាស្ត្រខាងលើនេះមានប្រភពមកពីស្ថាប័នសន្តិសុខ ក្រសួងការបរទេស វិទ្យាស្ថានសិក្សាស្រាវជ្រាវជាន់ខ្ពស់មកពីប្រទេសអូស្ត្រាលី អង់គ្លេស កាណាដា បារាំង ន័រវែស ស៊ុយអែត និងប្រទេសស្វ៊ីស។
លោក ហូលីយ៉ូអេ ហេលដ្រែស បានថ្លែងថា លោកបានចាប់អារម្មណ៍ប្រទេស កម្ពុជា ចាប់តាំងពីលោកវ័យក្មេង។ លោកចាប់ផ្តើមធ្វើការស្រាវជ្រាវពីប្រវត្តិកម្ពុជាពីបុគ្គលផ្សេងៗជុំវិញពិភពលោក។
លោកថា អតីតព្រះមហាវីរក្សត្រព្រះបាទនរោត្តម សីហនុ នៃព្រះរាជាណាចក្រកម្ពុជាគឺជាបុគ្គលទី ១ ដែលបានផ្តល់បណ្ណាល័យព័ត៌មានជូនរូបលោក។ លោកបានចំណាយពេលស្ទើរតែមួយជីវិតដែលមានរយៈពេលប្រមាណជាង ៥០ ឆ្នាំដើម្បីសិក្សាស្រាវជ្រាវប្រមូលឯកសារប្រវត្តិសាស្ត្រទាំងនេះ ដោយសារតែលោកមានការចាប់អារម្មណ៍ទៅលើប្រវត្តិសាស្ត្រកម្ពុជា។ ជាពិសេសប្រាសាទបុរាណ របបរាជានិយម និងការប្រាស្រ័យទាក់ទងយ៉ាងជិតស្និទ្ធរវាងអតីតព្រះមហាក្សត្រជាមួយប្រជាពលរដ្ឋ។
លោកបានបញ្ជាក់ថា៖ «ខ្ញុំគិតថាផ្តល់ឲ្យមជ្ឈមណ្ឌលឯកសារកម្ពុជាដោយសារវាគឺជាមជ្ឈមណ្ឌលតែ ១ គត់ដែលមានធនធានបុគ្គល ដើម្បីថែរក្សាឯកសារ សៀវភៅប្រវត្តិសាស្ត្រនេះដែលជាផលប្រយោជន៍សម្រាប់អ្នកសិក្សាស្រាវជ្រាវ និងសិស្សានុសិស្សនៅកម្ពុជា»៕
