ភ្នំពេញ៖ ខណៈដែលសិស្សត្រូវបានអនុញ្ញាតឱ្យឈប់សម្រាកវិស្សមកាលតូច មុនពេលកំណត់ បន្ទាប់ពីមានការរាតត្បាតនៃជំងឺផ្លូវដង្ហើមថ្មី ដែលហៅកូវីដ ១៩ E-School Cambodia ដែលជាគេហទំព័របើកបង្រៀនកួរតាមអនឡាញ (Online) របស់ក្រុមហ៊ុនឯកជនមួយ បានសហការជាមួយសហភាពសហព័ន្ធយុវជនកម្ពុជា បានដាក់ឱ្យប្រើប្រាស់ប្រព័ន្ធសិក្សាតាមអនឡាញដោយឥតគិតថ្លៃ ដល់សិស្សចាប់ពីថ្នាក់ទី ១ ដល់ថ្នាក់ទី ១២ ដើម្បីឆ្លើយតបទៅនឹងស្ថានភាពនេះ។
សេចក្តីប្រកាសរបស់ E-School Cambodia ដែលភ្នំពេញប៉ុស្តិ៍ទទួលបានកាលពីថ្ងៃអង្គារបញ្ជាក់ថា៖ «ជាក់ស្តែងតាមរយៈសហភាពសហព័ន្ធយុវជនកម្ពុជា ក្រោមការដឹកនាំរបស់ឯកឧត្តម ហ៊ុន ម៉ានី នៅក្នុងកាលៈទេសៈនេះ សាលារៀន ត្រូវផ្អាកក៏ដោយតែសិស្សានុសិស្ស ក៏អាចសិក្សាបន្ថែមតាមរយៈ App នូវមុខវិជ្ជាសំខាន់ៗជាមួយសាស្ត្រាចារ្យល្បី ថែមទាំងអាចសាកសួរសំណួរបានទៀតផង»។
សេចក្តីប្រកាសបញ្ជាក់ថា មុខវិជ្ជាដែលមាននៅក្នុង App នេះរួមមានសម្រាប់ថ្នាក់ទី ១ ដល់ទី ៦ មានគណិតវិទ្យា ភាសាខ្មែរ និងអង់គ្លេស។ ថ្នាក់ទី ៧ ដល់ទី ៩ មានគណិតវិទ្យា រូបវិទ្យា គីមីវិទ្យា ភាសាខ្មែរ និងអង់គ្លេសអនុវិទ្យាល័យ។ ថ្នាក់ទី ១០ ដល់ទី ១១ មានគណិតវិទ្យា រូបវិទ្យា គីមីវិទ្យា ជីវវិទ្យា អក្សរសាស្ត្រខ្មែរ អង់គ្លេសថ្នាក់វិទ្យាល័យ និងថ្នាក់សិស្សពូកែ។
សម្រាប់សិស្សថ្នាក់ទី ១២ មានគណិតវិទ្យា រូបវិទ្យា គីមីវិទ្យា ភាសាខ្មែរ ជីវវិទ្យា អក្សរសាស្ត្រខ្មែរ អង់គ្លេសថ្នាក់វិទ្យាល័យ ថ្នាក់សិស្សពូកែ និងថ្នាក់វិញ្ញាសាត្រៀមប្រឡងបាក់ឌុប។
លោក ឈុន ឡេង ដែលជាថ្នាក់ដឹកនាំរបស់ E-School Cambodia មិនអាចទាក់ទង ដើម្បីសុំការបញ្ជាក់បន្ថែមបានទេកាលពីថ្ងៃអង្គារ។
កាលពីថ្ងៃទី ១៣ ខែមីនាក្រសួងអប់រំបានដាក់ឱ្យដំណើរការកម្មវិធីរៀនតាមប្រព័ន្ធអេឡិចត្រូនិក (E-Learning) ដោយឥតគិតថ្លៃ លើមុខវិជ្ជាចំនួន ៦ ដែលមានគណិតវិទ្យា ប្រវត្តិវិទ្យា រូបវិទ្យា គីមីវិទ្យា ជីវវិទ្យា និងភាសាខ្មែរ។ សិស្សអាចរៀនដោយខ្លួនឯងតាមបណ្តាញទំនាក់ទំនងសង្គម ដែលមាន Facebook និង Youtube និងគេហទំព័ររបស់ក្រសួង។
ក្រសួងអប់រំបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី ១៣ ខែមីនាថា៖ «កម្មវិធីនេះបង្កើតឡើងក្នុងគោលបំណងជំនួយដល់ការសិក្សារបស់ប្អូនៗសិស្សានុសិស្សអាចនៅតែបន្តការសិក្សាបានដោយខ្លួនឯង ស្របតាមពេលវេលាផ្ទាល់ខ្លួនរបស់សិស្សានុសិស្សសម្រាប់ជាជំនួយស្មារតីក្នុងការត្រៀមប្រឡងសញ្ញាបត្រមធ្យមសិក្សាបឋមភូមិ និងទុតិយភូមិ»។
ក្រសួងអប់រំបានអនុញ្ញាតឱ្យសិស្សនិស្សិតចាប់ពីមតេ្តយ្យសិក្សាដល់ឧត្តមសិក្សាទាំងរដ្ឋ និងឯកជន ឈប់សម្រាកចាប់ពីថ្ងៃទី ១៦ ខែមីនា រហូតដល់មានការជូនដំណឹងជាថ្មី ក្រោយ ពីចំនួនអ្នកផ្ទុកជំងឺកូវីដ ១៩ ត្រូវបានរកឃើញជាបន្តបន្ទាប់។ ក្រសួងបញ្ជាក់កាលពីថ្ងៃទី ១៦ ខែមីនា ថា៖ «ក្រសួងសូមលើកទឹកចិត្តដល់មាតាបិតា អ្នកអាណាព្យាបាលគ្រប់រូបត្រូវជំរុញឱ្យកូនចៅធ្វើស្វ័យសិក្សានៅតាមផ្ទះ និងត្រូវមើលថែកូនចៅ និងចៀសវាងកន្លែងមួយចំនួន ដែលប្រឈមនឹងការឆ្លងខ្ពស់ ដូចជា៖ កន្លែងហែលទឹកសាធារណៈ កន្លែងហាត់ប្រាណ សួនកុមារ និងកន្លែងផ្សេងទៀត ដែលមានហានិភ័យខ្ពស់ក្នុងការឆ្លងកូវីដ ១៩»។
យុវសិស្ស លិន សូលក្ខបញ្ញា សិស្សថ្នាក់ទី ១២ នៅវិទ្យាល័យទួលទំពូងប្រាប់ភ្នំពេញប៉ុស្តិ៍កាលពីថ្ងៃអង្គារថា បច្ចុប្បន្ននាងរៀនស្វ័យសិក្សាដោយបង្កើត Group chat តាមប្រព័ន្ធ Skype ដោយមានគ្រូចូលរួមក្នុងក្រុមសិស្សផងដែរ។
ពេលមានចំណុចណាមិនយល់ នាងអាច Chat សួរគ្រូបន្ថែមក្នុងក្រុមនេះ។ កញ្ញាថា ការរៀនតាមអនឡាញពេលខ្លះ មិនប្រាកដថា សិស្សអាចចាប់បានមេរៀនទាំងអស់នោះទេ ដោយសារបច្ចេកវិទ្យាខ្ពស់ពេក ហើយមានការពិបាកសួរគ្រូនៅពេលមានចម្ងល់។
កញ្ញាថ្លែងថា៖ «រៀនស្វ័យសិក្សាខ្លួនឯង ក៏ប្រសើរដែរ។ និយាយទៅយើងយល់ដឹងពីខ្លួនឯង ហើយពេលយើងឆ្ងល់ ពេលយើងអត់ចេះ យើងអាច Chat សួរគ្រូអ៊ីចឹង។ បើតាមអនឡាញ អត់ដឹងថា ឆ្លើយជាមួយអ្នកណាទេ ពេលយើងឆ្ងល់អ៊ីចឹង»៕