.jpg)
លោក Goerge Edgar និងលោក កឹម សុខា កាលពីឆ្នាំ ២០១៦។ រូបថត សហការី
ភ្នំពេញៈ សហភាពអឺរ៉ុបប្រចាំកម្ពុជាមិនទាន់ប្រកាសអំពីការបញ្ចប់កិច្ចព្រមព្រៀងជាមួយកម្ពុជានៅឡើយទេ ប៉ុន្តែថាមន្ត្រីជាន់ខ្ពស់របស់ខ្លួននឹងមកទស្សនកិច្ចក្នុងឆ្នាំនេះ ដើម្បីស្ទង់មើលស្ថានភាពស្របពេលអតីតប្រធានគណបក្សសង្គ្រោះជាតិលោក សម រង្ស៊ី ក៏បានថ្លែងថ្មីៗនេះថាគណៈប្រតិភូនៃស្ថាប័នអន្តរជាតិដ៏ធំមួយនេះនឹងមកទស្សនកិច្ចកម្ពុជាក្នុងខែនេះ ឬដើមខែក្រោយហើយថាពួកគេអាចនឹងបញ្ចប់កិច្ចព្រមព្រៀងជាមួយកម្ពុជាដោយសារប្រទេសមួយនេះមិនដើរតាមគន្លងប្រជាធិបតេយ្យ។
តាមរយៈសារអេឡិចត្រូនិកផ្ញើមកភ្នំពេញ ប៉ុស្តិ៍ កាលពីម្សិលមិញ ឯកអគ្គរដ្ឋទូតសហភាពអឺរ៉ុប (European Union or EU) ប្រចាំកម្ពុជា លោកGeorge Edgar បានឲ្យដឹងថាក្រៅពីផ្អាកក្នុងការផ្តល់ជំនួយដល់កម្ពុជាទៅលើស្ថាប័នគណៈកម្មាធិការជាតិរៀបចំការបោះឆ្នោត (គជប) ក្រោយការរំលាយគណបក្សសង្គ្រោះជាតិដែលជាគណបក្សប្រឆាំងដ៏ធំកាលពីខែវិច្ឆិកាឆ្នាំ ២០១៧ មកនោះសហភាពអឺរ៉ុបនៅបន្តកិច្ចព្រមព្រៀងសហប្រតិបត្តិការជាមួយកម្ពុជា។
ប៉ុន្តែលោកបន្ថែមថាតាមគម្រោងបេសកកម្មរបស់ខ្លួនកាលពីថ្ងៃទី ២៦ កុម្ភៈ ឆ្នាំ ២០១៨ ក្រុមប្រឹក្សាកិច្ចការបរទេសនៃសហភាពអឺរ៉ុបបានចេញសេចក្តីសន្និដ្ឋានមួយស្តីពីកម្ពុជារួចហើយ។
សេចក្តីសន្និដ្ឋានចែងថា៖ «សហភាពអឺរ៉ុបគឺជាទីផ្សារនាំចេញដ៏ធំបំផុតរបស់កម្ពុជា។ ក្រុមប្រឹក្សាកត់សម្គាល់ឃើញថា កម្ពុជាត្រូវបានផ្តល់ឲ្យនូវច្រកចូលយ៉ាងពេញចិត្តទៅដល់ទីផ្សារសហភាពអឺរ៉ុប ក្រោមឃ្លាមួយថាអ្វីៗក៏អាចនាំចូលបានលើកលែងតែអាវុធ។ ក្នុងបរិបទនេះក្រុមប្រឹក្សាបានអំពាវនាវជាថ្មីសូមឲ្យគោរពសិទ្ធិមនុស្ស និងសេរីភាពជាសំខាន់រួមទាំងសិទ្ធិការងារគឺជាផ្នែកមួយដ៏សំខាន់ផងដែរនៃគោលនយោបាយពាណិជ្ជកម្មរបស់សហភាពអឺរ៉ុប និងជាការបញ្ជាក់អំពីការផ្តល់នូវពាណិជ្ជកម្មពេញចិត្ត។ ក្រុមប្រឹក្សាអញ្ជើញគណៈកម្មាធិការឲ្យបង្កើននូវការឃ្លាំមើលស្ថានការណ៍ និងបង្កើននូវទំនាក់ទំនងជាមួយកម្ពុជាដោយគិតទៅដល់ការផ្តល់និយតកម្មរបស់សហភាពអឺរ៉ុបលេខ ៩៧៨/២០១២»។
លោក George Edgar បញ្ជាក់ថាជាផ្នែកមួយនៃទំនាក់ទំនងនោះមន្ត្រីជាន់ខ្ពស់របស់សហភាពអឺរ៉ុបនឹងមកទស្សនកិច្ចប្រទេសកម្ពុជាក្នុងឆ្នាំ ២០១៨ នេះដើម្បីស្ទាបស្ទង់សភាពការណ៍នៅមូលដ្ឋាន និងធ្វើអន្តរកម្មជាមួយអាជ្ញាធរ និងតួអង្គពាក់ព័ន្ធស្តីពីការវិវឌ្ឍថ្មីៗ។ ទោះជាយ៉ាងណាលោកឯកអគ្គរដ្ឋទូតមិនធ្វើអត្ថាធិប្បាយពិស្តារទៅលើការថ្លែងរបស់លោក សម រង្ស៊ី នោះទេ។
លោកសរសេរថា៖ «ទោះជាយ៉ាងណាកិច្ចព្រមព្រៀងសហប្រតិបត្តិការរវាងសហភាពអឺរ៉ុប និងកម្ពុជានៅមានប្រសិទ្ធភាពហើយយើងសហប្រតិបត្តិការជាមួយកម្ពុជាតាមផ្នែកផ្សេងៗ»។
លោក សម រង្ស៊ី ដែលបច្ចុប្បន្នប្រធានចលនាសង្គ្រោះជាតិកំពុងនិរទេសខ្លួននៅក្រៅប្រទេសបានថ្លែងពីសភាអឺរ៉ុបក្នុងទីក្រុងប្រ៊ុចសែលប្រទេសបែលហ្ស៊ិក កាលពីថ្ងៃទី ៥ មិថុនា ទីដែលលោកបានជួបជាមួយថ្នាក់ដឹកនាំសហភាពអឺរ៉ុបនោះថាមេដឹកនាំសហភាពអឺរ៉ុបបានប្រាប់លោកថា ពួកគេមិនអាចបន្តកិច្ចព្រមព្រៀងសហប្រតិបត្តិការជាមួយកម្ពុជាបានទៀតទេ ដោយសារលោក ហ៊ុន សែន បានសម្លាប់ប្រជាធិបតេយ្យរំលាយគណបក្សសង្គ្រោះជាតិមិនឲ្យចូលរួមការបោះឆ្នោតហើយរៀបចំការបោះឆ្នោតក្លែងក្លាយ។
លោកបន្តថា៖ «គឺលោក ហ៊ុន សែន បានសម្លាប់លទ្ធិប្រជាធិបតេយ្យនៅកម្ពុជា ដូច្នេះលោក ហ៊ុន សែន គាត់ដាក់ខ្លួនគាត់ក្រៅច្បាប់របបគាត់ក្រៅច្បាប់នៃសហភាពអឺរ៉ុប។ សហភាពអឺរ៉ុបមិនអាចបន្តកិច្ចព្រមព្រៀងសហប្រតិបត្តិការជាមួយប្រទេសកម្ពុជាបានដូចមុនទៀតទេ។ កំហុសគឺដោយសារលោក ហ៊ុន សែន ប្រើអំណាចផ្តាច់ការសម្លាប់លទ្ធិប្រជាធិបតេយ្យ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ថ្លែងថារដ្ឋាភិបាលស្វាគមន៍គណៈប្រតិភូរបស់សហភាពអឺរ៉ុបដែលចង់មកទស្សនកិច្ច និងតាមដានមើលស្ថានភាពនៅប្រទេសកម្ពុជាដើម្បីឲ្យដឹងថា តើស្ថានភាពយ៉ាងម៉េចខ្លះដែលកំពុងកើតឡើងនៅកម្ពុជា ហើយវាដូចលោក សម រង្ស៊ី និយាយមែនឬទេ?
លោក សុខ ឥសាន មានប្រសាសន៍ថា៖ «គណបក្សប្រជាជនក៏ដូចជារាជរដ្ឋាភិបាលកម្ពុជាគឺស្វាគមន៍គ្រប់ភ្ញៀវអន្តរជាតិ ទាំងអស់ដើម្បីឲ្យមកត្រួតពិនិត្យសភាពការណ៍ជាក់ស្តែងដែលកំពុងកើតមាន។ អត់មានចង្អៀតចង្អល់ដូចទណ្ឌិត សម រង្ស៊ី ថា មន្ត្រីរបស់រាជរដ្ឋាភិបាលមិនចង់ឲ្យគណៈប្រតិភូសហគមន៍អឺរ៉ុបគេមកមើលនោះទេ»។
ឆ្លើយតបនឹងការអំពាវនាវឲ្យមានការគោរពសិទ្ធិមនុស្ស លោក សុខ ឥសាន បញ្ជាក់ថាកម្ពុជាកំពុងគោរពសិទ្ធិមនុស្ស ហើយបើមិនមានការគោរពសិទ្ធិមនុស្សទេ កម្ពុជាមិនមានអង្គការសង្គមស៊ីវិល និងស្ថាប័នប្រព័ន្ធផ្សព្វផ្សាយច្រើននោះទេ៕
