The Phnom Penh Post Search

Search form




Logo of Phnom Penh Post newspaper Phnom Penh Post - EU អំពាវនាវ​ឲ្យ​បង្កើន​ល្បឿន​កាត់​ទោស​មេដឹកនាំ​ខ្មែរ​ក្រហម

EU អំពាវនាវ​ឲ្យ​បង្កើន​ល្បឿន​កាត់​ទោស​មេដឹកនាំ​ខ្មែរ​ក្រហម

Content image - Phnom Penh Post

EU អំពាវនាវ​ឲ្យ​បង្កើន​ល្បឿន​កាត់​ទោស​មេដឹកនាំ​ខ្មែរ​ក្រហម

ភ្នំពេញៈ សហភាព​អឺរុប (EU)​ បាន​សម្តែង​នូវ​ក្តី​បារម្មណ៍ ចំពោះ​ដំណើរ​ការ​កាត់​ក្តី​យឺត និង​ការ​ចំណាយ​កាន់​តែ​ច្រើន​ឡើង មក​លើ​សាលា​ក្តី​ខ្មែរ​ក្រហម ដែល​គាំទ្រ​ដោយ អង្គការ​សហប្រជាជាតិ​មួយ​នេះ។

ក្តី​បារម្ភណ៍​នេះ ធ្វើ​ឡើង​ក្នុង​ជំនួប​ពិភាក្សា​កាល​ពី​ម្សិល​មិញ ​រវាង​រដ្ឋមន្ត្រី​ទទួល​បន្ទុក​ទីស្តី​ការ​គណៈរដ្ឋ​មន្ត្រី សុខ អាន និង លោក Pierre Amilhat ប្រធាន​គណៈប្រភិភូ​អឺរ៉ុប​ប្រចាំ​ទ្វីប​អាស៊ី អាស៊ី​កណ្តាល មជ្ឈិមបូព៌ា និង​អាស៊ី​ប៉ាស៊ីហ្វិក។

លោក ឯក ថា អនុ​ប្រធាន​អង្គភាព​ព័ត៌មាន​នៃ​ទីស្តី​ការ​គណៈរដ្ឋ​មន្ត្រី បាន​ប្រាប់​អ្នក​សារព័ត៌មាន​ថា លោក Pierre Amilhat បាន​សម្តែង​នូវ​ការ​បារម្ភណ៍​របស់​លោក ចំពោះ​ការ​ពន្យា​ពេល​នៃ​សវនាការ អតីត​មេដឹកនាំ​ខ្មែរ​ក្រហម និង​ការ​ចំណាយ​មក​លើ​សាលា​ក្តី​កូន​កាត់​មួយ​នេះ​ចេះ​តែ​កើន​ឡើង មក​ខាង​ភាគី​អន្តរជាតិ។

លោក​ថ្លែង​ថា​ «ភាគី​ទាំងពីរ កម្ពុជា និង​សហភាព​អឺរ៉ុប ចង់​ឲ្យ​សាលា​ក្តី​ខ្មែរ​ក្រហម បង្កើន​ល្បឿន​នូវ​នីតិវិធី​សវនាការ​របស់​ខ្លួន... ដែល​នោះ​ជា​​អ្វី​ដែល​កម្ពុជា និង​សហភាព​អឺរ៉ុប​ចង់​បាន​ខ្លាំង»។

លោក ឯក ថា បន្ត​ថា ទោះ​ជា​យ៉ាង​នេះក្តី សហភាព​អឺរ៉ុប​នឹង​បន្ត​ការ​គាំទ្រ និង​ជំនួយ​របស់​ខ្លួន​បន្ថែម​មក​លើ សាលា​ក្តី​នេះ​បន្ត​ទៀត។ លោក​បន្ថែម​ថា «កម្ពុជា និង​សហភាព​អឺរ៉ុប​មិន​អាច​លូក​ដៃ និង​ជ្រៀត​ជ្រែក​ចូល​ក្នុង​កិច្ចការ​របស់​ចៅក្រម និង​ព្រះ​រាជ​អាជ្ញា​របស់​សាលាក្តី​បាន​ឡើយ»។

បញ្ហា​ថវិកា​នេះ​ក៏​កំពុង​នៅ​តែ​ជា​ក្តី​បារម្ភណ៍​សម្រាប់​ភាគី​កម្ពុជា​ផង​ដែរ ដែល​បាន​បណ្តាល​ឲ្យ​បុគ្គលិក​ជាតិ​មួយ​ចំនួន​នៅ​សាលា​ក្តី​នេះ ត្រូវ​បាន​បញ្ឈប់​​កាល​ពី​ឆ្នាំ ២០១៣​ផង​ដែរ។

លោក នេត ភក្ត្រា អ្នក​នាំ​ពាក្យ​សាលា​ក្តី​ខ្មែរ​ក្រហម​បាន​ឲ្យ​ដឹង​ថា ភាគី​កម្ពុជា នឹង​ប្រឈម​នឹង​បញ្ហា​ហិរញ្ញ​វត្ថុ​ជា​ថ្មី​ម្តង​ទៀត ពាក់​ព័ន្ធ​នឹង​ប្រាក់​ខែ​របស់​បុគ្គលិក ដែល​នឹង​អស់​ចាប់​ពី​ថ្ងៃ​ទី​១ ខែ​កក្កដា ខាង​មុខ​នេះ​ទៅ។

លោក​ថ្លែង​ថា «ពួកយើង​កំពុង​អំពាវ​នាវ​ឲ្យ​ភាគី​ពាក់​ព័ន្ធ ផ្តល់​ជំនួយ​បន្ថែម​សម្រាប់​ដំណើរ​ការ​នីតិវិធី​សវនាការ​នេះ កុំ​ឲ្យ​មាន​ការ​រអាក់​រអួល»។

យោង​តាម​របាយការណ៍​ការ​ចំណាយ​ពី​សាលា​ក្តី​ខ្មែរ​ក្រហម បាន​បង្ហាញ​ថា ចាប់​តាំង​ពី​បង្កើត​តុលាការ​នេះ ពី​ឆ្នាំ ២០០៦ ដល់​២០១៤ តុលាការ​នេះ​បាន​ចំណាយ​ទឹក​ប្រាក់​អស់ ២០៤,៦ លាន​ដុល្លារ ក្នុង​នោះ​ខាង​ភាគី​អន្តរជាតិ​ចំណាយ​អស់ ១៥៤,៩ លាន​ដុល្លារ និង​ភាគី​កម្ពុជា​ចំណាយ​អស់ ៤៩,៦ លាន​ដុល្លារ។ សហភាពអឺរ៉ុប គឺជា​ម្ចាស់​ជំនួយ​ទី​ប្រាំពីរ ដែល​បាន​ផ្តល់​ថវិការ ៩,២​លាន​ដុល្លារ។

បច្ចុប្បន្ន សវនាការ​សាលា​ក្តី​នេះ​កំពុង​បន្ត​កាត់​ទោស​អតីត​មេដឹកនាំ​ខ្មែរ​ក្រហម​ជាន់​ខ្ពស់​ពីរ​រូប ​គឺ​លោក នួន ជា និង ខៀវ សំផន ដែល​ពួក​គេ​ទាំង​ពីរ​ត្រូវ​បាន​កាត់​ទោស​ឲ្យ​ជាប់​ពន្ធនាគារ​មួយ​ជីវិត ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ មួយ​ករណី​ហើយ៕

អត្ថបទគួរចាប់អារម្មណ៍