ភ្នំពេញៈ ក្រុមការងារត្រួតពិនិត្យរួមនៃបណ្តាប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិហៅកាត់ថា ICRG-JG របស់ក្រុមការងារហិរញ្ញវត្ថុ FATF បានកត់សម្គាល់ពីកិច្ចប្រឹងប្រែងរបស់កម្ពុជាក្នុងការអនុវត្តផែនការសកម្មភាព និងការដាក់ឲ្យប្រើប្រាស់ច្បាប់ស្ដីពីការសម្អាតប្រាក់ និងច្បាប់ពាក់ព័ន្ធ ទោះបីស្ថិតក្នុងស្ថានភាពប្រឈមនឹងជំងឺកូវីដ ១៩ ក៏ដោយ។
ធនាគារជាតិនៃកម្ពុជាកាលពីថ្ងៃទី ១៤ ខែកញ្ញាបានរៀបចំកិច្ចប្រជុំមួយតាមប្រព័ន្ធវីដេអូជាមួយនឹងក្រុមការងារត្រួតពិនិត្យរួមនៃប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិហៅកាត់ ICRG-JG ដើម្បីពិនិត្យ និងពិភាក្សាលើរបាយការណ៍វឌ្ឍនភាពនៃការអនុវត្តផែនការសកម្មភាពពាក់ព័ន្ធនឹងការប្រឆាំងការលាងសម្អាតប្រាក់ហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។ នេះបើតាមសេចក្ដីប្រកាសព័ត៌មានរបស់ធនាគារជាតិ។
ធនាគារជាតិបញ្ជាក់ថា នេះជាកិច្ចប្រជុំលើកទី៤ ជាមួយនឹងក្រុមការងារ ICRG-JG ដែលជាក្រុមមួយនៃក្រុមការងារ ហិរញ្ញវត្ថុ FATF។ នៅក្នុងកិច្ចប្រជុំនេះបានបញ្ជាក់បន្ថែមអំពីវឌ្ឍនភាពនៃការអនុវត្តផែនការសកម្មភាពដែលនៅសេសសល់ដើម្បីឲ្យក្រុមអ្នកវាយតម្លៃនៃ ICRG-JG ពិនិត្យលើរបាយការណ៍សម្រាប់ដាក់ជូនមហាសន្និបាតរបស់ក្រុមការងារហិរញ្ញវត្ថុនៅចុងខែតុលាខាងមុខ។
កិច្ចប្រជុំនេះចូលរួមដោយមន្ត្រីកម្ពុជាពីស្ថាប័នពាក់ព័ន្ធចំនួន ៦០ រូប ជាមួយនិងភាគី ICRG-JG ចំនួន ៣២ រូប ដែលមានសមាសភាពមកពីប្រទេសចិន ឥណ្ឌា ជប៉ុន អាល្លឺម៉ង់ អាមេរិក បារាំង អង់គ្លេស អូស្ត្រាលី នូវែលសេឡង់ គណៈកម្មាធិការសភាអឺរ៉ុប និងស្ថាប័ននៃក្រុមការងារហិរញ្ញវត្ថុ។
សេចក្ដីប្រកាសព័ត៌មានរបស់ធនាគារជាតិបញ្ជាក់ថា៖ «ក្រោយពីបានជួបប្រជុំជាមួយប្រតិភូតំណាងកម្ពុជា ក្រុមអ្នកវាយតម្លៃនៃ ICRG-JG បានកត់សម្គាល់ពីកិច្ចខិតខំប្រឹងប្រែងរបស់អាជ្ញាធរពាក់ព័ន្ធក្នុងការអនុវត្តតាមផែនការសកម្មភាពដូចជាបានដាក់ឲ្យប្រើប្រាស់ច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្មច្បាប់ស្ដីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ និងច្បាប់ស្ដីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ»។
ក្រៅពីនេះក្រុមការងារ ICRG-JG ក៏កត់សម្គាល់ពីការពង្រឹងការអនុវត្តច្បាប់របស់បុគ្គលរាយការណ៍ (វិស័យឯកជន) ការស៊ើបអង្កេត ការចោទប្រកាន់ ការកាត់ទោស និងការរឹបអូសទ្រព្យពាក់ព័ន្ធនឹងបទល្មើសសម្អាតប្រាក់ និងការបណ្ដុះបណ្ដាល បង្កើនសមត្ថភាពរបស់មន្ត្រីអនុវត្តច្បាប់ ទោះបីកម្ពុជាកំពុងប្រឈមនឹងការរីករាលដាលជំងឺកូវីដ ១៩ ក៏ដោយ។
កាលពីចុងខែមិថុនា កម្ពុជាបានដាក់ឲ្យប្រើប្រាស់ច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្មច្បាប់ស្ដីពីការប្រឆាំងដល់ការរីកសាយភាយអាវុធមហាប្រល័យ និងច្បាប់ពាក់ព័ន្ធមួយចំនួនទៀត។
កាលពីខែកុម្ភៈ ឆ្នាំមុន ក្រុមការងារហិរញ្ញវត្ថុ FATF បានដាក់កម្ពុជាក្នុងបញ្ជីប្រផេះសាជាថ្មី ប៉ុន្តែការដាក់ក្នុងបញ្ជីនេះត្រូវបានមន្ត្រីកម្ពុជាបញ្ជាក់ថា ដោយសារតែ FATF បានប្ដូរលក្ខខណ្ឌមួយចំនួន។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាបានថ្លែងថា៖ «ការមានក្របខ័ណ្ឌច្បាប់ និងក្របខ័ណ្ឌបញ្ញត្តិកម្មគឺជាជំហានវិជ្ជមានមួយ នៅក្នុងទិសដៅដ៏ត្រឹមត្រូវ។ ទោះយ៉ាងណា ដើម្បីឲ្យកម្ពុជាត្រូវបានដកចេញពីបញ្ជីប្រផេះរបស់ FATF ច្បាប់ត្រូវតែអនុវត្តប្រកបដោយប្រសិទ្ធភាព។ ការខ្វះចន្លោះក្នុងការអនុវត្តច្បាប់នៅតែជាក្ដីបារម្ភយ៉ាងខ្លាំងនៅកម្ពុជា»។
ពាក់ព័ន្ធនឹងការសម្អាតប្រាក់នេះកាលពីសប្ដាហ៍មុនសមត្ថកិច្ចកម្ពុជាបានបង្ក្រាបករណីឆបោក និងសម្អាតប្រាក់មួយនៅភ្នំពេញ បន្ទាប់ពីរកឃើញមានការវេរប្រាក់ចេញពីធនាគារនៅអាមេរិកចូលមកគណនីធនាគារមួយចំនួននៅកម្ពុជា។ ក្នុងប្រតិបត្តិការនេះមានការឃាត់ខ្លួនជនសង្ស័យ ៥ នាក់ ក្នុងនោះជនជាតិនីហ្សេរីយ៉ា ៤ នាក់ និងស្ត្រីខ្មែរម្នាក់។ អ្នកទាំង ៥ ត្រូវបានសាលាដំបូងរាជធានីសម្រេចឃុំខ្លួននៅពន្ធនាគារកាលពីថ្ងៃទី ១៧ កញ្ញា។ នេះបើតាមគេហទំព័រអគ្គស្នងការដ្ឋាននគរបាលជាតិ៕